Page 363 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

Emîn Mehmed Efendi-Hatîbzâde es-Seyyid
Amasya‘da Sultân Bâyezîd Câmii Hatîbi Hâfız es-Seyyid Mehmed Kâmil Efendi bin
Hâfız Mehmed Efendi bin Ahmed mahdûmudur. 1222’de pederinin irtihâlinde câmi-i mezkûr
hatîbi olup 1228’de vefât etdi. Sesi güzel, maârif-aşinâ bir zât idi. Bunun yerine Zileli
Karanfilzâde el-Hâc Hâfız Ahmed Efendi hatîb oldu.

Emîn Mehmed Efendi- Küleklizâde es-Seyyid Hâfız
Amasya ulemâsından Hâfız Osmân Efendi’nin mahdûmudur. Badet-tahsîl ders-i âm olup
Çeribaşı Câmii imâmı ve hatîbi ve kürsî şeyhi olduğu halde 1227’de vefât etdi. Âlim, sâlih, vâiz
idi. Birâderi Fâzıl Abdurrahman Efendi’dir. Merhûmun yerine vâlidemin ceddi şeyhü’l-kurrâ
Köprülü Hâfız [323] el-Hâc Halil Efendi imâm ve hatîb oldu.

Emîn Mehmed Efendi-Yörgüç Paşazâde es-Seyyid
Amasyalıdır. Eşrâfdan Yörgüç Paşa vakfı mütevellîsi es-Seyyid el-Hâc Hüseyin Bey bin
es-Seyyid el-Hâc Ahmed Bey bin el-Hâc Ömer Bey bin el-Hâc Osmân Bey’in mahdûmudur.
Amasya‘da tahsîl-i ulûm edib İstanbul’a gitdi. Orada bi’l-imtihân tarîk-i kudâta girip kadı oldu.
Badehû ba’zı sudûr-ı ilmiye ve ricâl-i devlete kethüdâ olduğu esnâda müderris olup
kethüdâlığı zamanında medâris-i mutâdeyi devretdikten sonra 1229 senesi recebinde Dârü’l-
hadîs-i Süleymaniye müderrisliğinden Halep mollası, badehû ba’zı vilâyâta kadı oldu. 1234’de
vefât etdi. Mahdûmu es-Seyyid Mehmed Râğıb Efendi’dir.

Emîn Mehmed Efendi-Müftî
Köprülüdür. İbrâhim’in mahdûmu olup Amasya‘da Şeyhzâde Abdullah Vecîh Efendi’den
ikmâl-i tahsîl ederek Sinop’a gitdi. Orada tavattun ederek tedrîs-i ulûma mübâşeret etdi. Ders-
i âm-ı benâm olup Sinop Müftüsü olduğu halde [324] 1235’de vefât etdi. Meşâhir-i ulemâdan
fakîh, sâlih idi. “Ferâiz-i Sirâciyye”yi terceme ve şerh etmişdir.

Emîn Mehmed Efendi-Hindîzâde
Amasyalıdır. Züamâdan Hindîzâde Mustafa Ağa bin el-Hâc Ahmed Bey bin Ali Bey bin
Hindî Ahmed Paşa’nın mahdûmudur. Gençliğinde İstanbul’a gelip Kara Vezîr Mehmed
Paşa’nın birâderi es-Seyyid Mustafa Paşa’nın ağalığında dâiresine intisâb ederek Bâb-ı âlîye
çırağ edildi.
Paşanın vezâretinde bunun pederi kethüdâsı olduğundan Bâb-ı âlîde tefeyyüz edib nâil-i
rütbe-i hâcegânî oldukdan sonra paşanın kâtib-i dîvânı badehû kapı kethüdâsı oldu. 1231 senesi
saferinin gurresinde vefât etdi. Eyüp’de medfûndur.

Emîn Mehmed Efendi-Fazlızâde es-Seyyid el-Hâc
Amasya eşrâfından es-Seyyid Hâfız Mehmed Efendi’nin mahdûmu olup tahsîl-i
maârifden sonra mukâtaât kâtibi, 1217’de şehir kethüdâsı 1222’de nakîbü’l-eşrâf kâim-makâmı
ve 1223’de Sivas vâlisi olan Cebbârzâde [325] Celâleddîn Mehmed Paşa’nın kâtib-i dîvânı
oldu.
1227’de paşanın zaman-ı idbârında Amasya‘ya gelip 1230 senesi muharreminde hacıbaşı
ve 1233 senesi muharreminde baş a’yân oldu. Üç mâh sonra Yeniçeri-Talebe vak’ası zuhûrunda
tesebbübü görüldüğünden baş a’yânlıkdan azliyle Samsun’a nefy edildi. İki mâh sonra affıyla
Celâleddîn Paşa’nın kethüdâsı oldu.
1236’da Paşa’nın vezâreti ref ve nefy edildiğinden Amasya‘ya gelip 1237’de meclis-i
a’yân a’zâsı 1239’da baş a’yân olduysa da sene-i mezbûre recebinde yine Talebe-Yeniçeri
vak’ası olup Sivas’a celbedildi. Oraya vusûlünde berâeti zâhir olduğundan Hicâz’a gitdi.

362