Page 93 - 6-8

Amasya Tarihi Cilt: 6
Amasya Tarihi 6-8. Cilt Hüseyin Hüsâmeddîn YASAR
Ebûbekir Efendi-Giridlizâde el-Hâc
Köprülüdür. Köprü ve Amasya’da şeyhü’l-kurrâ olan Giridli el-Hâc Mehmed
Efendi’nin mahdûmu olup Köprü’de doğdu. Amasya’da tahsîl-i ilm ve ma’rifet edib İstanbul’a
gitdi. Ammizâdesi Hüseyin Paşa’nın sadâretinde Bâb-ı âlîde kethüdâ kalemine girdi.
1122’de Köprülüzâde Nu’mân Paşa’nın sadâretinde [275] kethüdâ kâtibi olarak dâhil-i
zümre-i hâcegân oldu. Ba’dehû mukâbele-i süvârî, sânîyen kethüdâ kâtibi olup 1127’de azliyle
Amasya’ya gönderildi.
Amasya’da Ömer Paşazâde Osmân Bey’in baş-a’yânlığında meclis-i a’yâna a’zâ olup
cür’etkârâne harekâtı yüzünden birkaç def’a teftîşâta uğradı. 1143 vak’asında zî-medhal
görülmekle Diyârbekir’e nefy edilip 1144’de ma’fuvven avdet ve 1147 hudûdunda vefât etdi.
Kâtib, nâfizü’l-kelîm, müteharrik bir zât idi.

Ebûbekir Efendi-Hacı Hâfız
Abbâs oğludur. Hızır Paşa Medresesinde ikâmet ederek Amasya ulemâsından tahsîl-i
ilm edib 1115’de vefât eden Hâfız Mehmed Efendi’nin mahlûlünden Hızır Paşa Câmii hatîbi,
1121’de câmi-i mezbûr vâ’izi, 1141’de Hızır Paşa müderris vekili olduğu hâlde 1149 senesi
şa’bânının on birinde vefât etdi. Ulemâdan, vâ’iz bir hatîb idi.
Mahdûmu Hâfız Abdullatîf Efendi yerine hatîb olup [276] 1179’da mahdûmu Hâfız
Ebûbekir Efendi’ye hitâbeti kasr-ı yedd ve ferâgat etdi. Bu da 1188’de Gümüşlüzâde Câmii
Şerîfi imâmı olduğundan hitâbet-i mezkûreyi Hâfız Ahmed Efendi’ye kasr-ı yedd edib 1216’da
vefât etdi. Bunun mahdûmu da es-Seyyid Abdullatîf Efendi mahkeme baş-kâtibi oldu. Bunlara
“Hatîbzâde” dendi.

Ebûbekir Bey-Yeğen el-Hâc
Amasyalı Rahtuvân el-Hâc Mehmed Paşa’nın birâderi el-Hâc Osmân Ağa’nın
mahdûmudur. “Yeğen Bey” demekle meşhûrdur. Genç iken züamâdan olup muharebelerde
bulundu. 1139’da Amasya alaybeyi olup 1141’de İstanbul’a gitdikde züamâdan Sâlih Ağa
kendisine vekâlet etdi.
1144’de ma’zûl ve 1146’da sânîyen alaybeyi olarak İran harbine gitdi. 1148’de yararlık
göstermekle mîr-livâ oldu. 1151 muhârebesinde vefât etdi. Mahdûmları Ahmed, Osmân
Beylere Yeğen Bekiroğulları dendi.

Ebûbekir Ağa-Mîrzâzâde el-Hâc
[277] Amasya’nın şimâl-i şarkı tarafında kâin Zana köyü eşrâfından Mîrzâ Bey’in
oğludur. Ayasofya mahzen evrâkında görülen enderûn defterlerinde yazıldığı üzere 1112’de
enderûn-ı saray-ı hümâyûna girip terakkî ederek 1132’de dülbend ağası oldu.
1143 senesi hâ’ilesinde kapıcıbaşılıkla ihrâç edilerek devr-i hidemât edib 1148’de
başbâki kulu, ba’dehû surre-i hümâyûn emîni oldu. Hicâz’dan avdetinde 1152 hudûdunda vefât
etdi. Birâderi el-Hâc İsmâil Ağazâde, el-Hâc Mîrzâ Ağa ve hemşîrezâdesi Mîrzâ Ali Paşa’dır.
Ricâl-i devletden idi.

Ebûbekir Efendi-Ayntâbîzâde el-Hâc
Amasya ulemâsından Hoca Ayntâbî el-Hâc Mustafa Efendi’nin mahdûmudur.
Pederinden ve Mütevellîzâde el-Hâc Ahmed Efendi’den ve Çorumlu Hâfız es-Seyyid Mehmed
Efendi’den tahsîl-i ulûm edib ders-i âm oldu. 1136’da Ya’kub Paşa müderrisi olup 1153 senesi
hudûdunda vefât etdi. Kibâr-ı ulemâdan idi.

Ebûbekir Ağa-Gözdaşoğlu el-Hâc
[278] İstanbul’da Bostancılar Ocağı kethüdâsı iken azl ü tekâ’üde sevk edilen el-Hâc
Ya’kûb Ağa bin Gözdaş Mehmed Ağa bin Mustafa’nın oğludur. Pederinin vefâtında sipâhîlik
tımârı mutasarrıfı olup ba’zı vüzerâya hizmet ederek teayyün etdi. Ba’dehû Hicâz’a gidip

88
92