Page 225 - 6-8

Amasya Tarihi Cilt: 6
Amasya Tarihi 6-8. Cilt Hüseyin Hüsâmeddîn YASAR

Ahmed Bey-Kayalı Paşazâde es-Seyyid el-Hâc
Amasya a’yânından es-Seyyid el-Hâc Süleyman Bey bin Sâlih Bey bin Kaya Ali Paşa’nın
mahdûmudur. Hâciyân ve a’yân a’zâsı olup, mükerreren nakîbü’l-eşrâf kâ’im-makâmı olup
1236 sâline doğru vefât etdi. Meşâhîr-i a’yândan bir hânedân idi. Mahdûmu es-Seyyid
Süleyman Paşa ve birâderi de es-Seyyid Kâşif Ömer Paşa’dır.

Ahmed Efendi-Yeşil Şeyh
Amasya yeniçerilerinden Apardıoğlu İbrâhim Ağa bin Mehmed Ağa bin Apardı İbrâhim
Ağa’nın mahdûmudur. Tahsîl-i ilm ü marifet etdikten sonra kibâr-ı Nakşibendiyyeden Buharalı
Mirza Yûsufzâde eş-Şeyh Mustafa Efendi’ye [721] ve meşhûr Çatal Hâfız Ahmed Efendi’ye
hizmet ederek Hacı İlyas tekkesi şeyhi ve Hâfız Efendi’nin halifesi oldu. Hayli iştihâr edib
1236’da vefât etdi.
Ahval ü ma’ârif-i sûfiyeye vâkıf, âbid, halûk, latîf, tecemmülâta mâ’il, sulehâ-yı
meşâyihden bir zât idi. Şeyhinin yanında medfûndur. Oğulları Kurşunlu Mahallesi imâmı Hâfız
Mehmed, İbrâhim Efendilerdir. Hâfız Mehmed Efendizâde Hâfız Mustafa Efendi de imâmdı.
Bunun ammizâdesi Hâfız Ahmed Efendi olup daha sonra vefât etdi. Oğulları Mehmed
Sa’îd, Hasan, Ali Efendilerdir. Evkâf kâtibi Hâfız Hasan Efendizâde Abdüllatîf Efendi
mahkeme kâtibi ve bidâyet a’zâsından olup 1320 sâlinden sonra vefât etdi.

Ahmed Ağa-Küçük es-Seyyid el-Hâc
Receb Mahallesi eşrâfından es-Seyyid el-Hâc Mustafa Ağa bin el-Hâc Ahmed Ağa’nın
oğludur. Altmış dördüncü bölükte mukayyed yeniçeri olup akrânı arasında şecâ’at ve cesâreti
ile temeyyüz eylediğinden defalarla Amasya serdârı ve Rus harbinde [722] serdengeçtiler ağası
oldu.
Avdetde turnacıbaşılık pâyesi ile taltîf edilip meclis-i a’yân a’zâsı olduğu halde 1237
senesi evâhirinde vefât etdi. “Hacıoğlu” demekle meşhûr, nâfizü’l-kelim, mû’tedil bir yeniçeri
zâbiti idi. Evlâdına “Küçük Ahmed oğulları” dendi.

Ahmed Efendi-Bafralı el-Hâc
Evâil-i hâlinde Bafra’dan Amasya’ya gelip Ürgüblü el-Hâc Ahmed ve tilmizi Suruklu el-
Hâc Ali Efendilerden tahsîl-i ulûm edib ders-i âm ve Payaslı el-Hâc Mehmed Efendi’nin
1225’de vefâtında Sultân Bâyezîd kürsî şeyhi oldu.
İki defa icâzet verip şöhret-i ilmiyyesi artdı. Meclis-i a’yân a’zâsı olup ulemâyı
yeniçerilere karşı müdâfa’â etdi. 1238’de vefât eyledi. Devlet ve teceddüd taraftarı olup
meşâhîr-i ulemâdan sâlih, vâ’iz, takrîr ü ifâdesi mükemmel idi.

Ahmed Efendi-Karanfilzâde el-Hâc
Ulemâdan Zileli “Karanfil Hâce” demekle meşhûr el-Hâc [723] Mehmed Efendi’nin
mahdûmudur. Pederinden ve Sarı Ahmedzâde Hâfız el-Hâc Mehmed Efendi’den vücûh-ı
Kur’âniyyeyi ve tevcîdi ahzedib ulemâdan tahsîl-i ilm ü marifet ederek mücâz ve ders-i âm
oldu.
1228’de Sultân Bâyezîd Câmii hatîbi ve imâm-ı evveli Hatîbzâde Hâfız es-Seyyid
Abdullah Efendi’nin vefâtında savt ü edâsı güzel, ulûm-ı Arabiyeye vukûfu der-kâr olduğundan
Sultân Bâyezîd Câmii hatîb ve imâm-ı evveli oldu. On iki yıl kadar câmii şerîfi şenlendirdi.
1239 senesi evâ’ilinde vefât etdi. Âlim, kârî, sadâsı muhrik bir zât idi.
Mahdûmu Fâzıl Mehmed Efendi pederinin yerini tutdu. 1281’de vefâtı ile yegâne
mahdûmu Akif Mustafa Efendi hatîb ve imâm-ı evvel oldu. Bunun yegâne oğlu Hulûsî Ahmed
Efendi de aşktan müte’essiren 1314’de vefât eyledi. Bundan pek ziyâde müte’essir olan Akif
Efendi ma’lûl olup 1345’de hırsızların dest-i bî-emânında mahnûkan vefât etdi.

220
224