Page 230 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

mahdûmu Hâncı el-Hâc İdris Efendi ber-hayatdır.

Ahmed Bey-Kışlacıklı
Amasya civârında Kışlacık köyünden Halîl Ağa’nın oğludur. 1242’de nizâmiyye askeri
olup Rus harbine gitdi. Şece’ât ve cesâretiyle iştihâr edib yüzbaşı, 1253’de binbaşı, ba’dehû
kâ’im-makâm ve 1258’de mîr-âlây olarak gelip Amasya kumandânı ve zabıta müdürü oldu.
1261 vak’asında hayli müşkilât geçirdi. 1264’de vefât etdi. Gâyet şeci, cesûr, pehlivân-ı meşhûr
idi.

Ahmed Efendi-Çarşambalı el-Hâc
[737] Çarşambalı Ali oğludur. Fuzalâdan Müftüzâde Canikli el-Hâc Mehmed
Efendi’den ikmâl-i tahsîl edib ders-i âm oldu. Fazîlet-i ilmiyyesi zâhir olarak iştihâr edib
1262’de meclis-i de’âvâ a’zâsı olduğu halde 1265 senesi evâ’ilinde vefât etdi. Meşâhîr-i
ulemâdan fâzıl, fıkıh ve usûle, hadîs ve tefsîre gâyet vâkıf mütekellim bir zât idi.

Ahmed Efendi-Fazlızâde es-Seyyid el-Hâc
Amasya serdârı Fazlıoğlu es-Seyyid Abdullah Ağa bin es-Seyyid Abdüsselam Efendi bin
es-Seyyid el-Hâc Mustafa Efendi bin el-Hâc Ahmed Efendi bin Mustafa Efendi bin Ahmed
Efendi bin Fazlullah Efendi’nin mahdûmudur. Amasya a’yânından Fazlızâde es-Seyyid el-Hâc
Mehmed Emin Efendi’ye dâmâd olarak ta’ayyün edib meclis-i a’yân ve ilk açılışında meclis-i
idâre a’zâsı oldu.
1261’de Tabib Vak’asında mevki’ini muhafazâ edib 1265’de vefât etdi. Meşâhîr-i
a’yândan ve Eski Kethüdâ Mahallesi eşrâfından hânedân bir zât idi. Oğulları es-Seyyid
Abdullah Efendi 1275’de ve es-Seyyid Mehmed Emin Efendi 1318’de ve es-Seyyid Mustafa
Efendi de 1332’de vefât etdi. [738]

Ahmed Efendi-Caniklizâde Hâfız el-Hâc
Esbak Amasya Müftüsü Canikli el-Hâc Mehmed Efendi bin Derviş Mustafa Efendi bin
el-Hâc Ali Efendi bin Ahmed Efendi bin Kadı Keyvan Efendi’nin mahdûmudur. Pederinden ve
Sipâhi el-Hâc Hâfız Ömer Efendi’den ikmâl-i tahsîl ederek mücâz ve ders-i âm oldu.
Pederinin zaman-ı fetevâsında müsevvid ve emînü’l-fetvâ ve irtihâlinde Hızır Paşa
müderrisi oldu. Mu’ahharan meclis-i de’âvâ âzası olduğu halde 1267’de bilâ-veled vefât etdi.
Gâyet fakîh, Arabîyede mâhir, ilm-i ferâ’izde üstâd, halûk, afîf, zâhid bir zât idi. Birâderi el-
Hâc Mehmed Hilmi Efendi Amasya Müftüsü ve diğer birâderi el-Hâc Hâfız Ali Efendi de
Taşköprü Müftüsü oldu.

Ahmed Ağa-Hindîzâde es-Seyyid el-Hâc
Küpceğiz Mahallesi eşrâfından el-Hâc Mehmed Ağa bin el-Hâc Ahmed Ağa bin el-Hâc
Ali Bey bin Hindî Ahmed Paşa’nın mahdûmudur. Amasya’da sipâhi ocağı tekrar açıldığı
esnâda sipâhi ve nizâmiyye ihdâsında süvârî zâbiti olup 1248’de yüzbaşı olarak harbe iştirâk
etdi. [739]
Muhârebeden avdetinde ba’de’l-Hâc meclis-i idâre a’zâsından ve a’yân-ı memleketden
olup 1269’da vefât etdi. Oğulları mahkeme a’zâsından ve şu’arâdan Abdülmecid Zühdî Efendi
1308’de ve Sipâhi el-Hâc İsmâil Ağa 1312’de vefât etdi. Abdülmecid Efendizâde Mehmed
Şükrü Efendi’nin mahdûmu Mecid Şükrü Bey diş tabibidir. Hacı İsmâil Ağazâde el-Hâc
Mehmed Tevfik Efendi de bir mahdûmu ile bakkal idi.

Ahmed Efendi-Ziyâreli Şeyh
Amasya’nın Ziyâre Mahallesi’nden İsmâil’in mahdûmudur. Amasya’da Niksarlı el-Hâc
İsmâil Efendi’den tahsîl-i ulûm edib bir müddet ders okutdu. 1251’de Soğuk Pınar Câmii vâ’izi

225
229