Page 229 - 6-8

Amasya Tarihi Cilt: 6
Amasya Tarihi 6-8. Cilt Hüseyin Hüsâmeddîn YASAR

Samsun’a gönderildi. Ve eniştesi es-Seyyid Hakkı Paşa da ma’zûlen Amasya’da me’mûr-ı
ikâmet oldu.
1241’de avdetle eniştesinin hazînedârı olarak Şam’a gitdi. 1244 saferinde es-Seyyid
Hakkı Paşa yine Sivas vâlîsi olup geldikte Amasya muhassılı, ba’dehû kapıcıbaşı olarak ba’zı
bilâda mütesellim ve muhassıl oldu. 1247’de avdet ve Amasya’da ikâmet edib uhdesinde
bulunan cihâtı evlâdına kasr-ı yed ederek 1255’de vefât etdi. Acem Ali Mahallesi eşrâfından
bir hânedân idi. Mahdûmları es-Seyyid Bilâl, Mustafa Efendilerdir.

Ahmed Efendi-Belvarî el-Hâc
Diyârbekir vilâyeti dâhilinde Belvar kasabasından olup oralarda tahsîl-i ulûm ederek
Merzifon’da ikâmet ve neşr-i ulûma himmet etdi. Fazîlet-i ilmiyyesini Amasya ulemâsına
tasdik etdirip iştihâr ederek eş-Şeyh Ahmed Nâsih [734] Efendi’nin vefâtında teferrüd etdi.
1253’de Merzifon ulemâsının ittifâkı ile müftü olup beş yıl kadar makâmını muhafaza
ederek 1257’de dâr-ı bekâya rihlet etdi. Meşâhîr-i ulemâdan fâzıl, gâyet fakîh, usûlî, ulûm-i
aklîyede mâhir bir zât idi.

Ahmed Efendi-Kilislizâde el-Hâc
Şâmice Mahallesi’nde sâkin ulemâdan Kilisli el-Hâc İsmâil Efendi’nin mahdûmudur.
Meşâhîr-i fuzalâdan Payaslı el-Hâc Mehmed Efendi’den ikmâl-i tahsîl edib ders-i âm oldu.
Yıllarca tedrîs-i ulûm ederek iştihâr edib Hayriyye müderrisi olduğu halde 1258’de vefât eyledi.
Meşâhîr-i ulemâdan bir zât idi.

Ahmed Efendi-Mecdî Hâce
Amasya dâhilinde Mecitözü kazâsı kurrâsından olup İbrâhim’in oğludur. Fâzıl-ı meşhûr
Sipâhizâde şeyhü’l-ulemâ el-Hâc Hâfız Ömer Efendi’den ikmâl-i tahsîl edib mücâz ve ders-i
âm oldu. Ba’dehû Narlıbahçe’de Türedîzâde el-Hâc Süleyman Ağa’nın binâ etdiği
Süleymaniyye Medresesi müderrisi olduğu halde 1259’da vefât etdi. Meşâhîr-i ulemâdan vâ’iz,
fakîh, münzevî bir zât idi. Narlıbahçe mezârlığında medfûndur.

Ahmed Ağa-Türedîzâde es-Seyyid el-Hâc
Amasya’nın Küpceğiz Mahallesi eşrâfından el-Hâc Süleyman Ağa bin el-Hâc Ali Ağa
bin el-Hâc Süleyman Ağa’nın oğludur. [735] Pederinin vefâtında teayyün edib hâciyân ve
a’yân meclislerine a’zâ, bir defa da hâcıbâşı, Tanzimât-ı Hayriyyeden sonra meclis idâre a’zâsı
olduğu halde 1261’de vefât etdi. Meşâhîr-i a’yândan gâyet zengin, kerem-kâr idi.
Ahmed Ağa, Sipâhizâde Amasya sipâhilerinden Hasan Ağa bin Mehmed Ağa’nın
mahdûmudur. Devr-i Selîm Hân-ı Sâlisde ihdâs edilen nizâm ocağına girip güzel ta’lîm ve
terbiye-i askeriyye gördü. 1222’de ocağın ilgâsında kaçıp Amasya’ya geldi. Bir iki yıl sonra
açılan Rusya muhârebâtında şece’ât ve terbiye-i askeriyyesi ile kendisini tanıtmış olduğundan
1242’de tekrar açılan nizâmiyye askerliğine girip 1244’de yüzbaşı, 1248’de sağ kolağası,
1254’de binbaşı, 1259’da kâ’im-makâm olduğu halde 1262 hudûdunda vefât etdi. Ümerâ-yı
askeriyyeden şecî bir zât idi. Mahdûmu Hasan Bey’dir.

Ahmed Efendi-Cırıkçızâde Hâfız
Amasya yeniçerilerinden Cırıkcıoğlu Halîl Ağa bin Ahmed’in [736] mahdûmudur.
Abdullah Vecîh Efendi tilmizlerinden fâzıl-ı meşhûr Hacı Ahmedzâde es-Seyyid Mustafa ve
Zileli muhaddis-i meşhûr el-Hâc Ali Şükrü Efendilerden tahsîl-i ulûm edib ders-i âm ve
1253’de Benderli Medresesi müderrisi olduğu halde 1263’de vefât etdi. Meşâhîr-i ulemâdan
sâlih, vâ’iz bir zât idi.
Birâderi Ali Ağa’nın oğlu Seyyid Ahmed Ağa zabtiyye çavûşânından olup bunun
mahdûmu nüfus kâtibi şu’arâdan Ali Dâ’imî Efendi 1347’de müntehiren vefât etdi. Diğer

224
228