Page 53 - 6-8

Amasya Tarihi Cilt: 6
Amasya Tarihi 6-8. Cilt Hüseyin Hüsâmeddîn YASAR

İbrâhim İlmî Bey-Rahtuvân Paşazâde
Amasyalıdır. 1113’de Bağdâd harbinde vefât eden Rahtuvân el-Hâc Mehmed Paşa’nın
mahdûmudur. Amasya’da tevellüd edib pederi Şâm mütesellimi iken birâderi Osmân Bey’le
beraber Şâm ulemâsından ahz-ı ulûm ederek Amasya’ya geldi.
Pederinin Cidde ve Habeş beylerbeyiliği zamanında îfâ-yı Hac edib ba’zı bilâda ve
eyâletlere pederi tarafından mütesellim oldu. Pederinin vefâtında Amasya’ya gelip 1114’de
Yâkutiyye, 1120’de Bâyezîd Paşa, 1121’de Hüseyin Ağa vakıflarına mütevellî oldu. 1122’de
mîr-livâ olup ma’zûlen Amasya’ya geldikde mükerreren baş-a’yân olmuşdu. [140]
Ancak etbâ’ının ba’zı ahvâl-i nâ-becâya cür’eti ve rukabâsının da şikâyeti yüzünden
birkaç def’a teftîşe uğradı. Mîr-i mîrân olacağı esnâda Hüseyin Ağa vakfından zimmeti çıkarılıp
terakkîsine mâni’alar ihdâs eyledi. Nihâyet 1143 vak’asında rüfekâsıyla birlikde Samsun’a iclâ
ve kal’abend edilip zilhiccesinde vefât etdi. Bekir Beyzâde Ömer Paşa’nın dâmâdıdır.
Âlim, fâzıl, edîp, şâir, hasîb, gâyet mükerrem, beşûş, servet ü yesâre mâlik, hânesi
mahfel-i üdebâ ve mecma’-ı ulemâ idi. Haftada bir def’a ulemâ ve şu’arâyı hânesinde cem’
ederek onlarla ilmî ve edebî musâhebeler eder, isbât-ı meziyyet edenlere atıyyeler verirdi.
Mahdûmları Ömer Lütfî, Mehmed Avnî Beylerdir. Birâderleri Osmân, Ali, Ahmed beylerdir.
Ömer Beyzâdeler ahfâdı bâkidir.

İbrâhim Ağa-Sakaoğlu
Amasyalıdır. Üçler Mahallesi’nde Yahyâ Ağa’nın oğludur. Altıncı bölükde mukayyed
yeniçeri olduğundan “Altıncı Ağa” demekle meşhûr oldu. Amasya’da alemdâr, mükerreren
yeniçeri serdârı ve İrân harbinde serdengeçtiler ağası olarak fedâkârâne çalışıp [141] 1144
senesinde vefât etdi.
Zâbıt, cesûr, zî-nüfûz, hânedân bir kimse idi. Amasya’da konağı olan sokağa “Saka
Sokağı” dendi. Mahdûmları yeniçeri ağası İsmâil Ağa ile İstanbul kadısı Yahyâ Efendi ve
kudâtdan Mahmûd Efendi ve yeniçeri serdârı el-Hâc Mehmed Ağa meşhûr idiler.

İbrâhim Paşa-Hoca Paşazâde
Amasyalıdır. İğnecizâde Hoca Ahmed Paşa ahfâdından el-Hâc Ömer Bey bin Dede Ali
Bey bin Hoca Ahmed Paşa mahdûmudur. Amasya eşrâfından olup meclîs-i a’yâna mükerreren
a’zâ ve baş-a’yân ve Amasya mütesellimi ve 1135 senesi saferinin beşinci günü bâ-rütbe-i mîr-
i mîrânî Amasya mutasarrıfı olarak İrân harbine gitdi. 1136 rebiülevvelinde muhârebelerde
yararlığı görüldüğünden Şehr-i Zor beylerbeyi, ba’dehû “ber-vech-i arpalık” Akşehir
mutasarrıfı ve 1141 senesi şevvâlinde Sivas beylerbeyi ve 1143’de Revân muhâfızı olup 1145
senesinde vefât etdi. Şecî’, müdebbir bir hânedân idi. Mahdûmu el-Hâc Ali Bey’dir.

İbrâhim Ağa-Şâtırzâde el-Hâc
[142] Amasyalıdır. Esbak-ı Amasya mütesellimi Hakalalı Şâtır Ali Ağa bin Hamza
Ağa’nın oğludur. Sadr-ı esbak Kara Mustafa Paşa ve ba’dehû Merzifonî el-Hâc Paşa
ağalarından olup bir aralık sipâhiler ağası da oldu. Ba’dehû tekâ’üd edilip Amasya a’yânından
ve meclis-i a’yân a’zâsından olduğu hâlde bu esnâlarda vefât etdi.
Hacı Feyzullahzâde İbrâhim Ağa Amcazâde Hüseyin Paşa’nın kapıcılar kethüdâsı
olmuşdu. Müşârün-ileyhin irtihâlinden sonra Amasya’ya gelip ihtiyâr-ı tekâ’üd ve 1140
sâlinden sonra vefât etdi. Diğer Murâd Beyzâde el-Hâc İbrâhim Ağa bin el-Hâc Mustafa Ağa
ve Mütevellîzâde el Hâc İbrâhim Ağa bin el-Hâc Ali Ağa da Amasya eşrâfından a’yân ve
hâcıyân meclislerine a’zâ olarak 1147 sâline doğru vefât etmişlerdir. Hacı Feyzullahzâde el-
Hâc İbrâhim Ağa “Köse” demekle meşhûr idi. Züamâdan İbrâhim Ağa bin İsmâil Bey de bu
zamanın ricâlindendir.

48
52