Page 108 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

Bey’in kerîmesinden bir mahdûmu Mehmed Fuad Bey kaldı. Bu da ceddi türbesi vakfına
mütevellî oldu. [340]

Hâlisâ İbrâhim Ağa-Amasyalı
Hasan oğludur. İstanbul’a gidip çavuş-başı el-Hâc Sâlih Ağa’nın dâiresinde hayli zaman
hizmet ederek ağasının itimâdını kazanıb kethüdâsı oldu. 1161’de mûmâileyhin vefâtıyla Bâhir
Mustafa Paşa’nın dâiresine girdi.
Paşa’nın ilk sadâretinde selâm ağası olup hayli şöhret kazandı. Ba’dehû paşasıyla beraber
devr-i vilâyât edib 1177 rebîülâhirinde paşasının ikinci sadâretinde selâmlık kethüdâsı oldu.
1178 senesi şevvâlinde paşanın azli ve zilka’desinde i’dâmı üzerine açıkda kalıb sonra vefât
etdi.

Hâlis İbrâhim Ağa-Hacı Saîd Ağazâde
Amasya eşrâfından ve dergâh-ı âlî kapıcı-başılarından el-Hâc Saîd Mehmed Ağa bin
İsmail Ağa’nın oğludur. Birâderi es-Seyyid Hakkı İsmail Paşa’nın Amasya’da vekîl-i umûru
olup 1227’de Amasya sancâğı mukâtaa emîni oldu. 1237’de vefât etdi. Eşrâf-ı memleketden
idi. [341]

Hâlis Ömer Efendi-es-Seyyid Lâdikî
Lâdikli Mehmed mahdûmudur. İstanbul’a gidip Hasan Çelebi medresesinde ikâmet ve
tahsîl-i ulûma bezl-i makderet ederek ulemâdan mücâz ve ders-i âm iken tarîk-i kazâya sâlik
oldu. Kazâ ve niyâbetle devr-i kasabât ve bilâd edib 1158’de kibâr-ı kudâtdan görüldü. Ba’dehû
fevt oldu. 1165’de medrese-i mezkûrede yazdığı “Hilye-i Nebeviyye” sonunda imzâsı var idi.
Ulemâ-yı kudâtdandır.

Hâlis Mehmed Efendi-Nüzhet Efendi Birâderi
Amasyalıdır. Hâcegân-ı dîvân-ı hümâyûndan harameyn kisedârî Amasyalı Nüzhet Ömer
bin el-Hâc Mustafa Ağa’nın birâderidir. Mâliye ketebesinden olup tefeyyüz ederek mektubî-i
mâliye serhalîfesi, ba’dehû hâcegân-ı dîvân-ı hümâyûn zümresine iltihâk ederek kisedâr-ı
defterî oldu.
Ba’dehû menâsıb-ı sagîreyi devr ederek 1204’de haremeyn muhâsebecisi ve 1206
şâbânında ma’zûl ve ba’dehû cizye muhasebecisi olup 1211 hudûdunda ma’zûlen [342] vefât
etdi.

Hâlis Mehmed Efendi-Seküköylüzâde
Amasya’da Sultân Bâyezîd Câmiinde şeyhü’l-muhaddisîn ve müderris-i benâm olan
Seküköylüzâde Hâfız el-Hâc Osmân Efendi’nin mahdûmu ve Tamgacı el-Hâc Ahmed Ağa’nın
kerîmezâdesidir. Hâfız-ı Kur’ân olup İbrâhim Cû’î Efendi’den vucûh-ı kıraat-ı Kur’âniyyeyi
ahz etdi.
1189’da pederinin vefâtında şeyhü’l-muhaddisîn ciheti uhdesine tevcîh edilmiş ise de
ilm-i hadîsde marifeti kalîl olduğundan 1200 Şâbânında uhdesinden ref’ edilib 1205’de şeyhü’l-
kurrâ, amcası Hâfız Abdullah Efendinin vefâtıyla Sultân Bâyezîd Câminde şeyhü’l-kurrâ oldu.
Bu vazîfesiyle iştigâl üzere iken 1229’da vefât etdi.
Vucûh-ı Kur’ân’a vâkıf, mücevvid sâlih idi.

Hâlis Mehmed Ağa-Hacı Kâsımzâde
Köprülüdür. Eşrâf-ı mahallîyeden 1264’de vefât eden el-Hâc Ahmed Ağa bin Mehmed
Ağa bin el-Hâc Kâsım Ağa’nın oğludur. Köprülü Mehmed Paşa’nın kayınpederi Dede Yûsuf
Ağa’nın ahfâdından olup biraz tahsîl-i irfân ü kitâbet etdi.[343]

97
107