Page 197 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Râşid Mehmed Efendi-İğnecizâde el-Hâc
Köprülüdür. Köprü kasabası civârında Meşeli Köyü’nden [13] İğneci Mehmed’in
oğludur. Bir müddet Amasya’da Canikli el-Hâc Mehmed ve şeyhü’l-ulemâ Sipâhî Hâfız Ömer
Efendilerden tahsîl-i ulûm edib İstanbul’a gitdi. Orada ikmâl-i tahsîl ederek avdet edib
Köprü’de ders-i âm oldu.
1258’de Hâfız Ömer Hulûsî Efendi’nin vefâtıyla münhal olan Abdülkerîm Ağa Medresesi
müderrisi olup yıllarca tedrîs-i ulûma bezl-i makderet ve Orta Câmi-i şerîfte halka va’z ü nasîhat
ederek imrâr-ı evkât edib 1291 hudûdunda azm-i cennât eyledi. Âlim, fâzıl, zâhid, kerîmü’n-
nefs, vâ’iz idi. Mahdûmu kibâr-ı ulemâdan Yûsuf Bahrî Efendi de 1335’de dâr-ı mükâfâta gitdi.
Bu da meşâhîr-i ulemâ ve sulehâdan idi.

Râşid Mehmed Efendi-Hacı Yûsuf Ağazâde el-Hâc
Amasyalıdır. Esbak Amasya mütesellimi olup 1244’de şehîden vefât eden ıstabl-ı âmire
pâyeli es-Seyyid el-Hâc Ali Ağa bin el-Hâc Ömer Çelebi bin el-Hâc Yûsuf Ağa’nın
mahdûmudur. Tahsîl-i ilm ü kitâbet ederek Hâfız Ali Paşazâde el-Hâc Ahmed Mikdâd Paşa’ya
dâmâd oldu. [14]
Ba’dehû ihtisâb kâtibi sonra sırasıyla ihtisâb ağası, zirâ’at müdürü, nüfûs nâzırı olup
1275’de tahrîrât müdürü oldu. Meşhûr mutasarrıf Ziyâ Paşa’ya kendisini fevka’l-âde sevdirdi.
Fakat Paşa-yı müşârün-ileyhin 1282 senesi recebinde azlinden az sonra Gümüş ma’deni emîni
olarak Amasya’dan kaldırıldı.
1285’de âzim-i Hicâz olup avdette meclis-i idâre a’zâsı oldu. 1288’de Şirvânîzâde
Mehmed Rüşdü Paşa’ya refâkat edib İstanbul’a gitdi. Müşârün-ileyhin himmetiyle şehremâneti
meclis a’zâsından olup 1295’de orada vefât etdi. Gâyet mü’eddeb, şâir, kâtib, zî-nüfûz u servet
idi. Mahdûmları Ahmed Mikdâd, Ali Rızâ Beylerdir.
Diğer Amasya eşrâfından sandık emîni Yumuk Osmânzâde el-Hâc Mehmed Efendi’nin
mahdûmu Râşid Mehmed Efendi de belediye meclisi a’zâsından iken 1312’de ve birâderi
Abdullah Nûrî Efendi de 1314’de vefât etdi. Bunun oğlu Mehmed Efendi 1334’de harb-i
umûmîde vefât eyledi. [15]

Râziye Hâtun-Gümüşlüzâde
Amasyalıdır. Eşrâf-ı hâcegân-ı Amasya’dan Gümüşlüzâde Hâce Kıvâmeddîn Kâsım
Çelebi kerîmesi ve Hazreti Pîr İlyâs-ı Halvetî zevcesidir. Zevcinden tahsîl-i ilm ü ma’rifet ve
ahz-ı tarîkat ederek kadınlar arasında neşr-i ilm ve tehzîb-i ahlâka himmet ve zevcinden bir kaç
yıl sonra 815 hudûdunda dâr-ı na’îme rihlet eyledi. Âlimât-ı nisâdan zâhide, âbide, kâmile bir
kadın idi. Zevcinin ayağı ucunda medfûndur. Birâderi Hâce Celâl Çelebi ricâldendir.

Râziye Hâtun-Gümüşlüzâde
Amasyalıdır. Kubâ’da medfûn olan Pîr Hüsâmeddîn Çelebi kerîmesi olup Gümüşlüzâde
eş-Şeyh Hayreddîn Hızır-ı Halvetî Hazretlerinin zevcesidir. Vâlidesi Âbide Hâtun Şeyhülislâm
Gümüşlüzâde Pîr Abdurrahmân Çelebi kerîmesi olup bunun vâlidesi Râbia Hâtun da Hazreti
Pîr İlyâs-ı Halvetî kerîmesidir.
Peder ü zevcinden tahsîl-i ilm ü ma’rifet ve ahz-ı tarikat [16] edib zikr ü ibâdetle iştigâl
üzere iken zevcinin irtihâlinden on yıl kadar sonra 898 senesi evâhirinde dâr-ı na’îme rihlet
etdi. Zevcinin ayağı ucunda medfûndur. Âlime, âbide, zâhide idi.

Râziye Hâtun-Çelebi Kızı
Amasyalıdır. Mehmed Çelebi kerîmesi olup Molla Cürcân demekle meşhûr olan
Muhyiddîn Mehmed Efendi 955 senesi cumâdelûlâsında Amasya müftüsü olup geldikte
bununla te’ehhül etdi. Hâtunîye Mahallesi’nde kâ’in hânesinde ikâmet etdi.

190
196