Page 199 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Ba’dehû vâridât kâtibi olup Amasya’da Melik İsmâ’îl Gâzi tevliyeti 1227’de uhdesine
ırsen tevcîh edilip Hacı Bektâş Ağa’yı vekîl nasb etdi. Sonra bâ-rütbe-i hâcegânî ba’zı menâsıbı
zabt ederek 1238’de umûr-ı sarrâfiye nâzırı oldu. Bu esnâda tevliyet-i mezkûreyi Amasya’da
vekîli olan Bektâşzâde es-Seyyid el-Hâc Bektâş Ağa’ya kasr-ı yed ü ferâgat etdi. [21]
1243’de Girid Defterdârı olarak taşra gönderildi. Beş yıl kadar orada kalıp 1248’de
ma’zûlen avdet ve 1251’de vefât etdi. Haydarpaşa’da medfûndur. Zevcesi Abdullah Berrî
Efendi’nin hafîdesi Şerîfe Fatma Hânım idi.

Râgıb Mehmed Efendi-Çördükzâde
Amasyalıdır. Sultân Bâyezîd Câmii imâmı Hâfız Ahmed Efendi bin el-Hâc Ahmed
Efendi’nin mahdûmudur. Amasya’da tahsîl-i ilm ü kitâbet edib meclis-i idâre baş kâtibi ve ba’dehû
meclis-i idâre a’zâsı oldu.
1276’da Amasya kazâlarına müdür olup devr-i kasabât ederek 1286’da ma’zûlen Amasya’ya
geldi. Ba’dehû İstanbul’a gidip 1288’de Şirvânîzâde Mehmed Rüşdü Paşa’nın sâye-i ikbâlinde
rütbe-i sâlise ile Akkâ ve 1290’da rütbe-i sânîye ile Nablus sancâklarına kâ’im-makâm oldu.
1291’de ma’zûlen İstanbul’a gelip sonra şehremâneti ser-tahsîldârı ve 1298’de meclis-i
emânet a’zâsı [22] oldu. 1307’de ihtiyârlığına binâ’en tekâ’üd edilip 1310 senesi evâ’ilinde
vefât etdi. İktidâr u liyâkat sâhibi olup müdîr idi. Mahdûmu Ahmed Nâ’il Bey de el-yevm
şehbenderlikten mütekâ’iddir.

Râgıb Mehmed Efendi-Topal Ağazâde
Amasya eşrâfından ve mahkeme a’zâsından Hâfız Muhyiddîn Efendi’nin mahdûmudur.
68
[23]

Râfi’a Hâtun-Hâce
Amasya eşrâfından Şa’bânzâde el-Hâc Mehmed Ağa’nın kerîmesi olup 1241’de Üçler
Mahallesi’nde müceddeden bir mekteb inşâ etdi. Ulemâdan Sa’dî Çelebi câmii imâmı Hâfız
Abdullah Efendi’yi mu’allim nasb edib sonra vefât eyledi. Dîndâr, ehl-i hayr idi.

Râkım İsmâ’îl Efendi-Hamza Beyzâde es-Seyyid eş-Şeyh
Amasyalıdır. Hamza Ağa’nın mahdûmu olup ulemâdan tahsîl-i ulûm ve meşâyih-i
Nakşîbendiyyeden Turhalî es-Şeyh Mustafa Efendi’den tekmîl-i sülûk ederek her iki taraftan
me’zûn oldu. Evâ’il-i hâlinde ders-i âm olup sonra kürsî şeyhi ve vâ’iz oldu.
1222’de Ahî Darb-hâneci şeyhi olup tezkîr ve irşâd-ı halka muvâzabet ederek iştihâr etdi.
Ba’dehû meşîhatı dâmâdı Sa’deddinzâde es-Seyyid Sa’deddîn Efendi’ye kasr-ı yed ü ferâgat
ederek halktan münkatı’ olduğu hâlde 1241’de vefât etdi. Âlim, kâmil, şâir, zâhid bir şeyh idi.

Râkım Mehmed Efendi-Çavuşzâde
Amasyalıdır. Amasyalı defterdâr İbrâhim Efendizâde [24] Râkım Mehmed Paşa’nın
hazînedârı olan Tâhir Mustafa Ağa bin Mehmed Efendi’nin mahdûmudur. İstanbul’da tahsîl-i
ulûm edib Müneccim-başı Mehmed Sâdık Efendi’ye mülâzemet ederek ondan ilm-i nücûmu
aldı.
Ba’dehû mûmâ-ileyhe dâmâd olup 1208’de müderris ve 1212’de müneccim-i sânî ve
1227’de kayın pederinin vefâtında müneccim-başı oldukta 1229’da Galata mollası oldu.
Ba’dehû bilâd-ı hamse pâyesiyle taltîf edilip 1236’da Mekke-i Mükerreme mollası oldu.
1240’da İstanbul pâyesiyle tekrîm edilip 1241 senesi recebinin yirmi sekizinde vefât etdi.
İlm-i nücûm ve sâ’ir fünûnda mâhir idi. Mahdûmu Hüsâmeddîn Mustafa Efendi de müderris ve

68 Müellif bu maddeyi eksik bırakmışdır. (Ed.)

192
198