Page 204 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

yirmi yedisinde vefât etdi. Yerine Hâfız Abdullah Efendi imâm ü hatîb olduysa da bu da ref’
edilip Hâfız Mahmûd Efendi hatîb ü imâm oldu. Ulemâdan vâ’iz bir zât idi.

Receb Efendi-Kara Müderriszâde
Köprülüdür. Fâzıl Ahmed Paşa müderrisi Kara Müderriszâde Ahmed Efendi’nin
mahdûmudur. Pederinden ve Amasya’da Allâme Hızır ve Çelebizâde Ömer Efendilerden tahsîl-
i ulûm edib Köprü’de ders-i âm ve 1097’de pederinin irtihâlinde Fâzıl Ahmed Paşa Medresesi
müderrisi oldu.
Yıllarca tedrîs-i ulûm ederek iştihâr edib 1112’de [40] Köprü müftüsü oldu. Ba’dehû azl
ve tekrâr nasb edilerek 1120 sâlinden sonra vefât etdi. Meşâhîr-i ulemâdan fâzıl, vakûr bir zât
idi. Meşhûr Osmâncıklı Çelebi es-Seyyid el-Hâc Mustafa Efendi’nin esâtizesindendir.

Receb Paşa-Boz
Amasya kethüdâyeri Kapıcızâde Mehmed Ağa bin Receb Ağa’nın mahdûmudur.
Züamadan olup hayli muhârebâta iştirâk etdi. 1117’de birâderi el-Hâc Ahmed Paşa’nın
hâmîliğinde ser-çeşme olup 1118 senesi şevvâlinde Ohri sancâğı beyi oldu.
Birâderi Bostancı-başı el-Hâc Ahmed Paşa’nın sâye-i ikbâlinde 1119 senesi
rebîülevvelinde bâ-rütbe-i mîr-i mîrânî Amasya mutasarrıfı oldu. 1121 senesi saferinde
Karahisâr-ı şarkî sancâğı mutasarrıfı ve 1123’de Kefe beylerbeyi ve 1125’de Yeni Kal’a
muhâfızı oldu.
1126’da Kudüs-i şerîf mutasarrıfı olduğu esnâda birâderi azl ü teb’îd edilerek vezâreti
ref’ edildiğinden müte’essir olup 1127’de birâderinin i’dâmını müte’âkib azl [41] ve
Amasya’ya i’zâm edildi. 1131 hudûdunda vefât etdi. Oğulları el-Hâc Osmân, Mehmed
Beylerdir. Hacı Osmân Beyzâde Mustafa Ağa ve Hacı Mehmed Beyzâde el-Hâc Ali Ağa ve
bunun oğlu Hasan Ağalardır. Bunlara “Bozoğulları” dendi.

Receb Ağa-Silahdâr el-Hâc
Amasyalı Ömer Ağa’nın oğludur. İstanbul’a gidip silahdâr ocağına girdi. Orada tefeyyüz
ederek silahdâr ocağı kethüdâsı iken bir ârızadan dolayı ma’lûl olduğundan 1159’da tekâ’üd
edilerek Amasya’ya geldi. Ba’dehû illeti zâ’il olup Hicâz’a gitdi. 1171 sâlinden sonra vefât etdi.
Oğlu el-Hâc Mehmed Ağa’dır. Buna “Silahdâroğlu” dendi.

Rahmetullâh Efendi-Şeyhzâde
Merzifonludur. Orada zâviyesi olan eş-Şeyh Sırrî Ali Efendi’nin mahdûmudur. İstanbul
ulemâsından tahsîl-i ulûm edib silk-i kudâta girdi. Ba’zı kasabât u bilâda ve Merzifon’a kadı
olup 1079 sâlinden [42] sonra vefât etdi. Mahdûmu Mustafa Efendi’dir.

Rahmetulâh Efendi-Molla Şeyhzâde
Merzifonludur. El-Hâc Ahmed Ağa’nın oğludur. Tahsîl-i ulûm edib ders-i âm ve Devlet
Hâtun tekkesi şeyhi ve ceddi Sırrî Ali Efendi vakfının mütevellîsi oldu. Birkaç def’a İstanbul’a
gidip geldi.
Sonra terk-i meşîhat ederek meslek-i kazâ ve niyâbeti ihtiyâr ederek hayli kasabâta kadı
ve ba’zı livâya nâib olup 1212 hudûdunda vefât etdi. Tarîkat-ı Melâmiyye ricâlinden olup âlim,
fünûn-âşinâ, mütekellim, hânende, sadâsı gâyet güzeldi. “Târîh-i Melâmiyye”de Rahmetullâh
Ağa unvânıyla tercemesi yazılıdır.

Rahmî Mehmed Efendi-Hâcezâde
Amasyalıdır. Yağmurköylü Hâce İsmâ’îl Efendizâde Abdurrahmân Efendi’nin
mahdûmudur. Pederinden ve Dervîş Ali Efendi’den tahsîl-i ulûm ve ahz-ı hutût ederek ders-i
âm ve ba’dehû mahkeme kâtibi oldu. Ba’dehû kasabâta kadı olup 1091’de vefât etdi. Âlim,

197
203