Page 202 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

muhibb, sûfiyye bir zât idi. Eş-Şeyh Cû’î Çelebi vakfiyesiyle hilâfet-nâmesinde şuhûd-ı
hâzıradan görüldü.

Receb Çelebi-Hâce el-Hâc Memîzâde
Amasya hâcegân ü eşrâfından Memî Çelebi mahdûmudur. Meşâhîr-i tüccâr ü a’yândan
olup Çelebi Sultân Mehmed Hân ümenâsından oldu. 817’de defter emîni ve 825’de şehremini
görüldü. Ba’dehû vefât eyledi. Diğer a’yândan Hâbilzâde el-Hâc Receb Çelebi bin Hasan
Çelebi de meşâhîr-i ümenâdan olup 847 sâlinden sonra vefât etdi. Mahdûmu el-Hâc İlyâs
Çelebi’dir. [33]

Receb Bey-Devâtdâr Paşazâde
Amasyalıdır. Meşâhîr-i ümerâdan Şâdî Bey bin Bûrâk Bey bin Devâtdâr Ahmed Paşa bin
el-Hâc Şâdgeldi Paşa mahdûmudur. Pederinin hayâtında züamadan olup sonra ümerâdan oldu.
Amasya vâlîsi Şehzâde Alâeddîn Bey’in havâss-ı ümerâsından olduğu münâsebetle 846’da
müşârün-ileyhin şehâdetinde menkûb oldu.
847’de Varna muhârebesinde fedâkârâne harb ederek Sultân Murâd-ı Sânî’nin
teveccühâtını kazandığından Çorumlu sancâğı beyi oldu. Ba’dehû 857’de İstanbul fethine
me’mûr olup gitdi. İstanbul fethinde şecâ’at ü ikdâmı görüldüğünden Bursa beyi oldu.
860’da Sultân Bâyezîd-i Sânî Amasya vâlîsi oldukta ma’iyyetine me’mûren Amasya’ya
geldi. 868 sâlinden sonra vefât etdi. Kibâr-ı ümerâdan idi. Mahdûmu Mehmed Bey ve
birâderleri Bûrâk, Ahmed Beylerdir.

Receb Çelebi-Mevlânâ Ahî Sadreddîn Ebû’l-Fezâ’il
Kazâbâdlıdır. Velî bin Şa’bân mahdûmu olup [34] gençliğinde Amasya’ya geldi.
Meşâhîr-i fuzalâdan Mevlânâ Ziyaeddîn Yûsuf Amâsî, Mevlânâ Cemaleddîn Yûsuf Tokatî,
Mevlânâ Rükneddîn Ahmed Cendî’den tahsîl-i ulûm u fünûn ederek ders-i âm ve “Ahî Receb
Kazâbadî” demekle be-nâm oldu.
Ba’dehû Halfet Gâzi müderrisi olup civârında ikâmet etdi. Yıllarca tedrîs-i ulûm edib
Amasya vâlîsi Sultân Bâyezîd-i Sânî’ye kendisini fevka’l-âde sevdirdi. Ba’dehû Yörgüç Paşa
müderrisi oldu.
878’de Fatih Sultân Mehmed Hân Amasya’ya geldikte fazl ü ahlâkıyla kendisini
sevdirmiş olduğundan Tokat kadısı nasb ve irsâl etdi. Ba’dehû, Halîmî Çelebi yerine kadı-i
Sivas olup oraya gitdi. Birkaç yıl sonra ma’zûlen Amasya’ya geldi.
886’da Sultân Bâyezîd-i Sânî tahta cülûs etdiği esnâda birâderi Konya vâlîsi Cem Sultân
da’vâ-yı saltanatla kıyâm edib Konya kadısı Şükrullâh Çelebizâde Mevlânâ Şemseddîn Ahmed
Çelebi’yi sefîr olarak İstanbul’a göndermişdi. [35]
888’de Şemseddîn Ahmed Çelebi bu sefâretinden azl ü habs edildikte Konya kadısı olup
gitdi. Orada Konya kazaskeri unvânıyla icrâ-yı hükûmet-i şer’iyye etdi. 893’de ma’zûlen
Amasya’ya geldi.
İkâmetgâhı olan mahallde bir mescid-i şerîf ve bir zâviye inşâ ederek o mahalli
şenlendirdi. Oraya Ahî Receb Mahallesi dendi. Altı yıl kadar münzevîyâne tekâ’üd vazîfesiyle
yaşayıp 899’da vefât etdi. Şehzâdeler türbesi ittisâlinde bâğçesi önünde medfûndur.
Âlim, fâzıl, müteşerri’, kâmil bir zât idi. Emlâkini hayrât-ı şerîfesi mesâlihine vakf edib
tevliyetini aslah u ekber evlâdına şart u tahsîs etdi. Mahdûmları Velî, Şa’bân Çelebilerdir.
Şa’bân Çelebizâde Ramazân Çelebi ve bunun mahdûmu el-Hâc Bayram Efendi meşâhîr-i
ulemâdan idiler. Bunlara “Ahî Receboğulları” dendi.

195
201