Page 327 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

1031 senesi recebinde Sultân Osmân-ı sânî vak’asında “Defter-i Ahbâr”ın verdiği
ma’lûmâta binâ’en erbâb-ı isyân tarafından ve yeniçeriler tarafından Hâce Ömer Efendi’ye
ta’allûku hasebiyle hânesi yağma edildiğinden müte’essiren az sonra vefât etdi. Mahdûmları
dîvân-ı hümâyûn hâcegânından Merâmî Ahmed, Abdurrahmân Efendiler de 1049’da yek-
diğerini müte’âkib vefât etdi.

Sünbül Mehmed Efendi-Kâdızâde eş-Şeyh
Amasyalıdır. Hafîdi Mehmed Tâhir Efendi’nin rivâyeti üzere Melik Gâzi İsmâ’îl Bey’in
ahfâdından ve yeniçeri meşâhîrinden Kâdıoğlu Hasan Ağa bin Osmân Efendi’nin mahdûmudur.
Üçler Mahallesi’nde doğdu.
Hâl-i sabâvetinde pek güzel ve mavuş gözlü olduğundan “Sünbül Mehmed” dendi.
Kadınlar kendisine meftûn olup azıttılar. [462] Bu sûretle evâ’il-i evkâtını isrâf etdi. Ba’dehû
Taşköprülü eş-Şeyh el-Hâc Hâfız Abdullah Efendi’nin nesâyihi sâyesinde her şeyden el çekip
şeyh-i müşârün-ileyhe mürîd oldu.
Bu sâyede tahsîl-i ilm ü hâl edib tarîk-i sûfiyyede ıslâh-ı nefs ve tasfiye-i derûn ederek
şeyh-i müşârün-ileyhten hilâfet aldı. Pederinin irtihâlinde Melik Gâzi vakfının mütevellîsi
olduğundan fazla-i vakıftan hayli servet edindi. Yörgüç Paşa civârında yaptırdığı tekkesi şeyhi
olup 1245’de orada bir tevhîd ocağı uyandırdı.
Rivâyete nazaran burada Melik İsmâ’îl Gâzi Bey bir zâviye binâ edib yıllar geçtikten
sonra harâb olduğundan kendisi mütevellî oldukta bu zâviyeyi ihyâ etdi. Yirmi altı yıldan
ziyâde burada zikr ü tevhîde mülâzemet edib 1272 senesi evâ’ilinde dâr-ı na’îme irtihâl etdi.
Ma’ârif-âşinâ, latîf-meşreb, hoş-sohbet, turfe-gû, müte’abbid bir şeyh-i Nakşîbendî idi.
Mahdûm-ı yegânesi Hâfız Osmân Efendi tevliyet ü meşîhate vâris olup 1320 senesi
zilka’desinde vefât etdi. Bunun mahdûmları [463] eşrâftan el-Hâc Mehmed Tâhir Efendi ile
avâmdan Hasan Efendi’dir.

Sencer Şâh-Sultân Celâleddîn-i Selçukî
Amasya Hükümdârı Sultân Nâsıreddîn Şehinşâh bin Sultân Rükneddîn Mes’ûd Şâh-ı
Selçukî şehzâdesidir. Amasya’da doğdu. Pederinin zamân-ı hükûmetinde Ankara vâlîsi olup
575’de pederi vefât etdikte amcası Sultân İzzeddîn Kılıçarslân Şâh tarafından Ereğli sancâğına
nakl edildi.
588 senesi şa’bânında Kılıçarslânzâde Sultân Rükneddîn Süleyman Şâh Konya’da taht-ı
Selçuk’a cülûs etdikte birâderi Argûn Şâh yerine Amasya vâlîsi olup geldi. Rûmların tecâvüz
edeceklerini nazar-ı dikkate alarak kuvve-i askeriyyesini tezyîd ü tanzîme çalışdı.
On yıldan ziyâde Amasya’da icrâ-yı vilâyet edib Kastamonu tarafından David Komnenos
ve Canik tarafından da Trabzon’dan gelen Rûm kuvvetleri Amasya vilâyetini tazyîk ederek
istîlâya kıyâm etdikte iki yıl kadar Amasya’yı müdâfa’a edib 605’de kanlı bir muhârebe
esnâsında şehîden vefât etdiği zann olunur. Şehzâdesi Nâsıreddîn Süleyman Şâh’dır. [464]

Sencer Şâh-Şehzâde Çelebi
Amasyalıdır. Selçuk hânedânından Îsâ Çelebi bin Süleyman Şâh bin Sencer Şâh-ı
mezkûrun mahdûmudur. Ceddi tarafından pederine intikâl eden Amasya havâlîsinde kâ’in iki
kıt’a çiftlik pederinin vefâtıyla kendisine intikâl etdirmişdi.
680 hudûdunda Moğol hükümdârı Abaka Hân tarafından çiftlikleri elinden alınıp Tatar
Beylerine verildikte düçâr-ı müşkilât olduysa da 681 senesi rebîülevvelinde Abaka’nın füc’eten
vefâtı üzerine yerine kâ’im olan Tekudâr Ahmed Hân’a mürâca’at edib 682’de çiftliklerine
sâhib olabildi.
Bundan sonra hayli yıl yaşadı. Sultân Mahmûd Gazân Hân devrinde vefât etdi.
Çiftliklerine “Sencer Alanı” ve “Sevincer Alanı” dendi. Gâlibâ “Sevinç Er Çelebi”demekle

320
326