Page 325 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR
Sinan Ağa-Çile-hâneli el-Hâc
Amasya’nın Ya’kûb Paşa Mahallesi eşrâfından el-Hâc Mehmed Ağa’nın oğludur.
Bevvâb-ı sultânî olup hidemât-ı mîriyyede îfâ-yı vazîfe ederek 1041’de dergâh-ı âlî
müteferrikalarından iken Bayram Paşa’ya intisâb etdi.
1046’da müşârün-ileyhin sadâretinde kapıcıbaşı olup eyâlât-ı mühimmede muhassıl ve
bir müddet Sivas eyâletinde mütesellim oldu. 1069’da Abazalıların ta’kîbâtına me’mûr olup
1075’de ihtiyârlığına binâ’en tekâ’üd edildi. Az müddet sonra vefât etdi. Kibâr-ı a’yândan idi.
Oğulları Ali, Hasan Ağalardır. Bunlara ve bunların evlâdına “Hacı Sinan Oğulları” dendi.
Hasan Ağazâde el-Hâc Mehmed Ağa’dır. Bunun oğlu el-Hâc Hasan Ağa da ma’rûftur. El-Hâc
Ali Ağazâde el-Hâc Sinan Ağa’dır.

Sinan Ağa-Hacı Sinânzâde, el-Hâc
Amasyalıdır. El-Hâc Ali Ağa bin el-Hâc Sinan Ağa’nın [455] mahdûmudur. “Defter-i
Bostâniyân”da yazılı olduğu üzere 1072’de enderûn-ı hümâyûna girip bostâncılar ocağına kayd
edildi. Orada ta’lîm u terbiyye görüp tefeyyüz ederek 1087’de bostâncılar odabaşısı oldu.
1091’de hâsekî olup bostâncılar ocağında temâyüz etdi. Ba’dehû ocak kethüdâsı olup
1095 senesi saferinde Mehmed Ağa’nın azli üzerine yoluyla bostancıbaşı ya’nî sarây-ı
hümâyûn muhâfızı ve zabtiyye nâzırı oldu.
Tam iki yıl îfâ-yı vazîfe edib 1097 senesi muharreminde sadr-ı a’zam Bayburdluzâde
Kara İbrâhim Paşa’nın azli üzerine sene-i mezbûrenin saferinde azl edildi. Bebek’te kâ’in sâhil-
hânesinde ikâmet etmekte iken 1098’de Kara İbrâhim Paşa’nın nefy ü i’dâmı üzerine
Amasya’ya gönderildi.
Ba’dehû hayli müddet Amasya’da mensî bir sûrette ikâmet edib kaldı. 1123’de
bostâncıbaşı Amasyalı el-Hâc Ahmed Paşa vezâretle Kapudân-ı deryâ oldukta afv ve ıtlâk
edilerek İstanbul’a gelip dergâh-ı âlî kapıcıbaşılığıyla Mora vilâyetine gönderildi. 1127’de
orada vefât [456] etdi. Meşâhîr-i a’yândan idi.
Kara İbrâhim Paşa’nın sadâretinde Köprülüzâdelere yapılan mu’âmelât-ı gayr-ı lâyıkadan
dolayı gözden düşdüğü cihetle ileri gidemedi. Mahdûmu es-Seyyid el-Hâc Mehmed Ağa
“Bostanîzâde” diye iştihâr etdi. Evlâdına “Bostancıoğulları”dendi.

Sinan Ağa-Hacı Sinânzâde, es-Seyyid, el-Hâc
Amasya eşrâfından el-Hâc Ali Ağa bin el-Hâc Hasan Ağa bin el-Hâc Sinan Ağa’nın
oğludur. İltizâm işlerine girişip hayli servet edindi. Îrân muhârebâtında zehâ’ir-i askeriyye
müte’ahhidi olup 1168’de hâcıyân ba’dehû a’yân meclislerine a’zâ oldu. 1186 sâlinden sonra
vefât etdi. A’yândan hânedân bir kimse idi.

Sinânî Hasan Efendi-eş-Şeyh, el-Hâc
Çorumludur. Mehmed bin Hasan mahdûmu olup ibtidâ tarîkat-ı Sinâniyyeden eş-Şeyh
Mehmed Sâdık Efendi’ye hizmet ederek halîfesi olup “Sinânî Hasan Efendi” demekle iştihâr
etdi. Bakiyye-i tercemesi yukarıda (Cild 8, sahîfe 487) yazıldığından oraya mürâca’at. [457]

Sünbül Ahmed Çelebi-Bozacızâde
Amasyalıdır. Figânî Çelebi’nin “Şehrengiz”inde mezkûr olan yedi güzellerden biridir.
Mavuş gözlü, ince ve uzun boylu olduğundan “Sünbül Ahmed” demekle meşhûr oldu. Tahsîl-i
ilm ü kitâbet ederek Şehzâde Sultân Ahmed’in dîvân kalemi ketebesinden oldu.
Münîrî Efendi’nin Sünbül kasîdesi bunun hakkında olup sesi de kendisi gibi gâyet güzel
olduğundan şehzâdenin bezm-i sohbetine hânendelikle duhûl etdi. Bu sâyede hayli servet
edindi. 918’de Sultân Selîm Hân’ın cülûsuyla Sultân Ahmed’in i’dâmında menkûb olup 931
sâlinden sonra vefât etdi. Yârân-ı safâdan idi.

318
324