Page 580 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

Abdüllatîf Efendi-Kadı Çelebi
Köprülüdür. Amasya’da ikmâl-i tahsîl edib Köprü’de ders-i âm ve müderris-i be-nâm
oldu. Hayli müddet Köprü müftüsü ve kadısı olarak iştihâr edib 1000 hudûdunda vefât etdi.
Ganîoğlu Mehmed Ağa’nın medâr-i istinâdı idi. Meşâhîr-i ulemâdan olup Köprü’de Ganîoğlu
Mahallesi ittisâlinde mahallesi ve çeşmesi vardır. Mahdûmu Mehmed Efendi’dir.

Abdüllatîf Ağa-Taşcıoğlu
Amasyalı Sun’ullâh Ağa oğludur. Yeniçeri olup Rûmeli muhârebelerinde ibrâz-ı liyâkât
ederek Amasya [79] serdârı oldu. Mükerreren azl ü nasb edilerek 1058 sâlinden sonra vefât
etdi. Ünlü yiğitlerden idi.

Abdüllatîf Efendi-Hâcezâde
Amasya fuzalâsından “Küçük Hâce” demekle meşhûr Kadızâde Mehmed Efendi’nin
oğludur. Pederinden ikmâl-i tahsîl ederek ders-i âm, meşhûr Fethiye Câmi-i şerîfe hatîb-i
mebrûr oldu. Pederinin hayâtında tedrîse başlayıp yıllarca neşr-i ulûma himmet etdi.
Ba’dehû sırasıyla Amasya medreselerini müderris olarak devr edib Pervâne Bey Câmii
va’ziyesiyle tekâ’üd edildi. Câmi-’i mezkûrede tefsîr ve hadîsi nakl ü tedrîs ederek 1065 senesi
zilhiccesinde dâr-ı na’îme irtihâl etdi. Kibâr-ı ulemâdan idi.
Kebîr mahdûmu Hâfız Halîl Efendi’ye bu iki cihet tevcîh edilip sağîr mahdûmu Emîr
Abdüllatîf Çelebi de birâderinin vesâyetine verildi. Emîr İmâm Abdüllatîf Efendi, es-Seyyid
Mehmed Efendi, es-Seyyid Adülğanî Paşa da bu Halîl Efendi’nin evlâdından idi. Emîr Hacı
Abdüllatîf Çelebi tercemesi de aşağıda gelir.

Abdüllatîf Efendi-Kurrâzâde
Amasya’da Sultân Bâyezîd Câmii imâmı Şeyhü’l-kurrâ Hâfız Ahmed Efendi’nin oğludur.
Pederinden hıfz-ı Kur’ân ve ulemâdan tahsîl-i ilm ü irfân ederek 1032 zilka’desinde pederinin
irtihâline binâ’en Sultân Bâyezîd imâm-ı sânîsi ve Şehzâde Hâtun dârü’l-kurrâsı şeyhi olduğu
hâlde 1065 zilhiccesi’nin yirmi ikisinde vefât etdi. Ulemâ ve kurrâdan idi. Mahdûmu Hâfız
İbrâhim Efendi imâm oldu. [80]

Abdüllatîf Efendi-Şeyh Hızırzâde
Amasya’da Mahmûd Çelebi zâviyesi şeyhi olan Hızır Efendi İbn eş-Şeyh Muhyiddîn
Mehmed Efendi bin eş-Şeyh Hayreddîn Hızır İcâdî Efendi’nin oğludur. Şeyh Ya’kûbzâde
Mustafa Efendi’nin halka-i tedrîsinde ikmâl-i tahsîl edib ders-i âm ve müderris-i be-nâm olduğu
hâlde 1087’de vefât etdi. Kibâr-ı ulemâdan bir zât idi.

Abdüllatîf Paşa
Merzifonlu Mehmed Ağa oğludur. Sadr-ı esbak Kara Mustafa Paşa’nın ağalarından bir
sipâhî olup efendisinin sadâretinde hidemât-ı mühimmede istihdâm ve katlinde Merzifon’a
i’zâm edildi. 1099’da vâki’ isyânda askeriydi. Mühim hizmetler ederek mîr-i mîrân ve 1100’de
asker sürücüsü olduğu mâliye defterinde görüldü. 1101’de fevtoldu. Erbâb-ı hizmetten idi.

Abdüllatîf Çelebi-Emîr Hacı
Tercemesi yukarıda yazılan Hâcezâde Abdüllatîf Efendi bin Mehmed Efendi’nin oğludur.
Vâlidesi Hazreti Hasan bin Alî Radıyallâhu anhümâ evlâdından olduğu münâsebetle emîr
unvânıyla iştihâr etdi.
Birâderi Hâfız Halîl Efendi’nin vesâyetinde büyüdü. Velî Emîr Mehmed Paşa’ya karâbeti
olduğundan müşârun ileyhin dâ’iresinde terbiye gördü. Paşa’nın sâyesinde hayli nukûd ve
nüfûz kazandı. Ona dâmâd olarak Amasya’da teayyün etdi.

577
579