Page 588 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

Abdünnebî Efendi-İmâdzâde
İskilib meşâyih-i kirâmından İmâdeddîn Ömer el-Kazvîzâde eş-Şeyh Nasrullâh Çelebi
oğludur ve “Yavsî şeyh” demekle meşhûr İskilibî Muhyiddîn Mehmed Efendi’nin
amcazâdesidir. Amasya ulemâsından ikmâl-i tahsîl edib İskilib’e avdet ve tedrîse mülâzemet
etdi.
Şehzâde Sultân Ahmed’in zamân-ı velâyetinde Amasya’ya gelip müşârun ileyhe tekarrüb
edib havâssından oldu. Ancak şehzâdenin ahz ü ihnâkında bir müddet menkûb olup sonra
Yörgüç Paşa müderrisi olduğu hâlde 930 hudûdunda vefât etdi. Kibâr-ı ulemâdan halûk bir zât
idi. Mahdûmu Ca’fer Efendi’dir. [104]

Abdünnebî Ağa-Hacı Nebî
Amasya a’yânından el-Hâc Ahmed Ağa’nın oğludur. Sipâhî olup hayli muhârebâtta
izhâr-ı şecâ’at ederek terakkî edib Sivas vilâyeti cizyedârı mükerreren Amasya kethüdâyeri ve
mütesellimi olup 1045’de Revân Harbi’nde şehîden vefât etdi. Şecî’, sâdık, mu’tedil olup halka
kendini sevdirmişti. Oğulları mîrlivâ-yı Mısır Mustafa Bey ve hâcegân-ı dîvân-ı hümâyûndan
Hüseyin Efendi’dir.

Abdünnebî Efendi-Vâ’iz
Nasûh oğludur. Amasya’da ikmâl-i tahsîl edib ders-i âm ve müderris oldu. Ba’dehû
Fethiye Câmii vâ’izi olarak iştihâr edib 1075 sâline doğru vefât etdi. Âlim, kâmil idi. Bu esnâda
mükerreren Amasya serdârı ve yeniçerilerin zâbiti olan Abdünnebî Ağa da meşhûr olup Nebî
Paşa denir. Bu da 1075 hudûdunda vefât etdi.

Abdünnebî Efendi-İmâm
Osmâncıklıdır. Amasya müftüsü Çorumlu Hâfız es-Seyyid Mehmed Efendi’nin
mücâzlarından olup ders-i âm ve Torumtay [105] Câmiinde imâm oldu. Burada imâmet, va’z ü
tedrîse mülâzemet ederek 1145 senesi recebinde vefât etdi. Ulemâdan ve sulehâdan idi.
Mahdûmu Hâfız Ömer Efendi imâm oldu.

Abdülvâsi’ Çelebi-Nahçıvânîzâde
Tercemesi yukarıda yazılan Mevlânâ Nizâmeddîn Abdülmelik bin Reşîdeddîn Ömer
Nahcivânî mahdûmudur. Ulemâdan ikmâl-i tahsîl ederek ders-i âm, müderris ve 798’de Gümüş
pazarı kadısı görüldü. Ve 804 sâlinden sonra vefât etdi. Âlim ve kudâttan bir zâttır. Mahdûmu
Lûtfullâh Çelebi’dir.

Abdülvâsi’ Çelebi-Muslihîzâde
Meşâhîr-i ulemâ ve kudâttan Abdürrahîm Çelebi bin Mehmed el-Muslihî mahdûmudur.
Bu da ikmâl-i tahsîl ederek müderris-i be-nâm olup kasabâta kadı oldu. 845 sâlinden sonra vefât
etdi.

Abdülvâsi’ Çelebi-Müeyyedzâde
Amasya’da Yâkût Paşa Zâviyesi şeyhi Mevlânâ Şemseddîn Müeyyed Çelebi bin eş-Şeyh
Alâeddîn Alî Yârî mahdûmudur. Ulemâdan ahz-ı ulûm ederek müderris ve kibâr-ı kudâttan
olduğu hâlde 881’de bilâ-veled-i [106] zükûr vefât eyledi. Meşâhîr-i ulemâ ve kudâttan idi.
Kerîmesi Zeyneb Hâtun ve dâmâdı olan birâderzâdesi Şemseddîn Ahmed Efendi de fuzalâdan
idiler.

Abdülvâsi’ Çelebi-Müeyyedzâde
Amasya kadısı Şemseddîn Ahmed Efendi bin Mehmed Efendi bin Müeyyed Çelebi
mahdûmu ve yukarıdaki Abdülvâsi’ Çelebi’nin kerîmezâdesidir. Amasya’da pederinden vesâ’ir

585
587