Page 311 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Süleyman Efendi-Ziyâreli, Müftüzâde, es-Seyyid, eş-Şeyh
Amasya’nın Ziyâre Mahallesi’nden es-Seyyid Osmân Efendi’nin mahdûmudur. Soruklu
el-Hâc Hâfız Ali Efendi’den ikmâl-i tahsîl edib ders-i âm oldu. Bir müddet tedrîs u ifâde ile
iştigâl edib talebesine icâzet verdikten sonra Keçioğlu Câmi-i şerîfi kürsî şeyhi olarak Ziyâre’de
kûşe-i inzivâya çekildi. Orada Abdulbâkî Hicâbî Efendi’nin halka-i zikrine mülâzemet ve va’z
ü tezkîre muvâzebet ederek 1243’de vefât etdi. Sulehâ-yı ulemâdan bir zât idi.

Süleyman Efendi-Boy-âbâdî, el-Hâc
Sinop vilâyeti dâhilinde Boy-âbâd kasabasından [407] Hasan’ın mahdûmudur.
Amasya’da Payaslı el-Hâc Mehmed Efendi’nin halka-i tedrîsinde ikmâl-i tahsîl edib ondan
mücâz olduğu gibi Şeyhzâde es-Seyyid el-Hâc Abdullah Vecîh, Soruklu el-Hâc Hâfız Ali,
Âkifzâde es-Seyyid Abdurrahîm Efendilerden de ulûm-ı âliyyeyi ahz u istifâde ederek ders-i
âm oldu.
Yıllarca tedrîs-i ulûm edib 1229’da müsevvid ü emînü’l-fetevâ, 1232’de medrese-i
Hayriyyeye müderris ve 1241’de yeniçeriliğin ilgâsında hükûmet ricâline müzâharet edib
meclis-i a’yâna a’zâ oldu. 1247’de dâr-ı bekâya irtihâl etdi.
Âlim, ulûm-ı şer’iyye ve akliyyede fâzıl, gâyet fakîh, ulûm-ı Arabiyyede mâhir,
müte’abbid, müteşerri’, bâkiyye-i selef bir zât-ı fezâ’il-simât idi. Yirmi yıl kadar emînü’l-fetvâ
olup mesâ’il-i fıkhiyyede tebahhur etmişdi.

Süleyman Efendi-Servahdîzâde, es-Seyyid, el-Hâc
Amasyalıdır. Ulemâdan el-Hâc Mehmed Emîn Efendi bin el-Hâc Servahdî Mustafa
Efendi’nin mahdûmudur. Bu da Payaslı [408] el-Hâc Mehmed Efendi’den ikmâl-i tahsîl edib
ders-i âm oldu. Müftülerden Ürgüblüzâde el-Hâc Ahmed Necîb Efendi’ye müsevvid ü emînü’l-
fetvâ ve meclis-i a’yâna a’zâ olduğu hâlde 1251’de vefât etdi. Ulemâdan idi.

Süleyman Efendi-Kavaklı, el-Hâc
Samsun vilâyeti dâhilinde kâ’in Kavak nâhiyesinden Mehmed’in mahdûmudur. Bu da
Payaslı el-Hâc Mehmed, Sarı Ahmedzâde el-Hâc Hâfız Mehmed, Çerkeşli el-Hâc Mehmed
Efendilerden ahz-ı ulûm ederek ders-i âm ve müderris-i be-nâm oldu.
Mu’ahharan Tayyâr Mahmûd Paşa Medresesi müderrisi olup yıllarca tedrîs-i ulûma hasr-
ı evkât ederek fevka’l-âde iştihâr edib 1254 hudûdunda vefât etdi. Meşâhîr-i ulemâdan vâ’iz,
müttakî, mütekellim, natûk bir zât idi.

Süleyman Paşa-Cevher Paşazâde, el-Hâc
Merzifonludur. Oranın eşrâfından Ahmed Bey bin el-Hâc Süleyman Bey bin Cevher
Paşa’nın mahdûmudur. Merzifon hânedânından olup 1224’de Rus harbinde [409] hayli
yararlığı ve şecâ’ati görüldüğünden el-Hâc Behrâm Paşa silahdârı, ba’dehû kethüdâsı oldu.
Müşârün-ileyhin ma’iyyetinde devr-i vilâyât edib 1235’de Sivas vâlîliğinde dergâh-ı âlî
kapıcıbaşılığı ile taltîf edildi. 1238’de efendisinin vezâreti ref’ edilerek Sivas’ta ikâmete
me’mûr olduğu esnâda Merzifon’a avdet edib Fîrûz Köyü’ndeki çiftliğinde ikâmet etdi.
1241’de bâ-rütbe-i mîr-i mîrânî sancâklara mutasarrıf olarak devr-i bilâd edib 1264’de
Diyârbekir vâlî kâ’im-makâmı oldu. Bir yıl kadar orada kalıp ma’zûlen İstanbul’a geldi. 1267
senesi cumâdelâhiresinde vefât eyledi. Haydar Paşa’da medfûndur. Mahdûmu Hacı Mehmed
Tevfîk Bey de 1296 muharreminin yirmi altısında vefât edib yanına defn edildi.

Süleyman Paşa-Kayalı Paşazâde
Amasyalıdır. Es-Seyyid el-Hâc Ahmed Bey bin es-Seyyid el-Hâc Süleyman Bey’in
mahdûmu ve es-Seyyid Ömer Kâşif Paşa’nın birâderzâdesidir. Amcasının nezdinde ta’lîm u
terbiyye görüp [410] yeniçeriliğin ilgâsında açılan ilk nizâm ocağına girerek asker oldu.

304
310