Page 601 - 6-8

Amasya Tarihi Cilt: 12
Amasya Tarihi 9-12. Cilt Hüseyin Hüsâmeddîn YASAR

Osmân Çelebi-Emîr Çelebizâde
Amasya sâdât-ı kirâmından es-Seyyid Mustafa Çelebi bin es-Seyyid Osmân Efendi bin
es-Seyyid Mehmed Çelebi mahdûmudur. Meşâhîr-i sâdâttan olup mükerreren Amasya
nakîbü’l-eşrâf kâ’im-makâmı olarak 1062 hudûdunda vefât etdi.
Mahdûmu es-Seyyid Mustafa Efendi ve es-Seyyid Mahmûd Çelebi’dir. Dâmâdı da sudûr-
i ilmiyyeden Hâcezâde Abdullah Efendi ve kızının mahdûmu sudûrdan es-Seyyid Osmân
Efendi’dir.

Osmân Ağa-Sarı
Amasya’nın şimâlinde kâ’in Fîrûz köyünden bir yeniçeridir. Gayet cesûr bir pehlivân
olduğundan Amasya’da yasakçı ve zâbit-i yeniçeriyân oldu. Rûmeli muhârebâtında cesâret ve
şecâ’ati görüldüğünden ocağa alındı. Çorbacılıktan kethüdâ-yeri ve buradan dâhil-i katar olup
1065’de zağarcıbaşı ve 1066 muharreminde [147] kul kethüdâsı oldu.
Bu esnâda Girit’ten gelen yeniçeriler ulûfe talebiyle ağa kapısına hulûl ettikleri esnâda
gösterdiği şiddet üzerine sene-i mezbûre cumâdelûlâsının altıncı günü çıkan fitnede ihtifâ ve
firâr eylediyse de bulunup yok yere i’dâm edildi. Cesûr, zâbit, muhârib idi.

Osmân Ağa-Yörgüç Paşazâde
Amasya ümerâsından Hasan Bey’in oğludur. Sadr-ı esbak Bayrâm Paşa’nın dâ’iresinde
tefeyyüz ederek Eyüp Paşa’nın nişâncılığı zamânında mîrahûr-ı sânî olmuştu. Müşârun ileyhin
Mısır vâlîliğine gittiğinden sonra 1055 cumâdelûlâsında azl edilip yüz elli akçe ile dergâh-ı âlî
kapıcıbaşılığı verildi.
Ba’dehû tahsîlât için Mısır’a gidip 1058’de avdet etdi. Sene-i mezbûre recebinde Sivas
vilâyetine me’mûr ve 1062 senesi muharreminde Amasya mütesellimi oldu. 1063 zilka’desinde
ma’zûl ve 1067 sâlinden sonra merhûm oldu. Erbâb-ı liyâkattan idi. [148]

Osmân Efendi-Sengîlzâde
Amasyalıdır. Diyârbekir deftedârı iken Kemânkeş Alî Paşa tarafından katl edilen
sâbıkü’t-terceme Ahmed Efendi’nin oğludur. Pederinin fevtinde Amasya’ya gelip tahsîl-i
ma’ârife çalıştı. Güzel hatt ü kitâbet öğrenip İstanbul’a gitdi.
Bayrâm Paşa’ya intisâb edib Bâb-ı âlîye girdi. Burada terbiye görüp müşârun ileyhin
sadâretinde hâcegândan olup terakkî ederek 1057’de mevkûfâtî, 1060’da arpa emîni ba’dehû
sadâret tezkerecisi oldu.
1065 recebinde İbşir Paşa’nın sadâretten azl ve katlinde ihtifâ ve Amasya’ya firâr edib
1069’da Amasya’da çıkan bir fitnede Yeniçeriler tarafından katledildi. Kâtib, hattât, hisse-
mend-i ma’ârif bir zât idi.

Osmân Efendi-Nâ’ibzâde
Tokatlıdır. Meşâhîr-i nüvvâb-ı kudâttan ve Mehmed Efendi’nin oğludur. Ulemâdan
tahsîl-i ulûm edib pederi mesleğine girdi. Kasabâta kadı olup [149] 1069 gurre-i muharreminde
Amasya kadısı olan Tokâdî Ahmed Efendi tarafından Amasya nâibi ta’yîn edilerek gönderilmiş
idi.
Ancak gerek kendisi ve gerek sonradan gelen Kadı Ahmed Efendi Abaza Hasan Paşa
tarafdârı Köprülü Mehmed Paşa aleyhinde harekete cür’et ettiklerinden Abaza Hasan’ın ahz ü
i’dâmı üzerine bunlar da Abaza Hasan tarafdârıyla birlikte 1065 senesi cumâdelâhiresinde
i’dâm edildiler.

598
600