Page 126 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

Mahdûmu Ubeydullah Efendi de kudâtdan olup Amasya’da bir câmi-i şerîfi vardır. Bunun
hafîdi es-Seyyid Şükrullah Efendi bin Yahyâ Çelebi bin Mehmed Çelebi bin Ubeydullah Efendi
1011’de muhterık olan bu câmii tecdîden i’mâr etmişdir. Asrımızda Saraçzâde Yaşar Mehmed
Efendi bu zâtın ahfâdından olduğunu iddi’â ederdi.

Ahmed Şemseddîn Çelebi-Küpelioğlu el-Hâc
Amasya ulemâsından İmâdeddîn Ömer Çelebi bin Mecdeddîn Abdulmecîd Çelebi bin
eş-Şeyh Küpeli Mü’eyyed Çelebi ya’nî Ebû İshâk Kazerûnî mahdûmu ve kaz’asker Muhyiddîn
Mehmed Efendi’nin yeğenidir. Amcasından tahsîl ederek müderris ve amcasına tezkireci,
ba’dehû sahn-ı semâniyye müderrisi oldu.
Sultân Bâyezîd-i Sânî cülûsunda Edirne kadısı olup 888’de ma’zûlen İstanbul’a geldi.
889’da Amasya’ya i’zâm edilip 893’de Amasya’da vefât etdi. Meşâhîr-i ulemâdan idi. Bu da
şehzâde Sultân Cem tarafdârlığıyla ithâm edilmişdi. [392]

Ahmed Bey-Devâtdâr Paşazâde
Amasya ümerâsından Burâk Bey bin Mehmed Bey bin Devâtdâr Ahmed Paşa
mahdûmudur. Ceddînin hemşîresi Ehlî Hâtun vakfına mütevellî oldu. Züamâdan iken meşâhîr-
i ümerâdan olup Mısır harbine me’mûren gitdi. 893’de vefât etdi. Birâderi Ali Bey de ümerâdan
idi.

Ahmed Şemseddîn Çelebi-İmâmzâde
Amasya’nın İçerişehir’inde Câmi-i enderûn imâmı Mahmûd Çelebi bin Mehmed
mahdûmudur. Merzifon Sultâniyyesi müderrisi olan Seydî Ahmed Kırımî, Amasya’da Mevlânâ
Ahmed Cündî ve Tokâdîzâde Cemâleddîn Yûsuf Çelebilerden ikmâl ederek ders-i âm oldu.
Ba’dehû Halvetiyye şeyhi Pîr Bahâ’eddîn Mehmed Çelebi’ye intisâb ederek tasfiyye-i
bâtın edib sûfiyye mesleğine girdi. Terk-i tedrîs ederek Gümüşlüzâde Pîr Hayreddîn Hızır
Çelebi sohbetinde tefeyyüz etdi. Bu esnâda İçerişehir’de Mahmûd Çelebi Zâviyesi şeyhi olup
894’de vefât etdi. Fâzıl, vâ’iz, mazınne-i kerâmet, ta’bîr-i menâmda [393] yegâne-i rûzgâr idi.
“Çelebi Halîfe” demekle meşhûr Pîr Cemâleddîn Mehmed Çelebi bu zâtı âsârında çok senâ
etmişdi.

Ahmed Ağa-Karaca Dizdâr
Fâtih Sultân Mehmed Hân’ın bende-gânından olup cülûsunda i’tâk ederek 860’da
Sultân Bâyezîd-i Sânî ma’iyyetine me’mûren Amasya’ya geldi. Azabân ağalığından kal’a-yı
bâlâ dizdârı olup yıllarca Amasya Kalesi muhâfızı olarak kaldı. 890’da kal’a-yı bâlâda Bey
Câmii civârında bir medrese binâ edib “Dizdâriyye Medresesi” dendi. 895 hudûdunda vefât
etdi. Mahdûmları ulemâdan Muhyiddîn Mehmed Çelebi ile beylerbeylerinden Mustafa
Paşa’dır. Bunlara “Karacazâdeler” dendi. Mustafa Paşa, medresenin evkâfını tanzîm ve tevsi’
etmişdir. Buna “Karagöz” de denmişdir.

Ahmed Bey-Kubâdzâde
Lâdiklidir. Simre-i Lâdik emîri Alâeddîn Keykubad bin Sultân Tâceddîn Altunbaş Gâzi
Çelebi evlâdından Âdil Bey bin Cüneyd Bey bin Ali Bey’in mahdûmudur. Pederinin [394]
vakfına mütevellî ve meşâhîr-i ümerâdan olduğu hâlde 900 hudûdunda vefât etdi. Birâderleri
Hüseyin, Mahmûd Beylerdir.

Ahmed Paşa-Hacı Hamza Beyzâde
Amasyalıdır. Devâtdâr Ahmed Paşa evlâdından olup Amasya’da mescid-i şerîfi ve
mahallesi olan el-Hâc Hamza Bey bin Ahmed Bey’in mahdûmudur. Amasya’da tahsîl-i ma’ârif
edib Sultân Bâyezîd-i Sânî’ye intisâb etdi.

121
125