Page 427 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

süknâsına vakfetdiler. O zaman câmii mezkûr imâmı Saatçi Mehmed Çelebi idi. Bu hâne hayli
müddet Saatçizâdelerin tasarrufunda kaldı.

Bünyâd Ağa-Deli Yûsuf Ağazâde el-Hâc [543]
Amasya a’yânından ve sipâhî meşâhîrinden el-Hâc Deli Yûsuf Ağa’nın mahdûmudur. Bu
da sipâhî olup hayli muhârebâta gitdi. 1079’da Kandiye muhârebesine gidip fedâkârâne çalışdı.
1086’da sipâhîler kethüdâsı görüldü. Ba’dehû vefât etdi. A’yândan hânedân bir kimse idi.
Bünyâd Efendi-Saatçizâde
Ahî Receb Câmii imâmı Saatçi Mehmed Çelebi mahdûmudur. Ulûm-i şer’iyyeyi tahsîl
etdikten sonra pederinin vefâtında câmii mezkûra imâm ve ders-i âm olup 1127’de vefât etdi.
Âlim, vâ’iz bir imâm idi. Mahdûmu el-Hâc Hasan Efendi ve birâderi de el-Hâc Hasan
Efendi’dir.
Budak Bey-Devâtdâr Paşazâde
Amasyalıdır. Amasya Beylerbeyi Devâtdâr Ahmed Paşa bin el-Hâc Şâdgeldi Paşa
evlâdından el-Hâc Ahmed Bey bin Hüseyin Bey’in mahdûmudur. Züamâdan olup Şehzâde
Sultân Mustafa kurenâsından iken 960’da müşârün-ileyhin şehâdetinde mîrlivâlıkla kayrıldı.
978 sâlinden sonra vefât etdi. Mahdûmları Hüseyin Paşa, Ulûc Bey’dir. [544] Ulûc Beyzâde
Hüseyin Paşa da beylerbeyilerdendir.

Burak Bey-Emîr Bedreddîn
Amasyalıdır. Konya Harbi’nde maktûl olan Emîr-i kebîr Şihâbeddîn Ahmed Şâh bin el-
Hâc Musliheddîn Kutlu Şâh bin Emîr Bahâeddîn Kürt Bey’in mahdûmudur. Buna Şâh Burak
Bey ve Bayraklı Gâzi denir.
Amcası Amasya hükümdârı el-Hâc Şâdgeldi Paşa’nın zaman-ı hükûmetinde bir müddet
Canik emîri oldu. Ba’dehû Amasya muhâfızı olup amcasına sâdıkâne hizmet ederek 783’de
amcasıyla beraber mağdûren Kadı Burhâneddîn elinde maktûl oldu. Mahdûmu Şâdî Bey’dir.

Burak Çelebi-Ahî Şeyh
Gümüş kasabasında zâviyesi olan meşâyih-i kirâmdan Ahî İbrâhim Basrî hulefâsından
olup 787 hudûdunda şeyh ve üstâdının irtihâlinde yerine geçip zâviyesi şeyhi oldu. Hüsn-i hâli
ve ilm ve salâhı ile iştihâr edib 800 hudûdunda vefât etdi. Gümüş kasabasının kutbu sayılırdı.
Kasaba civârında mülkü olan bir kaç mezra’asını bu zâviyeye vakfetdi. [545]

Burak Bey-Devâtdâr Paşazâde
Amasya Beylerbeyi Devâtdâr Ahmed Paşa bin el-Hâc Şâdgeldi Paşa bin el-Hâc Kutlu
Şâh mahdûmudur. Büyük birâderi İkinci Şâdgeldi Bey’in emâretinde Çelebi Sultân Mehmed
Hân’a sadâkat ve müşârün-ileyhi Amasya hükûmetine da’vet eylediğinden memdûhiyyet
kazandı.
Çelebi Sultân Mehmed devrinde kibâr-ı ümerâdan olup 821’de vefât etdi. Geldiklan’da
câmii, Amasya’da ceddînin câmii olan Sarâchâne Câmii civârında mektebi vardır. Emlâkini bu
hayrâtının mesâlihine 816’da vakf etdi. Mahdûmları Velî, Hasan, Şâdî Beylerdir. Dâmâdı da
Eretnazâde İbrâhim Bey bin Abdullah Bey’dir.

Burak Bey-Küçük Çeribâşı
Amasyalıdır. Bebekzâde demekle meşhûr olup Mehmed Bey bin Devâtdâr Ahmed
Paşa’nın mahdûmudur. Pederi Fâtîh Sultân Mehmed Hân’ın şehzâdeliğinde havâss-ı
ümerâsından olup kendisi de müşârün-ileyhin cülûsunda kibâr-ı ümerâdan oldu. İstanbul
fethinde yararlıklar gösterdi. 861’de Sırblar Harbi’nde [546] şehîden vefât etdi.
Vâlidesinin pederi olan Büyük Çeribaşı Emînüddîn Mehmed Çelebi’nin yaptırdığı Çeri-
bâşı câmii şerîfi mesâlihine emlâkinden bir kısmını vakf etdi. Kerîmesi Şâhrûze Hâtun Halkalı

426