Page 429 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

tedrîs-i ulûm edib Torumtay Medresesi müderrisi, ba’dehû Amasya müftüsü olduğu hâlde 764
senesi hudûdunda dâr-ı bekâya rihlet etdi. Fazıl, ulûm-i şer’iyye ve akliyyede mütebahhir,
meşâhîr-i fukahâ ve mütekellimînden bir zât idi. Tilmîzi Mevlânâ İzzeddîn Mehmed bin
Mehmed el-Amâsî de fuzalâdan idi.

Bahâeddîn Mehmed Çelebi-Doğanzâde
Amasyalıdır. Amasya vâlisi Emîr Şihâbeddîn Şâdî Bey’in kölesi olup meşâhîr-i ulemâdan
olan Mevlânâ Bedreddîn Doğan mahdûmudur. Amasya fuzalâsından ikmâl-i tahsîl edib [549]
ders-i âm oldu. Bir müddet tedrîs-i ulûmdan sonra Atabeg Gâzi müderrisi, bir aralık Amasya
kâdı’l-kudâtı İmâdzâde Müeyyededdîn Mehmed Çelebi nâibi oldu. 803 hudûdunda vefât etdi.
Meşâhîr-i ulemâ ve müderrisînden idi. Birâderi Şemseddîn Ahmed Çelebi de ulemâdandır.

Bahâeddîn Mehmed Çelebi-Mevlânâ Çelebi
Haleblidir. Ömer bin Mehmed mahdûmu olup Arab Çelebi demekle meşhûrdur. Bilâd-ı
Arab’da tahsîl-i ulûm etdikten sonra Merzifon’a gelip ikâmet ve tedrîs-i ulûma himmet etdi.
İlm ü salâhıyla iştihâr edib Sultâniyye-i Merzifon müderrisi, ba’dehû Merzifon kadısı olduğu
hâlde 863 hudûdunda vefât etdi. Fakîh, kâmil, afîf idi. Mahdûmu Abdurrahmân Çelebi ve hafîdi
mevâlîden Derviş Mehmed Çelebi’dir.

Bahâeddîn Ömer Çelebi-Şehinşâhî
Amasyalıdır. Amasya hükümdârı Hacı Şâdgeldi Pâdişâh vüzerâsından emîr-i kebîr
Sirâceddîn Mehmed Çelebi bin emîr-i kebîr Şerefeddîn Doğan Şâh bin emîr-i kebîr Kürt Bey’in
mahdûmu ve hükümdâr-ı müşârün-ileyhin amcazâdesinin oğludur. [550]
Amasya’da tahsîl-i ulûm edib 783’de Amasya hükümdârı Devâtdâr Fahreddîn Ahmed
Çelebi’ye kâtib ve müsteşâr oldu. Müşârün-ileyhin Beylerbeyliğinde kâtib-i dîvânı olup 795
sâline kadar hizmetinde devam etdi. Ba’dehû Amasya emîr-i kebîri olan Musliheddîn Mustafa
Bey’e de kâtib-i dîvân oldu.
801 senesi şevvâlinde Çelebi Sultân Mehmed Hân Amasya vâlisi olarak geldikde bunun
da hizmet-i kitâbetini îfâ edib ikbâlini te’min etdi. 804’de Timurlenk’in fermânıyla Amasya
emîr-i kebîri olan İkinci Şâdgeldi Bey’e karşı Çelebi Sultân Mehmed Hân’ı Bolu’dan da’vet
edenlere iltihâk etdi.
805’de Çelebi Sultân Mehmed’in Amasya’yı teşrifinde i’lân-ı saltanât etmekle mevki’-i
dîvân-ı âlî olduğu hâlde 810 sâline doğru irtihâl etdi. Çelebi Sultân’ın ricâlinden bir merd-i âlim
ve kâmil idi. Mahdûmu Şehinşâh Çelebi de Çelebi Sultân’ın hurrâsından oldu. Bunun mahdûmu
Mevlânâ Şemseddîn Mehmed Çelebi ulemâdan olup Muzafferüddîn Tebrîzî tilmîzidir.

Bahâeddîn Mehmed Halvetî-Erzincânîzâde eş- Şeyh
Amasya fuzalâsından Mevlânâ İmadüddîn Abdülmelik bin Mevlânâ [551] Şemseddîn
Mehmed Bahşâyiş bin eş-Şeyh Celâleddîn Abdurrahmân Erzincânî mahdûmudur. Saraclar
şeyhi Mevlânâ Pîr Sun’ullâh Halvetî hazretlerinin hizmet-i şerîfesinde tahsîl-i ulûm-i şer’iyye
ve tekmîl-i me’ârif-i sûfiyye etdi.
Pîr-i müşârün-ileyhin irtihâlinde Kal’a-i Bâlâ halkının ricâsıyla oraya gidip ikâmet ederek
Alî Bey Câmii kürsî şeyhi oldu. Ba’zı ümerânın câmii şerîf ittisâlinde yaptırdığı zâviyenin de
şeyhi olup neşr-i envâr-ı ilm ü tarîkat ederek 879’da dâr-ı kudse irtihâl etdi.
Âlim, ârif-i billâh, müttakî, vâ’iz bir şeyh-i zâhid idi. Tekkesinde medfûndur. Mahdûmu
eş-Şeyh Lütfullâh Çelebi ve hafîdi eş-Şeyh Muhyiddîn Mehmed Efendi’dir. Kal’ada ikâmet
etdiği mevki’e Şeyh Mahallesi ve Tekkesine de Bahâ’iyye Tekkesi dendi.
Diğer mahdûmu eş-Şeyh Hüsameddîn Hasan Efendi olup kibâr-ı meşâyihden idi. Bunun
mahdûmları Muhyiddîn Mehmed, Şemseddîn Ahmed Çelebiler 918’de Şehzâde Sultân

428