Page 431 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

Bahâeddîn Mehmed Efendi-Fârfârîzâde es-Seyyid
Amasyalıdır. Amasya fuzalâsından Fârfârî demekle meşhûr Hakâlalı es-Seyyid
Muhyiddîn Mehmed Çelebizâde es-Seyyid Derviş Mehmed Çelebi mahdûmu olup Lâdik’de
medfûn olan [553] sâhibü’l-hâl es-Seyyid Ahmed-i Kebîrü’r-Rifâ’î evlâd-ı kirâmındandır.
Amasya fuzalâsından ikmâl-i tahsîl edib ders-i âm, Hakâla’da Kâsım Bey Medresesi
müderrisi oldu. Ba’dehû Amasya’da Hüseyin Ağa ve ba’dehû Kameriyye-i Tokat müderrisi
olarak ulemâ arasında temâyüz etdi. Sonra meslek-i kudâta girip Kayseriyye mollası 1033
senesi gurre-i muharreminde Amasya kadısı oldu.
1034 senesi gurre-i muharreminde ma’zûl olup Amasya’da ikâmet etdi. 1035 senesi
gurre-i saferinde sâniyen Amasya kadısı olup 1036 senesi muharremi gâyesinde müddet-i
örfiyyesi hitâma erdiğinden İstanbul’a gitdi. 1037 senesi şevvâlinde Tokat kadısı oldu.
1038 senesi şevvâlinde ma’zûlen Amasya’ya gelip 1040’da vefât etdi. Âlim, sâlih,
mu’tedil, hattı güzel bir seyyid-i zî-şân idi. Mahdûmları es-Seyyid Abdüsselâm, es-Seyyid
Abdülkerîm, es-Seyyid Abdurrahmân Efendilerdir. Bunlar da meşâhîr-i kudâttan idiler.

Bahâeddîn Mehmed Efendi-Şeyhzâde eş-Şeyh
Amasyalıdır. Ya’kûb Paşa zâviyesi şeyhi ve mütevellîsi [554] eş-Şeyh İzzeddîn Hasan
Efendi bin Ahmed Çelebi bin eş-Şeyh Abdurrahmân Efendi’nin mahdûmudur. Fâzıl-ı meşhûr
Kadızâde Küçük Mehmed Efendi’nin halka-i tedrîsine mülâzemetle ikmâl-i tahsîl edib ders-i
âm oldu.
Ba’dehû Ayas Ağa müderrisi ve Abdî Efendi’den sonra Ya’kûb Paşa vakfı mütevellîsi ve
câmii vâ’izi ba’dehû Çilehâne şeyhi oldu. 1056’da Tekkeyi medreseye tahvîl ederek müderris
olup Ya’kûb Paşa Câmi-i şerîfinde hem tedrîs ü ifâde hem de zikr ü tezkîre mülâzemet ve 1073
sâline doğru dâr-ı bekâya rihlet etdi.
Meşâhîr-i ulemâ ve meşâyihden kâmil, zâhid, Halvetî-meşreb, müttakî bir zât idi. Mahdûmu
el-Hâc İbrâhim Efendi ve hafîdi es-Seyyid eş-Şeyh Mehmed Efendi ve birâderi Kutbeddîn Mustafa
Efendi ulemâ ve meşâyıhdan idiler.

Bahâeddîn Mehmed Efendi-Şeyh Alizâde
Amasyalıdır. Kibâr-ı evliyâdan eş-Şeyh Habîb Karamânî Hazretlerinin evlâd-ı
kirâmından Mehmed Paşa Tekkesi şeyhi Ömer Efendi bin eş-Şeyh Alî Efendi’nin
mahdûmudur. Ulemâdan tahsîl-i ulûm [555] edib 1138’de pederinin irtihâli üzerine büyük
birâderi eş-Şeyh Alî Efendi ile Mehmed Paşa Tekkesi şeyhi ve İbrâhim Efendi’nin fevtinde
Mehmed Paşa Câmii vâ’izi oldu.
1154’de birâderinin vefâtıyla müstakillen zâviye şeyhi olduğu hâlde 1168’de vefât etdi.
Ulemâdan vâ’iz, takrîr ve ifâdesi vâzıh, sâlih bir zât idi. Hüsn-i hâli, ulemâ-yı asrına kendisini
sevdirmişdi.

Bahâeddîn Mehmed Efendi-Mar’aşîzâde
Amasya nâibi olup Amasya ulemâsından Mar’aşî Mahmûd Efendizâde Halîl Fevzî
Efendi’nin mahdûmudur. Ulemâdan tahsîl-i ulûm edib müderris, nâib-i kudât ve kadı oldu.
1265 sâlinden sonra vefât etdi. Mahdûmu Kemaleddîn Ahmed Efendi de ulemâ ve şu’âradandır.

Bahâeddîn Mehmed Efendi-Şeyh Ârif Efendizâde
Acem Alî Mahallesi’nde Şehir kethüdâsızâde eş-Şeyh Mehmed Ârif Efendi Tekkesi şeyhi
ve mahdûmu eş-Şeyh Kâmil Ahmed Efendi’nin ikinci mahdûmudur. Birâderi eş-Şeyh
Ziyâeddîn Yûsuf Efendi’nin 1313’de Mekke-i Mükerreme’de irtihâli üzerine mezkûr Tekke
şeyhi [556] oldu. 1321 sâlinden sonra vefât etdi. Âlim değilse de Nakşibendiyye tarîkinin âyîn
ve adâbına vâkıf, hüsn-i hâl ile ma’rûf idi.

430