Page 449 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

Amasya fuzalâsından el-Hâc Ziyâeddîn Yûsuf Çelebi bin İmâdeddîn Abdülmelik Çelebi
bin Mevlânâ Bahşâyiş Çelebi mahdûmudur. Buna Bahşâyişoğlu denir. Pederinden ve İbrîzâde
Mevlânâ Muhyiddîn Mehmed Çelebi’den ikmâl-i tahsîl edib müderris, kadı, Amasya nâibi olup
914 hudûdunda vefât etdi. Meşâhîr-i ulemâ ve kibâr-ı kudâttan idi.

Pîr Mehmed Çelebi-İmâdzâde
Amasya kadısı ve İçerişehir’de zâviye bânîsi el-Hâc Bedreddîn Mahmûd Çelebi bin
kâdı’l-kudât Mü’eyyideddîn Mehmed [613] Çelebi bin İmâdeddîn Ömer Çelebi bin Şemseddîn
Mehmed Çelebi bin Necîbeddîn Mûsâ el-Hallâtî mahdûmudur. Ba’de’t-tahsîl Amasya
mahkemesi kâtibi, ba’dehû Kedağra kadısı oldu. Ba’de’l-azl 814 senesi rebiülevvelinde vefât
etdi.
Âlim, kâtib, münşî idi. Pederi yanında Kadılar Türbesi’nde medfûndur. Seng-i mezârında
şu ibâre mahkûkdur: Hâzâ kabrü’l-merhûm Pîr Mehmed bin el-Hâc Mahmûd el-kâdî
Tayyeba’llâhü mesvâhü intekale’l-mağfûr fî rebî’i’l-evvel senete erba’ate aşr ve semâni
mi’e. 201

Pîr Mehmed Çelebi-Mevlânâ Muhyiddîn
Amasyalıdır. Zileli Hâce Hasan Çelebi mahdûmu olduğu münâsebetle Zilelioğlu demekle
meşhûrdur. Fuzalâdan Saru Şeyh Şemseddîn Ahmed Çelebi’den tahsîl-i ulûm edib müderris-i
be-nâm oldu. 837 hudûdunda vefât etdi. Ulemâdan idi.

Pîr Mehmed Çelebi-Mevlânâ Mecdeddîn
Amasya’nın fuzalâ-yı meşâyihînden Divriğilizâde Yârî Alî Çelebi bin Mevlânâ
Zeyneddîn Siyâvuş Çelebi bin eş-Şeyh Evrân bin Doğân mahdûmu ve meşhûr Mü’eyyed Çelebi
birâderidir. [614]
Mevlânâ Şükrullâh Çelebi’nin ammizâdesi olup Amasya’da doğdu. Mukaddimât-ı ulûmu
Amasya’da görüp sonra Bursa’ya gitdi. Orada Mevlânâ Şemseddîn Mehmed Fenârî ve Mevlânâ
Mehmed Yegân Çelebi gibi iki ulemâdan ikmâl-i tahsîl edib Bursa’da Murâdiye ve Edirne’de
Üç Şerefeli Medreseleri’ne müderris, ba’dehû Edirne kadısı oldu.
861’de Edirne kadısı bulunup imzâsı görüldü. Ba’dehû vefât etdi. Meşâhîr-i fuzalâdan bir
zât idi. Mahdûmu Mevlânâ Alâeddîn Alî Çelebi de ulemâdan olup devr-i Fâtîh ricâlinden idi.

Pîr Mehmed Çelebi-Mevlânâ Muhyiddîn
Amasyalıdır. Hâfız Balaban mahdûmudur. Balabanoğlu demekle meşhûrdur. Mevlânâ
Hüsameddîn Tokâdî’den tahsîl-i ulûm edib ders-i âm ve Amasya’da yıllarca tedrîs-i ulûm
ederek kibâr-ı müderrisînden oldu. 882 sâlinden sonra vefât etdi. Meşâhîr-i ulemâdandır.

Pîr Mehmed Çelebi, Hoca Rüstemoğlu
Amasya a’yânından ve meşâhîr-i tüccârdan Hoca Mahmûd Çelebi bin [615] Hoca Rüstem
Çelebi oğludur. Bu da meşâhîr-i hâcegândan, ya’nî tüccâr ve a’yân-ı ağniyâdan olup Sultân
Bâyezîd-i Sânî cülûsunda İstanbul’a gitdi. Orada ümenâdan ve Hâcegân-ı dîvân-ı hümâyûndan
olup 900 sâlinden sonra vefât etdi. Birâderi Amasya’da mahallesi olan Uzun Mustafa
Çelebi’dir.

Pîr Mehmed Çelebi-Pîr Sun’ullâhzâde
Amasyalıdır. Meşâhîr-i kudâttan Mevlânâ Abdüsselâm Çelebi bin Pîr Sun’ullâh Halvetî
mahdûmûdur. Tahsîl-i ulûm ve iktisâb-ı me’ârif etdi. Ba’dehû müderris, kadı olup 915 sâlinden

201 Bu mezar, Hacı Kadı Mahmûd’un oğlu merhûm Pîr Mehmed’e aittir; Allah onun makâmını hoş eylesin,
affeylesin; 814 senesinin rebîülevvelinde vefât etdi. (Haz.)

448