Page 452 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

olduğu hâlde 928 sâline doğru vefât etdi. Hüsn-i hâl ü ma’rifet [622] erbâbından bir şeyh-i
tarîkat idi. Mahdûmları Hasan Mustafa Çelebilere çiftlik intikâl etdi.

Pîr Velî Bey-Hâbilzâde
Amasya a’yânından sâbıku’t-terceme el-Hâc İlyâs Çelebi mahdûmudur. Züamâdan olup
hayli muhârebelere iştirâk etdi. 917’de Serdâr Alî Paşa-yı şehîdin ma’iyyetinde eşkiyâ-i
Celâliyye muhârebesinde şehîden vefât etdi. Mahdûmu Şa’bân Bey olup hafîdi Receb
Çelebi’dir.

Pîr Velî Çelebi-Seydî Alîzâde
Amasya a’yânından İskender Çelebi bin Hızır Çelebi bin Hâbilzâde Seydî Alî Çelebi bin
el-Hâc İlyâs Çelebi mahdûmûdur. Amasya a’yânından olup 1031 sâlinden sonra vefât etdi.
Pîrî Çelebi-Mevlânâ Şemseddîn
Amasya a’yânından Kaya Paşazâde Dursun Çelebi mahdûmudur. Torumtay evlâd-ı
kirâmından olup ba’de’t-tahsîl ders-i âm, ceddi medresesine müderris ve vakfına mütevellî
olarak iştihâr etdi.
Erbâb-ı servet ü yesârdan olduğu münâsebetle Kapı Ağası Fîrûz Ağa’nın hayrâtı
mesâlihine vakf edileceği ricâsı üzerine 888’de Sonisa, Kedağra, Lâdik ve Amasya kazâlarında
kâin dört kıt’a çiftliklerini Fîrûz Ağa’ya bey’ ve o da vakf ederek mukâbilinde Amasya nâibi
oldu.
Ba’dehû silk-i kudâta girip Cânik ve Tokat sancâklarına kadı oldu. 907 hudûdunda
ma’zûlen vefât etdi. Meşâhîr-i ulemâ ve kudâttan asîl, müstakîm bir zât idi. Mahdûmu Mehmed
Çelebi’dir. Diğer Pîrî Çelebi bin Şeyh Mehmed Çelebi de a’yândan olup 848 sâlinden sonra
vefât etdi.

Pîrî Çelebi-Himmetoğlu el-Hâc
Amasya a’yânından ve ümerâdan Himmet Bey’in mahdûmudur. Meşhûr Amasya
mütesellimi Osmân Ağa’nın birâderi olup mükerreren Amasya’nın şehir kethüdâsı oldu.
Eşkiyâ-yı Celâliyyenin def’inde devlet-i Osmâniye tarafdârı olarak çalışdığından Hüseyin ve
Fîrûz Ağaların evkâfına mütevellî ba’dehû Canik muhassılı oldu. 1038 hudûdunda vefât etdi.

Pîrî Bey-İshâk Paşazâde
Sadr-ı a’zam Amasyalı İshâk Paşa bin İbrâhim Bey’in birinci mahdûmudur. Pederinin
nezdinde tahsîl ve terbiye gördü. Sultân Fâtîh devrinde hazîne-i âmire küttâbından olup tedrîcen
terakkî ederek muhâsebeci, Anadolu defterdârı oldu.
Pederinin irtihâlinden sonra Şehzâde Sultân Ahmed defterdârı olarak Amasya’ya
gönderildi. Hayli müddet de şehzâde nezdinde kalıp 916’da vefât etdi. Küremâdan muhâsib,
ehl-i kalem idi. [624]

Pîrî Bey-Deli Pervâneoğlu el-Hâc
Amasya’nın Hâtuniye Mahallesi’nden Mehmed Bey bin Hızır Bey bin Deli Pervâne
Bey’in mahdûmudur. A’yân-ı züamâdan olup eşkiyâ-yı Celâliyye ve Abaza Mehmed Paşa’nın
vekâyi-i harbiyesinde hüsn-i hizmet etdiğinden mîrlivâ olup 1046 sâlinden sonra vefât etdi.
Diğer züamâdan Pîrî Bey bin Celeb Mehmed Ağa da Abaza Hasan Paşa’nın isyânına
karışdığından 1069 senesi cumâdelâhiresinde i’dâm ve emlâk ve emvâli müsâdere edildi.

Pîrî Ağa-Pîrîzâde
Merzifon a’yânından Mehmed Ağa bin Hacı Pîrî Ağa’nın oğludur. Yeniçeri olup yasakçı
ve 1063’de Amasya serdârı oldu. 1064’de Köprülü Mehmed Paşa’nın dâ’iresine girip İstanbul’a
gitdi.

451