Page 483 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

Emîr-i müşârün-ileyhin mahdûmları Ca’fer, Sa’dî, Ahmed, İsmâ’îl Çelebilerdir. Ca’fer
Çelebi Anadolu kazaskeri iken 921’de maktûlen vefât etdi. Sa’dî Çelebi Sahn müderrisi iken
923’de dâr-ı bekâya irtihâl eyledi. Ahmed Bey pederiyle beraber gidip Kefe’de kaldı. İsmâ’îl
Bey ve evlâdı Amasya’da kalıp vakfa mütevellî oldu.
Müşârün-ileyh “Tâcî” mahlasıyla meşâhîr-i şu’arâdan olup[19] âsâr-ı şi’riyyesi vardır.
Mecmaü’n-Nezâ’ir’de görülen müntehâb parçaları şunlardır:

Göz yaşlı gönül zülf-i perîşânlar içinde
Kaldım karanu gecede bârânlar içinde

Bir kasîdesinin matla’ı:
Tâna tutdu hatt leb-i la’l-i dür-efşânı dürüst
Kıldı yagma leşker-i gam milket-i cânı dürüst

Bu da onundur:
N’ola ruh-ı zîbâna kalursam nazar ey dost
Âyînedürür ana nazardan ne zar ey dost

Bu da;
Hûblukda mâh iderken şems-i tâbân ile bahs
Cânı yokdur kim ide ol hüsn-i cânân ile bahs

Bu da;
Sûz-i dilimle söyledigim âşıkânedür
Benzer zebânım âteş-i aşka zebânedür

Bu da;
Ehl-i diller yüzüne cennet-i a’lâ didiler
Sâye-i kaddine hem sâye-i tûbâ didiler [20]

Bu da onundur:
Gülşende sabânın yine müşkîn nefesi var
Yârin ser-i kûyuna meger dest-resi var

Tâceddîn Mahmûd Çelebi-Âşık Paşazâde
Amasyalıdır. Âşık Paşa’nın evlâd-ı kirâmından Nefîseddîn İbrâhim Çelebi bin
Kemâleddîn Ahmed Çelebi bin Mes’ûd bin Abdurrahmân Çelebi bin eş-Şeyh Elvân Çelebi bin
eş-Şeyh Alâaddîn Alî Âşık Paşa bin Muhlis Paşa bin Baba İlyâs-ı Horasânî mahdûmudur.
Amasya’da “Nefisoğlu” demekle meşhûrdur.
Ulemâdan tahsîl-i ulûm edib Amasya’da eş-Şeyh Habîb-i Karamânî Hazretleri’nin
sohbet-i aliyyesinde tefeyyüz ederek ondan hilâfet aldı. Ba’dehû Ya’kûb Paşa tekkesi şeyhi
olup Gümüşlüzâde eş-Şeyh Muhyiddîn Efendi’nin gaybûbetinde fevka’l-âde iştihâr etdi.
924’de ba’zı husûsât-ı siyâsiyyenin istifsârı için İstanbul’a gidip Sultân Selîm Han-ı
Evvel’in irtihâlinde avdet ve 932 sâlinden sonra dâr-ı kudse rihlet etdi. Meşâhîr-i meşâyîhden
âlim, sâlih, âşık-meşreb [21] bir zât idi. Tasavvufdan “Risâle-i Tâciyye” adlı bir eseri vardır.
Mahdûmları Mehmed, Muhibbî, Fethullâh Ârif, Hamdullâh Hamdî Çelebiler ve birâderi
Mahremî Mehmed Çelebi şu’arâdandır.

Tâceddîn İbrâhim Efendi-Kadı Çelebi
Amasyalıdır. Alaca Beyzâde Ya’kûb Çelebi bin Yahyâ Bey bin Ya’kûb Çelebi bin Şâdî
Bey bin Devâtdâr Ahmed Paşa bin Hacı Şâdgeldi Paşa’nın mahdûmudur.

477
482