Page 567 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

dâr-ı kudse irtihâl etdi. Âlim, kâmil, fakîh, gâyet müteşerri’, zâhid, mübârek-sîmâ bir şeyh-i
fâzıl idi. Mahdûmu Mehmed Çelebi’dir.

Habîb Efendi-Habîbzâde
Amasyalıdır. Yukarıda tercemesi yazılan eş-Şeyh Habîb-i Karamânîzâde Şemseddîn
Ahmed Efendi’nin mahdûmudur. Amasya ulemâsından tahsîl-i ulûm edib ders-i âm oldu.
Tedrîs-i ulûm etdiği esnâda medâris-i mu’tâdeyi devr ederek Hâtuniyye-i Tokat
müderrisi, buradan Sivas, [292] ba’dehû Trabzon kâdısı ve 966’da Amasya’da Mehmed Paşa
medresesiyle mütekâ’id olup 968 hudûdunda vefât etdi. Kibâr-ı ulemâ ve kudâttan idi. Birâderi
Abdulbâkî Efendi’dir.

Habîb Çelebi-Aydınzâde
Amasyalıdır. Emîr Buhârî zâviyesi şeyhi Amasyalı eş-Şeyh Mahmûd Çelebi
akrabâsından Aydın Bey bin Alî Bey’in mahdûmudur. İstanbul’da hattât-ı meşhûr Hamdullâh
Amasîzâde Mustafa Dede’den hutût-ı mütenevvi’ayı ahz edib dîvân-ı hümâyûna kâtib oldu.
971 sâline doğru vefât etdi. Mahmûd Çelebi’den münîb, hattât idi.

Habîb Ağa-Şeyhî Beyzâde
Amasyalıdır. Aydın Beyzâdelerden ve Amasya a’yânından mîrlivâ Şeyhî Mehmed Bey’in
mahdûmudur. 1027’de vefât eden çavuşândan Mehmed Ağa’nın Yıkılgan karyesindeki 5500
akçalık tîmârı uhdesine tevcîh edilerek sipâhîlerden oldu.
Ba’dehû muhârebâtta isbât-ı liyâkat ederek Amasya [293] kethüdâyeri 1053’de Sivas
mütesellimi 1055’de Tokat voyvodası ve Amasya beytü’l-mâl emîni olup 1056’da Girid
harbine me’mûr oldu.
1057’de Girid muhârebelerinde fevka’l-âde yararlıklar ibrâz ederek sipâhîler ağası oldu.
1058’de İstinye’yi harben zabt u fethe me’mûr olup mükerreren hücûm ederek 1059 senesi
evâ’ilinde kal’ayı feth ve cebren duhûl etdiği esnâda şehîden vefât etdi.
Gâyet şecî’, cündîlikde mâhir, dîndâr bir zât idi. Mahdûmları Alî, Hasan, Hüseyin
Beylerdir. Hüseyin Bey 1081’de İstanbul civârında Kasım Paşa’da mukîm ümerâ-yı deryâdan
idi.

Habîb Efendi-Vâsi’ Çelebizâde
Amasyalıdır. A’yândan Mü’eyyedzâde Abdulvâsi’ Çelebi bin Habîb Çelebi bin Pîrî
Ahmed Efendi’nin mahdûmudur. Hâcezâde Abdullah Efendi’den ba’dehû Uzun Müderris
Mehmed Efendi’den tahsîl-i ulûm edib ders-i âm ve müderris-i be-nâm oldu. [294]
Tevkî’i Ca’fer Paşa’nın ammizâdesi olduğu münâsebetle silk-i kudâta girip iki def’a
Amasya kâdısı, ba’dehû birkaç livâya daha kâdı olarak 1093 sâlinden sonra vefât etdi. Âlim,
Pervâne Bey vakfına mütevellî idi. Mahdûmu Yahyâ Çelebi’dir.

Habîb Ağa-Hâcızâde
Amasyalıdır. Receb Ağa bin Abdî Ağa’nın oğludur. Köprülü Mehmed Paşa’nın ve
mahdûmu Fâzıl Ahmed Paşa’nın musâhibi olan Mustafa Efendi’nin birâderzâdesi olduğu
münâsebetle Köprülü Mehmed Paşa’nın hazîne-dârı oldu.
Ba’dehû Fâzıl Ahmed Paşa’nın dâ’iresinde temâyüz edib ağalarından olarak sadâret
kapıcılar kethüdâsı ba’dehû dergâh-ı âlî kapıcıbaşılarından olup devr-i hidemât etdi. 1095
sâlinden sonra vefât eyledi. Birâderi Bâlî Ağa’dır.

561
566