Page 132 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

sadâretinde 1103 senesi şâbânında Konya vâlîsi olup sefere me’mûr oldu. 1104 senesi
evâsıtında kendisine rehâvet isnâdıyla İstanbul’a davet edildi.
İstanbul’a vüsûlünde Saray-ı Hümâyûn’a girerken kapı arasında habs ve tevkîf edilib
günlerce helecân geçirdi. 1104 senesi recebinde afv ve itlâk edilerek Selanik vâlîsi olup yine
harbe gönderildi.
1105 senesi recebinde sadrâzam olan Sürmeli Ali Paşa ile aralarında muâdât-ı sâbıka
olduğundan icâd eylediği bir bahâne ile verdiği emir üzerine şâbânında [426] i’dâm edildi. Âkil,
müdebbir idi. Defterdâr Hasan Paşa’nın dâmâdı olup mahdûmu Hasan Bey’dir. Sürmeli Ali
Paşa da senesinde azl ve katl edildi.

Halîl Ağa-Kuloğlu el-Hâc
Amasyalıdır. Beyrut mîr-livâlığından ma’zûlen gelip Amasya’da 1072’de vefât eden
Kuloğlu Mehmed Bey’in mahdûmudur. Sipâhi olup muhârebâta iştirâk ederek 1079’da Amasya
kethüdâyeri 1084’de Tokat voyvadası ve Amasya beytü’l-mâl emîni oldu.
Ba’dehû sânîyen Amasya kethüdâyeri olup 1094’de Çorum Sancağı mütesellimi, 1098’de
Hüseyin Ağa vakfı mütevellîsi olup 1099 senesi saferinde tevliyetden mün’azil ve şâbânında
sânîyen mütevellî oldu. Sene-i mezbûre şevvâlinde Kurşunlu Ali Ağa yerine Amasya
kethüdâyeri oldu.
1100 senesi muharreminde Amasya mütesellimi ve 1101’de ma’zûl olup rebîülâhirinde
tevliyetden de azl edildi. 1103’de Sivas mütesellimi olup 1105’de ma’zûlen Amasya’ya geldi.
Ba’dehû Amasya kethüdâyeri olarak harbe [427] gidip Sentene muhârebesinden mecrûhen
âvdet etdi. Ba’dehû tekâüd edilib 1116 senesi evâilinde vefât etdi. Mahdûmu el-Hâc Osmân
Ağa’dır.

Halîl Efendi-Muîd
İsmail’in mahdûmudur, Mehmed Paşa müderrisi Çilizâde Ömer ve Allâme Hızır
Efendilerden ikmâl-i tahsîl edib ders-i âm ve Hüseyin Ağa Medresesi muîdi ve 1100’de
medrese-i mezbûrenin nısf-ı tedrîsine nâil ve 1107’de İsmail Efendi’nin kasr-ı yedinden Ya’kûb
Paşa müderrisi oldu. 1120’de müderrisliği mahdûmu Hâfız Mehmed Efendi’ye kasr-ı yed edib
az sonra vefât etdi. Ulemâdan idi.

Halîl Ağa-Çorakçızâde el-Hâc
Amasya a’yânından el-Hâc Ali Ağa’nın mahdûmudur. Şâmîce Mahallesi’nde ikâmet
ederek pederinin vefâtında teayyün edib a’yân meclis-i küşâdında âzâ oldu. Bununla temâyüz
edib 1117’de baş-a’yân olarak Amasya sancâğı idâresine hâkim oldu.
Bu esnâda Şâmîce Mahallesi’nde dil-nîşîn bir câmi-i şerîf [428] ve yanında bir mekteb ve
önünde bir çeşme yaptırdı. Kezalik Aşağı Pazar müntehasında bir musalla da binâ etdirdi.
Bunların evkâfını 1123 senesi evâilinde tanzîm ve hayli nukûd vakf ederek 1125 sâlinden sonra
vefât etdi.
Meşâhîr-i a’yândan olup zengin, hânedân, kerîm sâhib-i hayr ü hasenât, fukarası bol,
gâyet dindâr bir zât-ı sütûde-simât idi. Halfet Gâzi Mezarlığı’nda medfûndur. Mahdûmu el-Hâc
Mustafa Ağa da Sarachâne Câmii ittisâlinde bir medrese yaptırdı.

Halîl Efendi-Zühdizâde
Amasyalıdır. Mevâlîden Zühdi Mehmed Efendi’nin mahdûmu olup tahsîl-i ulûm etdikden
sonra silk-i kudâta girdi. Pederinin kitâbetinde usûl-i şer’iyyeyi öğrenib kasâbât ve bilâda kâdı
olarak 1130 sâline doğru vefât etdi. Mahdûmu el-Hâc Mustafa Ağa’dır.

Halîl Efendi-Ganizâde es-Seyyid el-Hâc
Amasyalıdır. Kudâtdan el-Hâc Mustafa Efendi bin [429] el-Hâc Bünyad Çelebi mahdûmu

121
131