Page 231 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Ramazân Ağa-Çavuş
Köprülüdür. Ali oğlu olup 998’de yeniçeri olarak 254. bölükte mukayyed görüldü.
1019’da Yeniçeri Ocağında çavuş olup “Ramazân Çavuş” demekle iştihâr etdi. Köprülü Ahmed
Paşa’nın ma’iyyetinde hizmetde olup 1041 sâlinden sonra vefât etdi. Mahdûmu Kadrî Paşa
vüzerâdandır. [131]

Ramazân Efendi-Şa’bânî eş-Şeyh
Merzifonludur. Meşâyih-i Şa’bâniyyeden Çorumlu Ömer Fu’âdî Efendi’nin riyâzet-
hânesinde tahsîl-i irfân ve tekmîl-i sülûk edib ondan ahz-ı hilâfetle Merzifon’a gelip Devlet
Hâtun zâviyesi şeyhi oldu. Orada va’z ü ibâdetle ve irşâd-ı halk ile iştigâl edib 1051’de vefât
etdi. Kibâr-ı meşâyihden âlim, vâ’iz, müteşerri’, zâhid idi.

Ramazân Efendi-Himmetzâde el-Hâc
Amasyalıdır. Ulemâdan el-Hâc Süleyman Efendi’nin mahdûmudur. Ulemâdan ahz-ı
ulûm ederek ders-i âm, müderris olup sonra silk-i kudâta girdi. Devr-i bilâd ederek 1039’da
Amasya kadısı olup 1041’de ma’zûl oldu.
Ba’dehû 1050 gurre-i muharreminde sânîyen Amasya kadısı ve 1057’de Sivas mollası
olup 1059’da ma’zûl ve ba’dehû merhûm oldu. Meşâhîr-i ulemâ ve mevâliden bir zât-ı sütûde-
simât idi. Mahdûmu Mehmed Efendi de kibâr-ı kudâtdan idi. [132]

Ramazân Efendi-Celvetî eş-Şeyh
Amasya civârında Dereköylü Mustafa mahdûmudur. Hazret-i Azîz Mahmûd Hüdâyi
Efendi’nin hizmet-i şerîfesinde tefeyyüz ederek hulefâsından oldu. Dergâh-ı Azîz’de
“Amasyalı Ramazân Dede” demekle meşhûr bir zâkir başı olup şeyhinin irtihâlinde
Dereköyü’ne geldi. Orada bir zâviye binâsıyla şeyhi olup 1063’de vefât etdi. Ehl-i hâl ü ma’rifet
bir zât idi.

Ramazân Ağa-Mühürdâr el-Hâc
Köprülüdür. Abdullah oğlu olup Köprülü Mehmed Paşa’nın dâ’iresinde hizmet ederek
i’timâdını kazanıp sadâretinde mühürdârı oldu. Sadr-ı müşârün-ileyhin vefâtında mahdûmu
Fâzıl Ahmed Paşa’ya intisâb edib kapıcıbaşı, ba’dehû surre-i hümâyûn emîni olarak 1078
sâlinden sonra vefât etdi.

Ramazân Efendi-Şeyh Şa’bânzâde, eş-Şeyh
Amasyalıdır. Hazret-i Azîz Hüdâyî Mahmûd Efendi’nin hulefâsından Çevikce Şeyhi
Amasyalı Şa’bân Efendi’nin mahdûmudur. [133] Tahsîl-i ulûm edib pederinin hizmetinde
tefeyyüz ederek İçerişehir’de Mahmûd Çelebi zâviyesi şeyhi Hâtuniyye Câmii vâ’izi olup 1078
senesi saferinin evâ’ilinde dâr-ı na’îme irtihâl etdi. Âlim, vâ’iz, hüsn-i hâl erbâbından bir zât
idi. Mahdûmu Ömer Efendi yerine geçti.

Ramazân Efendi-Pamuk Dedezâde
Amasya’nın Geldiklan nâhiyesinde zâviye ve türbesi olan Pamuk Dede evlâdından
Mehmed Çelebi mahdûmudur. Amasya’da ulemâdan iktisâb-ı ilm ü ma’rifet edib ders-i âm,
Halfet Gâzi müderrisi, Üçler Câmii vâ’izi oldu.
1078’de Pamuk Dede zâviyedârı olan âmmizâdesi Mehmed Çelebi’nin vefâtıyla zâviye-
i mezbûre şeyhi ve evkâfının mütevellîsi olup Geldiklan’a gitdi.
1080’de âzim-i Hicâz olup vefâtı işâ’a edildiğinden 1081 saferinde mahdûmu Osmân
Efendi şeyh ü mütevellî olduysa da mu’ahharan ber-hayât olarak geldiği anlaşılmakla sânîyen
meşîhat ü tevliyet uhdesine tevcîh edilip 1089’da vefât etdi. Ulemâdan [134] idi.

224
230