Page 280 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

yukarıda yazılan es-Seyyid eş-Şeyh Şemseddîn Ebû Hâşim Mehmed es-Semerkandî’nin
zevcesi zann olunur.
Peder ü zevcinden ulûm u fünûnu güzelce tahsîl etdi. Ba’dehû tarikât-ı Halvetiyyeden
münîb olup Pirinççi Mahallesi önünde Kuşköprü civârında âlî bir zâviye ve ittisâlinde kendisine
bir türbe yaptırdı. 857’de pederinin zamân-ı kazâsında vakfiyesini tanzîm etdirip 870sâlinden
sonra vefât etdi.
Vakf etdiği iki kıt’a çiftliği mâlikâne sûretiyle mütevellîleri tarafından idâre edilip
hâsılâtı zâviyesinde dervîşân u meşâyihe ta’âmiye ve vezâ’if olarak sarf edilirdi. Selâmet Hâtun,
türbesinde medfûn olup fâzilât-ı nisâdan sâliha, âbide, ehl-i hayr ü hasenât idi. Şâ’ire-i meşhûre
Zeyneb Hâtun’un hemşîresidir.

Salar Bey-Emir Seyfeddîn
Amasyalıdır. Amasya Beylerbeyi emîr-i kebîr Nûreddîn Tuğrak bin İmâdeddîn Süli
Bey’in mahdûmu ve Emîr Kamerüddîn Bey’in [298] birâderidir. Ümerâdan olup 641’de Tatar
harbinde gösterdiği şecâ’atle iştihâr etdi.
658’de Pervâne Bey’in himmetiyle emîr-i Tokat olup 673’de Mısır Türkleriyle
muhârebede esîr olarak Mısır’a götürüldü. 678’de fidye-i necât ile kurtulub Amasya’ya avdet
ve ba’dehû dâr-ı ukbâya rihlet etdi. Kibâr-ı ümerâdan idi. Pederinin türbesinde medfûndur.
Mahdûmu Emîr Alaeddîn Tuğrul Bey’dir.

Selâmî Mehmed Bey-Selâmzâde
Amasyalıdır. Alaybeyilerden ve Amasya’nın Köprü-başı Mahallesi eşrâfından el-Hâc
Mustafa Bey bin Abdullah Bey’in mahdûmudur. Pederinin irtihâlinde ze’âmetine mutasarrıf
olup tahsîl-i ilm ü kitâbet ederek Amasya mukâta’âtı kâtibi oldu.
Ba’dehû Amasya sancâğı dîvân kâtibi olup Çapanzâde Süleyman Bey’in tarafdârı
oldugundan 1222’de azl edildi. 1223’de Sultân Mahmûd-ı sânînin cülûsunu müte’âkıb yine
dîvân kâtibi olarak i’âde-i ikbâl etdi. 1240 senesi evâ’ilinde [299] büyük zelzelede vefât etdi.
Kâtib, şâir idi. Mahdûmu Mustafa Bey ve birâderi Abdullah Beg’dir.

Saltuk Bey-Emir Şehâbeddîn
Amasya hükümdârı Hacı Kutlu Şâh’ın abd-i mu’tekîdidir. Efendizâdesi Hacı Şâdgeldi
Paşa’nın devr-i hükûmetinde ümerâdan olup Amasya cândârı, ya’nî muhâfızı, emniyet-i
umûmîye müdüri oldu. Yirmi yıldan ziyâde bu vazîfesini hüsn-i ifâ edib 783 sâlinden az sonra
vefât etdi. Meşâhîr-i ümerâdan idi. Mahdûmu Alaeddîn Ali Çelebi ulemâdandır. Bunun
mahdûmu Mevlânâ Şemseddîn Ahmed Çelebi 846’da Şerh-i Tavâli’i yazdı.

Saltuk Çelebi -Mevlânâ Mecideddîn
Sivaslıdır. Orada tahsîl-i ulûm edib ulemâdan oldu. 803[M.1400-1401]’te Asya
hükümdârı Topal Timur Hân Sivas’a hücûm ideceği esnâda kaçıp Amasya’ya ilticâ etdi.
Ba’de’l-muhârebe Amasya’da tavattun edib Çelebi Sultân Memhed Hân devrinde vefât etdi.
Meşâhîr-i ulemâdan idi. Mahdûmu Kemaleddîn İsmâ’îl Çelebi’dir. [300]

Selçuk Bey-Emir Mu’izzeddîn
Amasya ümerâsından Emîr Bedreddîn Aydoğdu Bey’in büyük oğludur. Amasya
hükümdârı Nizâmeddîn Argun Şâh bin Şehinşâh’ın Atabegi ve müdebbir-i hükûmeti olup sonra
bunun birâderi Celâleddîn Sencerşâh’a hidmet ederek 606’da Rûmların muhârebesinde
müşârün-ileyh ile şehîd oldu. Mahdûmu Alâeddîn Alişîr Bey’dir.

273
279