Page 178 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

Ahmed Bey-Şahbâz Paşazâde
Merzifonludur. Oranın eşrâfından mîr-i mîrân Şâhbaz Paşa bin Osmân Bey bin Ahmed
Bey’in mahdûmudur. Pederinin vefâtında Devlet Hâtun mütevellîsi ve zâ’im olup Kara Mustafa
Paşa’nın sâye-i ikbâlinde 1092 senesi rebîülahirinde Amasya Sancağı Beyi oldu.
1094’de harbe me’mûren ma’iyet-i mevcûdesiyle Rumeline gidip sene-i mezbûre
zilhiccesinde Viyana harbinden mecrûhen ve Devlet Hâtun vakfını tevliyetiyle müteka’id oldu.

Ahmed Ağa-Kazzâzzâde
Amasyalıdır. Sipâhi meşâhîrinden Ali Ağa bin Kazzâz Abdulbaki Ağa bin Hasan Ağa’nın
oğludur. Hâtunîye Mahallesi’nde doğup orada büyüdü. Abaza Hasan Paşa mes’elesinde
Köprülü Mehmed Paşa taraftarı olduğundan hâs ahûr hademesi meyânına idhâl edildi.
Burada terbiye görüp tefeyyüz ederek salâhûr (ser-ahûr), ba’dehû hâs-ahûr kethüdâsı,
buradan mîrâhûr-ı sânî olup 1087 şa’bânında Kara Mustafa [566] Paşa sadr-ı a’zam oldukta
bunun hizmet-i şâhâneye liyâkatını tarif ve sevk ederek rikâb-ı hümâyûn kapıcılar kethüdâsı
nasb etdirdi.
Bunun yerine de kendi ağalarından Merzifonî Ali Ağa’yı mîrâhûr-ı sânî nasb
etdirdiğinden sâhib-i terceme bundan pek ziyâde müte’essir olmuşdu. Paşa’nın sadâretinde
terakkîden mahrûmâne yedi yıl bu mesnedde kaldı.
1094 senesi zilhiccesinde Kara Mustafa Paşa’nın i’dâmına me’mûren Belgrad’a gitdi.
İdâm edeceği esnâda Paşa’ya hitaben “Hep kendiye cezâ-yı amelindir. Sakın kimseye bahâne
bulma” diyerek kinini izhâr ve îfâ-ı me’mûriyyet etdi.
Avdetde mizâcına târi-i illet gitdikçe iştidâd edib 1095 senesi rebîülahirinde vefât etdi.
Mehmed Râşid Efendi Târîhi’nde “sadr-ı maktûle karşı yaptığı isâ’et-i edebin cezasını gördü”
diyor. Sadr-ı maktûlun buna karşı aldığı vaz’iyyete göre bu kadarcık sözünü hoş görmelidir.

Ahmed Bey-Kurdzâde
Amasya a’yânından Hızır ve Mehmed Paşaların evkâf-ı mütevellîsi [567] Seydî Beyzâde
Kurd Mehmed Bey bin Ahmed Bey’in mahdûmudur. Pederinin irtihâlinde Hızır ve Mehmed
Paşa evkâfına mütevellî oldu. Fakat evlâd-ı utekâdan Gonca Beyzâdelerle evlâd-ı inâsdan
Hayreddînzâde Ahmed Çelebi aleyhinde yıllarca muhâkeme oldu. Kâh mütevellî kâh ma’zûl
olduğu halde 1095’de vefât etdi. Mahdûmu Ali Bey’dir.

Ahmed Ağa-Taşçızâde el-Hâc
Amasyalıdır. Eşrâfdan Taşçızâde el-Hâc İsmâil Ağa’nın oğludur. Amasya’da ta’ayyün
edib 1086’da şehir kethüdâsı, 1089’da ma’zûl oldu. Yedi yıl kadar mahkeme ve meclis
azâlığında bulunarak 1096 sâlinden sonra vefât etdi. Hânedân idi.

Ahmed Ağa-Kapıcı
Köprülüdür. Köprü kazâsı dâhilinde Akviran köyünden olup Köprülü Mehmed Paşa’nın
dâ’iresinde Kapıcı Ağalardan iken Köprülüzâde Fâzıl Ahmed Paşa’ya intisâb ederek
sadâretinde ağalarından oldu. Kapıcılıkla iştihâr etdi.
Ba’dehû sadr-ı müşârün-ileyhin kapıcılar kethüdâsı olup 1087’de [568] vefâtıyla açıkta
kaldı. Merzifonî Kara Mustafa Paşa’nın sadâretinde kendi talebi ile Köprü voyvodası olup
Köprü’ye geldi. 1095’de ma’zûl ve mütekâ’id olup 1097 senesi hilâlinde vefât etdi. Akviran
karyesinde câmii ve vakfı vardır.

Ahmed Ağa-Ramazânzâde el-Hâc
Amasyalıdır. Eşrâftan el-Hâc Ramazân Ağa’nın oğludur. Sipâhi meşâhîrinden olup
Ankebût Ahmed Paşa’nın Girit serdârlığında kethüdâsı ve Kandiye harbinde fedâkârâne çalışıp
cebecibaşı oldu.

173
177