Page 179 - 6-8

Amasya Tarihi Cilt: 6
Amasya Tarihi 6-8. Cilt Hüseyin Hüsâmeddîn YASAR

1087’de Fâzıl Ahmed Paşa’nın irtihâlinde Amasya’ya avdet edib a’yândan oldu.
Çamlıbel vak’asında hizmet edib 1098 sâline doğru vefât etdi. A’yândan bir hânedân idi.
Beylerbeyi tarzında hareket ederdi.

Ahmed Efendi-Tâceddînzâde
Amasya kudâtından Abdulbaki Efendi bin Taceddîn Efendi mahdûmu olup tahsîl-i ulûm
ederek silk-i kudâta girdi. Kasâbâtı devrederek 1099 senesi evâilinde vefât etdi. [569] Ulemâ-
ı kudâtdan idi.

Ahmed Efendi-Vâsî’ Çelebizâde
Amasya’nın hânedân-ı kadîminden ve Mü’eyyedzâde sülâlesinden Abdulvasi’ Çelebi bin
Habib Çelebi bin Pîrî Ahmed Çelebi bin Yahyâ Çelebi bin Abdulvasi’ Çelebi bin Şemseddîn
Ahmed Efendi bin Mehmed Çelebi bin Mü’eyyed Çelebi bin eş-Şeyh Alâeddîn Ali Yârî Çelebi
bin Mevlânâ Zeyneddîn Siyavuş bin eş-Şeyh Evran bin Doğan mahdûmudur.
Pervâne Bey Vakfı mütevellîsi olan pederinin irtihâlinde vakf-ı mezkûra mütevellî ve
tahsîl-i ulûm ederek Çeribaşı Mahallesi’nde ikâmet ve tedrîs-i ulûma mülâzemet etdi. Ba’dehû
kadı olup 1099 senesinde vefât etdi.

Ahmed Ağa-Kürd Sefer Ağazâde
Gümüşlüdür. Enderûn-ı Hümâyûnda hâs odabaşı iken tekâ’üd edilen Gümüş kazâsının
Dövenci karyesinden Kürd Sefer Ağa’nın oğludur. Sipâhi olup Kara Mustafa Paşa dâ’iresine
girdi. Müşârün-ileyhin itimâdını kazanıp 1072’de Merzifon’da vekîl-i umûrı ve ba’dehû
Merzifon voyvodası oldu. [570]
Merzifonî Kara Mustafa Paşa’nın Merzifon’daki hayrâtını binâya ve vakfedilecek emlâk
ve musakkafâtını tanzîm ve iştirâya me’mûr olup câmii şerîf ve bedestenini mükemmel bir
sûretde yaptırdı. 1086’da İstanbul’a gidip 1087 şa’bânında kethüdâ-yı sadr-ı âlî oldu.
Fakat hüsn-i idâreye muvaffak olamadığından üç ay sonra azledilip Merzifon’a
gönderildi. 1090’da Tokat voyvodası ve Amasya beytü’l-mâl emini olup 1095 senesi evâ’ilinde
azliyle orada ikâmete me’mûr olduğu halde 1099 senesi rebîülevvelinde vefât etdi.
Tokat’da hayrât ve evkâfı vardır. Mahdûmları Mehmed, Mustafa, Abdüllatîf Ağalardır.
Mehmed Efendi ulemâdan olup Merzifon’da, Mustafa Efendi hâs ahûrda kaşıkçıbaşı ve hâce-
gândan olup İstanbul’da, Abdullatîf Ağa Tokat a’yânından olup orada kaldı. Bunun evlâdı
Tokat evkâfına mütevellî oldu.

Ahmed Ağa-Murâd Beyzâde el-Hâc
Amasyalıdır. Bâyezîd Paşa Mahallesi eşrâfından mîr-livâ [571] Murâd Beyzâde el-Hâc
Mehmed Ağa’nın mahdûmudur. Sipâhi, Amasya kethüdâyeri iken Köprülüzâde Fâzıl Ahmed
Paşa 1070 senesi muharreminde Amasya’ya geldikte dâiresine girip vekil-i harcı, ba’dehû
sadâret kapıcılar kethüdâsı oldu.
1078’de dergâh-ı âlî kapıcıbaşlarından olup 1080 senesi şevvâlinde kethüdâ-yı sadr-ı âlî
oldu. Ancak pek mülâyim olduğundan 1081 senesi şa’bânında ma’zûlen Amasya’ya gelip
evkâf-ı Sultânîye mütevellîsi, 1082 recebi gurresinde Sivas vilâyeti mukâta’ât emini oldu.
1083’de Tokat voyvodası ve Amasya beytü’l-mâl emini, 1085 senesi cumâdelûlâsında
sânîyen evkâf-ı Sultânîye mütevellîsi, 1086 zilka’desinde Zile voyvadası, 1088 senesi
muharreminde sâlisen evkâf-ı Sultânîye mütevellîsi olarak Amasya’ya geldi. 1089 senesi
şevvâlinde Ankebut Ahmed Paşa tarafından Amasya mütesellimi oldu.
1092’de Çengelli mevkiinde türeyen eşkiyânın def’ ve istîsâline me’mûr olup îfâ-yı
vazife ederek ikinci defa Zile voyvadası oldu. 1094’de râbi’an [572] evkâf-ı Sultânîye
mütevellîsi olup Amasya’ya geldi. Beş yıl Sultân Bâyezîd Evkâfını güzel idâre, câmii şerîfi
müceddeden imâr ve ihyâ edib imârethâneyi işletdi.

174
178