Page 275 - 6-8

Amasya Tarihi Cilt: 7
Amasya Tarihi 6-8. Cilt Hüseyin Hüsâmeddîn YASAR

müderrisi olup yıllarca tedrîs ve ifâde ederek 818 zelzelesinde zehre-çâk olmak sûretiyle vefât
etdi. Meşâhir-i ulemâdandır.

İdris Bey-Hacı Beyzâde
Amasyalıdır. Çelebi Sultân Mehmed ve şehzâdesi Sultân Murâd-ı [33] Sânî ümerâsından
Hamza Bey bin el-Hâc İlyâs Bey bin Hamza Bey bin İdris Bey bin el-Hâc Nevrûz Bey’in
mahdûmudur. Bu da züamâdan, ba’dehû meşâhir-i ümerâdan olup 857’de İstanbul fethinde
şehîden vefât etdi. Ni’me’l-ceyşdendir. Mahdûmu el-Hâc Pervîz Bey de kibâr-ı ümerâdan idi.

İdris Çelebi-Veled-i Karamânî
Amasya ‘ulemâsından el-Hâc Muhyiddîn Mehmed bin İdris Karamânî mahdûmudur.
Pederiyle beraber Karaman ilinden Amasya’ya 846’da hicret ve Amasya ulemâsından ikmâl-i
tahsîl ederek tedrîs-i ulûma himmet etdi.
Ba’dehû Sultân Bâyezîd-i sânî Amasya‘da vâlî iken sarayı hüddâmına muallim ve ders-i
âm-ı meşhûr oldu. Amasya ekâbirinden Muslihîzâde Seydî Ahmed Çelebi’ye dâmâd olup
sultân-ı müşârün-ileyhe takarrüb ederek bir aralık muallimi de oldu. 886’da Sultân Bâyezîd-i
Sânî taht-ı saltanata cülûs etdikde Amasya’da yeniden ihyâ edilen Şâdiyye Medresesi müderrisi
olup 893’de vefât etdi. Meşâhir-i ulemâdan bir zât idi. Mahdûmu sudûr-ı ulemâdan Seydî
Ahmed Efendi’dir. [34]

İdris Efendi-Muallimzâde
Amasyalıdır. Kibâr-ı ulemâdan şehzâdeler muallimi Hayreddîn Hızır Çelebi bin İdris
Çelebi bin Ebûbekir Çelebi mahdûmudur. Amasya vâlisi Şehzâde Sultân Ahmed muallimi
Hatîb Kasım Efendi’den vesâir ulemâ-yı benâmdan tahsîl-i ulûm edib ders-i âm oldu.
Pederinin sâye-i ikbâlinde iştihâr edib Halfet, Torumtay, Mehmed Paşa medreselerine
sırasıyla müderris oldu. Sultân Ahmed’in devr-i ikbâlinde pek muhterem iken 918’de Sultân
Selîm Hân’ın cülûsunda Karahisâr-ı Şarkî’ye gönderildi. Orada bir müddet müderris oldu. 927
sâlinden sonra vefât etdi. Birâderi Lütfullah Efendi’dir. Her ikisi de meşâhir-i ulemâdan idi.

İdris Paşa-Hacı Beyzâde
Amasyalıdır. Ümerâdan Hamza Bey bin el-Hâc İlyâs Bey ibnü’l-Hâc Pervîz Bey bin İdris
Bey’in mahdûmudur. Züamâdan iken 940’da Amasya vak’asında yararlık gösterip ümerâdan
oldu. 967’de Beylerbeyi görüldü. Ba’dehû [35] vefât etdi.

İdris Efendi-Müderris
Köprülüdür. Amasya‘da meşâhir-i ulemâdan tahsîl-i ulûm edib mücâz ve ders-i âm oldu.
Muallim-i Sultânî Amasyalı Hâce Ömer Efendi’nin ulüvv-i himmetinden istifâde emeliyle
İstanbul’a gidip Sultân Bâyezîd Câmiinde tedrîs ve ifâdeye başladı.
Bu esnâda 1031 receb hâilesi zuhûr ve Hâce Ömer Efendi ihtifâ eylediğinden sene-i
mezbûre şevvâlinde Köprü kasabasında Taşanzâde Ahmed Bey’in medresesi müderrisliğine
ta’yin ve i’zâm edildi. Orada tedrîs-i ulûm ederek iştihâr edib 1045’de Köprü (Kedağra)
Müftüsü görüldü. Ba’dehû vefât etdi. Meşâhir-i ulemâdan idi.

İdris Efendi-Cüzhân
Amasyalıdır. Mustafa mahdûmudur. İstanbul’da Ayasofya medresesinde ikâmet ve
Amasyalı Hâce Ömer Efendi’den tahsîl-i ulûma gayret ederek Ayasofya Câmiinde ibtidâ cüz-
hân, ba’dehû ders-i âm oldu. Hâcesi Ayasofya vâizi oldukda tâbii ve muallim-i sultânî olunca
mülâzımı olup 1027 senesi [36] şevvâlinde İstanbul müderrisi oldu.
1031 senesi recebinde zuhûr eden hâile-i Osmâniyyeden sonra hocasıyla beraber
Bursa’ya gönderildi. 1036’da Şeyhülislâm Yahya Efendi’nin ulüvv-i himmeti sâyesinde avdet

274