Page 583 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

Hasan Bey-Emîr İzzeddîn Veled-i Aydın
Amasyalıdır. Yukarıda tercemesi yazılan Hasan Gâzizâde Alî Bey’in mahdûmudur.
Eretna ve Kutlu Şâh Beyler’in [345] zamân-ı emâretlerinde ümerâdan ve 747’de Sâz mâlikânesi
mutasarrıfı görülüp sonra vefât etdi. Mahdûmları Melik Ahmed, Cüneyd Beyler’dir.

Hasan Çelebi-Mevlânâ Ebu’l-Fazl er-Rûmî
Alî bin Halîl’in mahdûmudur. Ulemâdan ve Amasya kâdı’l-kudâtı Mevlânâ Şemseddîn
Mehmed bin Mûsa el-Hallâtî’den tahsîl-i ulûm edib ders-i âm ve müderris ve üstâdının
mahdûmu Amasya kâdı’l-kudâtı Mevlânâ İmâdeddîn Ömer Çelebi tarafından ahyânen Amasya
nâibi oldu. 751 sâlinden sonra vefât etdi. Ulemâ-yı kudâttan idi.

Hasan Çelebi-Mevlânâ Pîr İmâdzâde
Amasyalıdır. Amasya kâdı’l-kudâtı İmâdeddîn Ömer Çelebi bin Şemseddîn Mehmed
Çelebi bin Necîbüddîn Mûsa el-Hallatî mahdûmudur. Ulemâdan ahz-ı ulûm ederek müderris,
Kedağra kâdısı olup hayli müddet orada kaldı.
Ba’dehû ma’zûlen Amasya’ya gelip birâderi Amasya kâdı’l-kudâtı Müeyyideddîn
Mehmed Çelebi nâibi olup 783 sâlinden sonra vefât etdi. Hânedânının medfûn olduğu kâdılar
türbesinde bunun kabri görülemedi. Ulemâdandır. [346] Mahdûmu Sâlih Çelebi ve bunun
mahdûmu Şeyh Paşa’dır.

Hasan Bey-Taşanzâde
Kedağra(Köprülü)lıdır. Oranın emîri olan Alâaddîn Alî Bey bin Taşan Bey’in
mahdûmudur. Amasya hükümdârı el-Hâc Şâdgeldi Paşa’nın meşâhîr-i ümerâsından olup
788’de Sultân Murad hünkâra arz-ı inkıyâd ederek Kosova harbinde isbât-ı vücûd etdi. Ba’dehû
vefât eyledi. Mahdûmları Ahmed, Alî Beyler’dir. Köprü’de medresesi vardır.

Hasan Çelebi-Mevlânâ İzzeddîn
Merzifonludur. Taşan Beyzâdelerden Savcı Bey’in mahdûmudur. Amasya’da tahsîl-i
ulûm edib Merzifon’da ders-i âm oldu. Fakat Taşanzâdelerin Merzifon emâreti için birbirine
düşmelerinden bî-zâr olup Niksar’a gitdi.
Orada ders-i âm ve Yağıbasanîye medresesi müderrisi ve müftü olarak fevka’l-âde iştihâr
etdi. 800 sâlinden sonra vefât etdi. Kibâr-ı ulemâdan idi. Tilmîzi Mevlânâ Sa’d bin Halîl bin
Süleyman el-Merzifonî hattıyla yazılan “Hülâsatü’l-Fetâvâ” kitâbını 793’de mukâbele etdikleri
kendi hattıyla görüldü. [347]

Hasan Bey-Osmân Paşazâde
Amasyalıdır. Lâdikli Selamîş Beyzâde Osmân Paşa’nın mahdûmu ve Amasya Beylerbeyi
Devatdâr Ahmed Paşa’nın kerîmezâdesidir. Yıldırım Sultân Bâyezîd ümerâsından olup 804
senesi zilhiccesinde Timur harbinde mün’adim oldu. “Emîr Kılıç Hasan Bey” demekle meşhûr
idi. Birâderi Tur Alî Bey’dir. Mahdûmu Osmân Bey’dir.

Hasan Bey-Hâbil Beyzâde
Amasyalıdır. Emîr Celâleddîn Hâbil Bey bin Tâceddîn İbrâhim Bey bin Sultân Zeyneddîn
Tuli Han bin emîr-i kebîr eş-Şeyh Hasan Bey’in mahdûmudur. Buna “Emîr İzzeddîn Hasan
Bey” dendi. Yıldırım Sultân Bâyezîd ve Çelebi Sultân Hânlara hizmet edib 811 hudûdunda
vefât etdi. Meşâhîr-i ümerâdan idi. Mahdûmları el-Hâc Receb, Şa’bân Çelebiler ve birâderi
Abdulhalîm Bey’dir.

577
582