Page 588 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

A’yân-ı ulemâdandır. Kezâlik bu senelerde vefât eden Mevlânâ Hasan Çelebi bin Yûsuf da
ulemâdan idi.

Hasan Bey-Yörgüç Paşazâde
Amasya ümerâsından Alî Bey’in mahdûmudur. Amasya’da Sultân Bâyezîd-i Sânî
ma’iyyet-i ümerâsından olup cülûsunda beraber İstanbul’a gitdi. 893’de Mısır harbinde
mün’adim oldu. Mahdûmu Alî Bey ve birâderi Hüseyin Bey’dir. Diğer Yörgüç Paşazâde Hasan
Bey de ümerâdan Hızır Bey bin Yörgüç Paşa’nın mahdûmudur. Bu da kibâr-ı ümerâdan olup
894 hudûdunda vefât etdi.

Hasan Çelebi-Seydî Çelebizâde
Amasyalıdır. Kudâttan Seydî Ahmed Çelebi bin Atâullâh Çelebi mahdûmudur. Ba’de’t-
tahsîl müderrisînden oldu. Ba’dehû kasabât u bilâda kâdı olup 896 sâlinden sonra vefât [362]
etdi.

Hasan Bey-Âdil Beyzâde
Lâdiklidir. Evlâd-ı Selçukiyye’den Âdil Bey bin Cüneyd Bey bin Alî Bey bin Kubad
Bey’in mahdûmudur. Sultân Bâyezîd-i Sânî’ye Amasya’da vâlî iken intisâb edib cülûsunda
Lâdik Beyi oldu. Şehzâde Sultân Ahmed Amasya vâlîsi iken Lâdik’e gitdiği zamân bununla
hem-dem olup 900 sâline doğru fevt oldu. Mahdûmları Ahmed, Mehmed Beylerdir.

Hasan Efendi-Ebû Yûsufzâde
Amasyalıdır. Yûsuf Çelebi bin Ebî Yûsuf Çelebi bin Abdulhalîm Çelebi mahdûmudur.
Lügat sâhibi meşhûr Halîmî Mehmed Çelebi’nin ammizâdesi olup ba’de’t-tahsîl müderris, kâdı
olup 908 hudûdunda vefât etdi. Kibâr-ı kudâttan idi. Yağmur Çelebizâde Mevlânâ Hasan Çelebi
de kibâr-ı ulemâdan olup bu esnâlarda vefât etdi.

Hasan Efendi-Mevlânâ Sivasî
Sivaslı Murâd’ın mahdûmudur. Amasya’da Hatîb Kâsım Efendi’den tahsîl-i ulûm edib
ders-i âm ve müderris-i be-nâm oldu. [363] Halfet Gâzi, Atabeg, Mehmed Paşa medreselerine
sırasıyla müderris olup 910 sâlinden sonra vefât etdi. Âlim, kâmil bir zât idi. Mahdûmu
Abdullatîf Efendi de ulemâdandır.

Hasan Paşa-Hayreddîn Paşazâde
Amasyalıdır. Esbak Trabzon vâlîsi ve Şehzâde Sultân Abdullah lalası Gelkirâsîzâde
Hayreddîn Hızır Paşa’nın mahdûmudur. Amasyada vâlî iken Sultân Bâyezîd-i Sânî’ye intisâb
ederek züamâdan oldu.
886’da müşârün-ileyhin cülûsunu müte’âkib mîrlivâ olup Kayseriyye sancâğı beyi oldu.
Ba’dehû Antalya sancâğı beyi olup Cem Sultân mes’elesinde yararlıklar gösterdiğinden 891’de
Konya Beylerbeyi oldu. Mısır harbinde zahîre ve mühimmât-ı askeriyye tedârikinde hizmetleri
sebk etdi
893’de ma’zûlen İstanbul’a gelip 894’de Trabzon Beylerbeyi oldu. 896’da Trabzon
eyâleti Şehzâde Sultân Selîm Han’a tevcîh edildiğinden müşârün-ileyhin müdebbir-i umûru,
vezîr ve müsteşârı olarak ma’iyyetinde dört yıldan ziyâde kaldı. Ba’dehû ma’zûlen İstanbul’a
geldi. [364]
902’de Mora Beylerbeyi olup Modon ve Koron fethinde hizmeti sebk eylediğinden
905’de Anadolu Beylerbeyi oldu. 907’de ma’zûlen İstanbul’a gelip pederinin binâ eylediği
Çinili hamâmı civârında ikâmet 911 hudûdunda vefât etdi. Sâdık, müdebbir, zî-servet idi.
Servet-i azîmesi birâderzâdesi ve dâmâdı Şücâ’eddîn Paşa bin Mehmed Bey’e kaldı.

582
587