Page 590 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

Hasan Çelebi-Emîr Çelebi
Amasyalıdır. Es-Seyyid Şerefeddîn Hamza Çelebi mahdûmudur. Ulemâdan şâyân-ı
hürmet bir emîr olup Amasya’da nakîbü’l-eşrâf kâ’im-makâmı oldu. “Nakîb Çelebi” demekle
iştihâr edib Receb Mahallesi’nde ikâmet etdiği münâsebetle oraya “Nakîb Mahallesi” de dendi.
940 senesinde ba’zı Şî’anın hareket-i kıyâmiyyesinden dolayı [368] evlâd ü ıyâliyle
Bursa’ya gidip orada aynı hürmeti gördü. 943’de Hüdâvendigâr imâreti evkâfına mütevvellî
olup 951 sâlinden sonra vefât etdi. Meşâhîr-i sâdâttan âlim, kâmil muhterem bir zât idi.

Hasan Bey-Mehmed Paşazâde
Amasyalıdır. Hızır Paşazâde Mehmed Paşa’nın evlâd-ı kirâmından el-Hâc Alî Bey’in
mahdûmudur. Pederinin irtihâlinde ceddi evkâfına mütevelli olup fevka’l-âde ta’ayyün etdi.
Amasya vâlîsi Şehzâde Sultân Mustafa’nın teveccühâtına mazhar olup nüfûz u i’tibârı arttı.
954’de vefât etdi. Birâderi Hüseyin Bey’dir.

Hasan Ağa-Kapı Ağası
Boşnak’tır. Amasya vâlîsi Şehzâde Sultân Mustafa’nın kölelerinden olup dâ’iresinde
tefeyyüz ederek kapı ağası olmuş, akl ü zekâsıyla şehzâdenin teveccüh ü i’timâdını kazanmış
olduğundan 960 senesi şevvâlinde şehzâde-i müşârün-ileyhin şehâdetinde bu da mün’adim
oldu. Diğer Boşnak Hasan Ağa da müşârün-ileyhin hazîne-dârı olmuştu. [369] Bu da vak’a-i
şehâdette dünyâya vedâ’ etdi.

Hasan Çelebi-Kocacıkzâde Hâce
Amasya hâcegân-ı tüccârından Hâce el-Hâc Mehmed Çelebi bin Hâce el-Hâc Ahmed
Çelebi bin Kocacık Hâce Mehmed Çelebi mahdûmudur. Amasya’da ticâret ü gınâsıyla be-nâm
olan a’yândan olup Amasya vâlîsi Şehzâde Sultân Mustafa ümenâsından oldu. 960’da müşârün-
ileyhin şehâdetinde biraz nekbet gördü. 962 hudûdunda vefât etdi.

Hasan Çelebi -Seydîzâde
Amasyalıdır. Kudâttan Osmân Çelebi bin Seydî Alî Çelebi mahdûmudur. Ba’de’t-tahsîl
bir müddet ders-i âm oldu. Ba’dehû Anadolu kazaskeri Muhaşşî Sinan Efendi’nin himmetiyle
kibâr-ı kudâttan olup 965 sâlinden sonra vefât etdi. Ulemâ-yı kûdattan idi.

Hasan Efendi-Bahtiyâroğlu
Amasyalıdır. Yukarıda tercemesi yazılan tîr-endâz-ı meşhûr Bahtiyâr Bey’in ikinci
mahdûmudur. Amasya’da doğdu Amasya’da büyüdü. Celâlzâdelerden hutût-ı mütenevvi’ayı
[370] ahz ve ulemâdan tahsîl-i ma’ârif edib devr-i Süleymanî’de dîvân-ı hümâyûn küttâbı
zümresine iltihâk etdi.
Ba’dehû tedrîcen terakkî ederek hüsn-i hatt ve hulkı sâyesinde 950’de re’îsü’l-küttâb
oldu. Ba’dehû Rüstem Paşa’nın sadâretinde 952’de azl edilip sonra defter emîni ba’dehû 961’de
başdefterdâr oldu. Bir yıl sonra azl edilip ser-müteferrika olduğu hâlde 964’de vefât etdi. Hattât,
muhâsib ehl-i ma’ârifdi.

Hasan Bey-Kâsım Paşazâde
Amasyalıdır. Hakâlalı Hacı Beyzâde Kâsım Paşa mahdûmudur. Züamâdan olup hayli
muhârebelerde isbât-ı vücûd ederek ümerâdan oldu. Ba’dehû Amasya vâlîsi Şehzâde Sultân
Bâyezîd ma’iyyetine me’mûr olduğu hâlde 967 vak’asında vefât etdi.

584
589