Page 623 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

Hasan Efendi-Müftü el-Hâc
Köprülüdür. Abdullah oğludur. Amasya’da şeyhü’l-ulemâ Îrânlı Yûsuf Efendizâde el-
Hâc Hasan ve muhaddis-i meşhûr Hıfzızâde el-Hâc Fâ’ik Osmân Efendilerden ikmâl-i tahsîl
edib Köprü’de ders-i âm ve müderris-i be-nâm oldu.
1167’de Köprü müftüsü olup üç yıl sonra azl edildi. 1172’de sânîyen Köprü müftüsü olup
1175’de ma’zûl ve 1176’da sâlisen müftü olduğu hâlde 1177’de [480] vefât etdi. Gâyet fakîh,
nâfizü’l-kelim olup meşâhîr-i ulemâdan idi. Kerîmesi Ayşe Hâtun bir çeşme binâ edib 1196’da
vefât etdi. Çeşmesi civârında medfûndur.

Hasan Bey-Anahtar Ağasızâde el-Hâc
Amasyalıdır. Eski Kethüdâ Mahallesi eşrâfından ve Beylerbeyilerden Anahtar ağası el-
Hâc Mehmed Paşa’nın mahdûmudur. Pederinin kethüdâsı ve mütesellimi olup Rusya harbinde
1181’de şehîden vefât etdi. Amasya eşrâfından ve erbâb-ı hamiyyetten idi. Mahdûmları
Mehmed, Abdülehad Beylerdir.

Hasan Ağa-Avkâtlızâde es-Seyyid
Amasyalıdır. Esbak Amasya mütesellimi Avkâtlızâde el-Hâc Mehmed Ağa bin İbrâhim
Ağa’nın mahdûmudur. Sipâhî meşâhîrinden olup kethüdâyeri, Zile voyvodası, 1170’te
Merzifon mültezimi, 1172’de Amasya ve Gelkirâs evkâf-ı haremeyn mütevellîsi oldu. 1178’de
Merzifon’da Çelebi Sultân Mehmed evkâfı mütevellîsi olup 1180’de Rus harbine me’mûren
Bender’in muhâfazasına gitdi. 1184 hücûmunda şehîden vefât etdi. Birâderi es-Seyyid Veli
Ağa’dır. [481]

Hasan Efendi-Kara Mollazâde es-Seyyid el-Hâc
Amasya’nın Çile-hâne Mahallesi eşrâfından ve ulemâdan el-Hâc Alî Efendi bin Kara
Molla Mehmed Efendi’nin mahdûmudur. Ba’de’t-tahsîl dersiâm ve Diragiyye medresesi
müderrisi, 1173’de Abdüllatîf Efendi kütüb-hânesi hâfız-ı kütübü olup 1187’de vefât etdi. Eşrâf
ve sâdât-ı ulemâdan sâlih bir zât idi. Mahdûmları es-Seyyid el-Hâc Alî, Hüseyin Efendilerdir.

Hasan Ağa-Gevherzâde el-Hâc
Hâcıköylüdür. Oranın eşrâfından el-Hâc Ahmed Ağa bin Osmân Ağa bin Cevher Ağa’nın
oğludur. Erbâb-ı tîmârdan olup Îrân ve Rus muhârebâtında ibrâz-ı liyâkat ederek Gümüş
ma’deni emîni ve kazâ mütesellim ü a’yânı oldu.
Hâcıköyü’nde çeşmeler binâsıyla kasabayı ihyâ edib emlâk ve nukûd-ı vâfiresini vakf
etdi. 1190 sâline doğru vefât etdi. Hânedân, sofrası küşâde, sahî, sâhib-i hayr idi. Mahdûmları
Osmân, Mehmed Ağalarla birâderleri Mehmed, Mustafa Ağalardır.
Vakfına ibtidâ el-Hâc Osmân Ağa mütevellî olup 1213’de [482] vefât etdi. Mahdûmu
Hasan Ağa’dır. Sonra el-Hâc Mehmed Ağa mütevellî olup 1221’de vefât etdi. Mahdûmu
Ahmed Ağa’dır. Bunlar da sırasıyla mütevellî olmuşlardı.

Hasan Efendi-Hâcezâde el-Hâc
Lâdiklidir. Oranın meşâhîr-i ulemâsından Hâce el-Hâc Mustafa Efendizâde Ahmed
Efendi’nin mahdûmudur. Lâdik’te Şeyhülislâm medresesi müderrisi Amedî Mehmed
Efendi’nin halka-i tedrîsinde ikmâl-i tahsîl edib ders-i âm ve mûmâ-ileyhe dâmâd oldu.
Üstâdının irtihâlinde Şeyhülislâm medresesi müderrisi ve ba’dehû Lâdik müftüsü olup
ba’zı vekâyi’den dolayı 1185 senesi rebîülâhirinde azl edildiğinden recebinde Hicâz’a gitdi.
Medîne-i Münevvere’de iki yıl kadar mücâvir kalıp 1187’de avdet etdi. Vusûlünü müte’âkib
sânîyen Lâdik müftüsü olduğu hâlde 1191 senesi hudûdunda dâr-ı bekâya rihlet eyledi.
Meşâhîr-i ulemâ ve sulehâdan idi.

617
622