Page 625 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

Ba’dehû fakâhetle iştihâr edib ba’zı müftülere müsevvid ve emînü’l-fetvâ ve meclis-i
a’yâna mükerreren a’zâ olduğu hâlde 1203’de vefât etdi. A’yân-ı ulemâdan müteşerri’, natûk
bir zât idi. Evlâdı vardır.

Hasan Efendi -Ziyâreli Hâcezâde el-Hâc
Amasya’nın Ziyâre Mahallesi’nden olup Ziyâreli Hâce el-Hâc Mustafa Efendi’nin
mahdûmudur. “Uzun Müftü” demekle meşhûr es-Seyyid el-Hâc Abdullah Efendi’den ikmâl-i
tahsîl edib ders-i âm ve 1184’de pederinin mahlûlünden Fîrûz Ağa müderrisi ve meclis-i
hâciyân a’zâsı olduğu hâlde 1206’da vefât etdi. Ulemâdan idi.

Hasan Ağa-Müslim el-Hâc
Merzifonludur. Oranın eşrâfından el-Hâc Süleyman Ağa’nın [487] oğludur. Erbâb-ı
servet ü yesârdan olup Rus muhârebelerinde mâlî ve bedenî fedâkârlıklarla isbât-ı hamiyyet
eylediğinden Merzifon a’yânı ve ba’dehû mütesellimi olarak iştihâr etdi.
Ba’dehû Çelebi Sultân Mehmed evkâfı mütevellîsi olup sonra yine mütesellim oldu.
1207’de Arasta câmi-i şerîfini i’mâr ve dersi-âm ta’yîn ederek nukûd-ı vâfîre vakf edib çok
geçmeden vefât etdi. Müdebbir, sâhib-i hayr, hânedân bir zât idi.

Hasan Efendi-eş-Şeyh el-Hâc Sinânî
Çorumludur. Mehmed bin Hasan mahdûmudur. Genç iken Amasya’ya gelip imâret şeyhi
Müftüzâde el-Hâc Mehmed, Çorumlu Müftü es-Seyyid Alî Efendilerden ikmâl-i tahsîl edib
Çevikçe tekkesi şeyhi tarîkat-ı Halvetiyye meşâyih-i kirâmından eş-Şeyh Hüseyin Efendi’nin
sohbetinde tefeyyüz etdi.
Bu esnâda inhilâl eden Ya’kûb Paşa câmi-i şerîfi kürsî şeyhliği uhdesine tevcîh
edildiğinden fezâ’il-i ilmiyyesi ve hüsn-i hâli ile iştihâr edib 1180’de eş-Şeyh Hüseyin
Efendi’nin vefâtı üzerine Çevikçe tekkesi şeyhi oldu.[488]
Çevikçe tekkesi kendisiyle şeref bulup ihyâ edildi. Gerek fazl ü irfânı gerek hüsn-i takrîr
u beyânı ve gerekse zühd ü takvâsı bütün halk ve a’yânı kendisine cezb ederek esnâ-yı va’zında
Ya’kûb Paşa câmi-i şerîfi dolar, ihyâ geceleri Çevikce tekkesi dolup taşardı.
Otuz yıl kadar va’z ü tezkîr, nakl-i hadîs u tefsîr, zikr ü ibâdet, irşâd-ı halk ile iştigâl
ederek 1209 senesi şevvâlinin altıncı günü dâr-ı kudse irtihâl etdi. Âlim, kâmil, zâhid, müttakî,
pâk-sîret, mazınne-i kerâmet bir zât-ı âlî-himmet idi. Kaddesallâhu sırrahu’l-azîz.
Mahdûmları es-Seyyid el-Hâc Abdullah Vecîh, Mehmed Şerîf Efendilerdir. Yetmiş
dokuz yaşında [fevt] olup Amasya müftüsü Çorumlu es-Seyyid el-Hâc Alî Efendi’nin dâmâdı
idi. Es-Seyyid el-Hâc Abdullah Vecîh Efendi, muhakkik-i meşhûr olup Amasya müftüsü
olmuştur. Es-Seyyid el-Hâc Mehmed Şerîf Efendi de Çevikce tekkesi şeyhi olup 1228’de dâr-ı
bekâya irtihâl etdi. Evlâdına “Şeyhzâde” dendi. [489]

Hasan Ağa-Semercioğlu el-Hâc
Amasyalıdır. Yeniçeri zâbitânından serdâr-ı meşhûr el-Hâc Hüseyin Ağa’nın oğludur.
Altıncı bölükte mukayyed yeniçeri, odabaşı, 1184 târîhinden i’tibâren defâ’atle Amasya serdârı,
1203’de Serdengeçtiler ağası olarak Rus muhârebesinde ibrâz-ı liyâkat eylediğinden
Turnacıbaşı oldu.
Avdette meclis-i a’yân a’zâsı olup 1211’de vefât etdi. Receb Mahallesi eşrâfından
hânedân, sahî, şecî’ bir zât idi. Oğulları Seyyid Hüseyin, Mehmed Efendilerdir. Ahfâdından
Muvakkit Mehmed Hilmî Efendi bin Ahmed bin Mehmed Efendi Amasya müftüsü olup
1318’de vefât etdi.

619
624