Page 218 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

Reşîd Ömer Efendi-Şeyhzâde el-Hâc
Gümüşlüdür. Orada Şemseddîn tekkesi şeyhi olan Ahmed Efendi’nin mahdûmudur.
Amasya’da tahsîl-i ulûm edib Gümüş’te ders-i âm ve 1192’de pederinin vefâtıyla mahlûlünden
Şemseddîn tekkesi şeyhi oldu.
Ba’dehû kudâtdan olup İstanbul’a gitdi. Sudûr-ı ilmiyyeden olan hemşehrîsi Müftüzâde
Ahmed Efendi’ye intisâb ederek müşârün-ileyhin meşîhatında telhîscisi ve müderris oldu.
1206’da uhdesindeki meşîhati Gümüş ulemâsından el-Hâc Halîl Efendi’ye kasr-ı yed ü ferâgat
etdi.
Şeyhülislâm Ahmed Efendi’nin vefâtından sonra sancâklara ve ba’dehû vilâyetlere kadı
olup ma’zûlen Rûmeli hisârındaki sâhil-hânesinde mukîm iken 1227 senesi recebinde vefât
etdi. Kayalar’da medfûndur. Kibâr-ı kudâtdan âlim, sâlih idi.

Reşîd Mehmed Bey-Tamgacızâde
Amasyalıdır. Mîr-i mîrân Amasyalı Alemdâr Süleyman Paşa’nın mahdûmudur.
Amasya’da Câmi-i Enderûn Mahallesi’nde [87] doğdu. Amasya ve İstanbul’da tahsîl-i ulûm
edib pederinin kul kethüdâsı olduğu esnâda müderris oldu. Ba’dehû Mahmûd Paşa mahkemesi
baş-kâtibi ve ba’dehû mahkeme-i mezkûre nâibi oldu.
On beş yıldan ziyâde ora niyâbetinde bulunup 1268’de Kudüs mollası olduğundan
niyâbeti bıraktı. 1271 senesi şa’bânında vefât etdi. Ulemâdan idi. Mahdûmu Ahmed Râgıb Bey
me’mûrîn-i mâliyeden olup bunun mahdûmu Mahmûd Şevket Bey Çorum müdde-i umûmî
mu’âvini iken 1325 senesi şa’bânında vefât etdi. Lutefâdan, muktedir bir adliyye me’mûru idi.

Reşîd Mustafa Paşa-Hatîbzâde
Amasyalıdır. Yukarıda tercemesi yazılan Torumtay Câmii hatîbi ve Selîm Sırrı Paşa
imâmı Halîl Rüşdü Efendi’nin mahdûmudur. Amasya’nın Gök Medrese Mahallesi’nde doğdu.
Berâ-yı tahsîl İstanbul’a gidip Paşa’nın himâyesiyle Bâb-ı âlî’de mektûbî kalemine girdi.
Orada bi’t-tefeyyüz hulefâdan ve ba’dehû hâcegândan olup 1216’da eniştesi Hurşîd
Ahmed Paşa’ya kâtib-i [88] dîvân olarak Mısır fethine gitdi. 1218 senesi zilhiccesinde eniştesi
vezâretle Mısır vâlîsi oldukta nüfûz u ikbâli arttı.
1219 senesi evâsıtında Hurşîd Paşa’nın arz u inhâsıyla bâ-rütbe-i mîr-i mîrânî Dimyat
muhâfızı oldu. 1222 senesi rebîülâhirinde rütbe-i vezâretle İçil sancâğı mutasarrıfı olup Sofya
ser-askeri ve Rûmeli vâlîsi olan eniştesi ma’iyyetine me’mûr oldu.
1223’de İzmit mutasarrıfı ve Kocaeli vâlîsi olup 1227 senesi şa’bânının evâhirinde
eniştesi Hurşîd Paşa sadr-ı a’zam oldukta şevvâlinde Girid vâlîsi ve Konya muhâfızı olup nüfûz
ve dârât-ı vezâreti dü-bâlâ oldu.
1230 senesi rebîülâhirinde Hurşîd Paşa yeniçeri eşkiyâsının ağalarını öldürdükleri vak’a
zamânında hasbe’l-maslaha te’dîb-i eşkiyâyı te’hîr etdiğinden dolayı azl edilip Mehmed Emîn
Ra’ûf Paşa sadr-ı a’zam oldukta nüfûzunu muhâfaza edebildi.
1231 senesi şevvâlinde Selânik vâlîsi ve 1233’de [89] Midilli sancâğıyla Kuşadası
muhâfızı oldu. Üç yıl kadar Rûm eşkiyâsına karşı buraları muhâfaza etdiyse de ba’zı uygunsuz
ahvâlinden dolayı 1235 zilhiccesinde ref’ ve vezâretiyle Bursa’da ikâmete me’mûr oldu.
1237 senesi rebîülevvelinde Kuşadası muhâfızı Kalender Paşa’nın vefâtına ve eniştesi
Hurşîd Paşa’nın şefâ’atine binâ’en ibkâ-yı vezâretiyle sânîyen Midilli sancâğı mutasarrıfı ve
Kuşadası muhâfızı oldu.
Ancak Moliva’yı basan Rûm korsanları me’mûr etdiği adamları vâsıtasıyla tutulup dördü
i’dâm ve sekizi nezdine i’zâm edildikte Midilli metropolidinin ricâ ve niyâzına dayanamayıp
bunları tahliyye ve metropolide teslîm etmesinden dolayı sadr-ı âlî tarafından tekdîr edildi.
Bundan mütenebbih olacağı yerde ber-muceb-i emr-i âlî Midilli Rûmlarının silâhlarını
toplamak husûsunda vâki’ olan ihtiyât-kârâne hareketleri tesâmüh ü irtikâbına mahmûl

211
217