Page 271 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Ba’dehû ba’zı niyâbetlerde istihdâm edilerek Köprü a’yânından olup Zeytûn
niyâbetinden ma’zûlen 1210 senesi recebinin on birinci günü vefât etdi. Ulemâ ve a’yândan bir
zât idi. Mahdûmları es-Seyyid Yûsuf, Mehmed Nâbî, Abdulbâkî Efendilerdir. Es-Seyyid Yûsuf
Efendi 1213’de vefât etdi. Diğerlerinin el-yevm evlâdı vardır.

Sa’îd Mehmed Ağa-Hazînedârzâde
Merzifonludur. 1148’de maktûlen vefât eden Merzifonî Kara Mustafa Paşa’nın
hazînedârı olan el-Hâc Ali Ağa bin Mustafa Ağa’nın mahdûmudur. Merzifon’da iltizâm işlerine
girip nüfûz ü servet kazandı.
Ba’dehû Çelebi Sultân evkâfı mütevellîsi, Merzifon mültezimi [266] musâhibân-ı
şehrîyârîden Abdî Bey’in vekîli, Merzifon a’yânı oldu.
Rus muhârebâtında ve imdâd-ı seferî i’ânâtında hayli hizmetleri sebk eylediğinden
dergâh-ı âlî kapıcıbaşılığı rütbesiyle taltîf edilip 1210’ da Tokat voyvodası oldu. Üç yıl kadar
Tokat sancâğını idâre edib ba’de’l-azl 1216’da vefât etdi. Meşâhîr-i a’yândan hânedân,
mükerrem, müdebbir bir zât idi.

Sa’îd Mehmed Efendi-Çelebizâde, es-Seyyid
Köprülüdür. Köprü müftüsü es-Seyyid el-Hâc Abdullah Efendi bin Çelebi es-Seyyid el-
Hâc Mustafa Efendi’nin mahdûmudur. Pederinden tahsîl-i ulûm edib ders-i âm olduktan ve
pederinin irtihâlinden sonra Fâzıl Ahmed Paşa müderrisi olup 1217’de vefât etdi. Ulemâdan
idi. Mahdûmu es-Seyyid Hâşim Abdullah Efendi’dir.

Sa’îd Mehmed Ağa-Geyiklilioğlu el-Hâc
Amasyalıdır. El-Hâc İsmâ’îl Ağa bin Mehmed Ağa bin el-Hâc Hasan Ağa’nın oğludur.
Pederinin vefâtında 1191’de [267] Hüsâmeddîn Temennâyî vakfına mütevellî oldu. Ba’dehû
iltizâm işleriyle iştigâl ederek servet ü i’tibâr kazanıp Amasyalı Çiğdem Beyzâde Hâfız
Mehmed Paşa’nın kethüdâsı oldu.
Müşârün-ileyhin ma’iyyetinde devr-i eyâlât edib 1217’de hasta ve alîl olduğundan
1218’de Hânya’da vefât etdi. Mahdûmu vüzerâdan es-Seyyid İsmâ’îl Hakkı Paşa’nın tercemesi
yukarıda geçti. Bilâlzâdelere dâmâd olmuşdu.

Sa’îd Mehmed Paşa-Yeğenzâde, es-Seyyid, el-Hâc
Amasyalıdır. 1194’de Amasya’da vefât eden Ömer Paşa bin el-Hâc İbrâhim Bey bin el-
Hâc Yeğen Ali Bey bin el-Hâc Ahmed Bey bin Küçük Ali Bey’in mahdûmudur. Pederinin
hayâtında tahsîl-i ilm ü kitâbet edib iltizâmât işleriyle iştigâl ederek pederinden intikâl eden
servet ü i’tibârını tevsî’a çalışdı.
Ber-vech-i mâlikâne Amasya mutasarrıfı olan Caniklizâde Mikdâd Ahmed Paşa’nın
1195’de ikinci defâki mutasarrıflığında araları açık olduğundan İstanbul’a gidip 1199
şevvâlinde vezîr olan Gürcü Koca Yûsuf Paşa’ya intisâb ederek [268] dâ’iresine girdi.
1200 senesi rebîülevvelinde sadr-ı a’zam olan Koca Yûsuf Paşa’ya kendisini sevdirip
kapıcıları kethüdâsı oldu. Sadâretten azlinde beraber gidip 1205 senesi cumâdelâhiresinde
ikinci def’a sadr-ı a’zam olan müşârün-ileyhin yine kapıcıları kethüdâsı olup 1206’da sulhu
müte’âkib dergâh-ı âlî kapıcıbaşılığı ile taltîf edildi. 1206 senesi ramazânında müşarün-ileyhin
sadâretten azlinde kapı kethüdâsı olup 1207 senesi şa’bânında Cidde vâlîsi ve Medîne-i
münevvere muhâfızı oldukta beraber gitdi. Yedi yıldan ziyâde Hicâz’da kalıp 1215 senesi
muharreminde Koca Yûsuf Paşa’nın irtihâli üzerine bâ-rütbe-i mîr-i mîrânî Medîne-i
Münevvere muhâfızı oldu.
Bundan sonra vüzerâdan birkaç zâta Cidde vilâyeti ve Medine muhâfızlığı tevcîh
edildiği hâlde Vehhâbîler’in tecâvüzâtından hiç biri de gidemediğinden dört yıl kadar Medîne-
i Münevvereyi Vehhâbîler’e karşı müdâfa’a ederek hüsn-i muhâfaza etdi. [269]

264
270