Page 289 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

1102’de vezîr-i müşârün-ileyhin irtihâlinde kadı olup livâlara gitdi. 1113’de Niğde
kazâsından munfasılan Amasya’ya gelip 1114’de meclis-i a’yân a’zâsı olduğu hâlde vefât etdi.
Âlim, hâfız, kârî, sadâsı güzel bir kadı idi.

Selîm Paşa-Tayyâr Paşazâde
Lâdiklidir. Sadr-ı esbak Tayyâr Mehmed Paşa’nın evlâd-ı inâsından ve birâderi Hüseyin
Bey’in evlâd-ı zükûrundan olup 1108’de vefât eden Hasan Paşa bin Osmân Ağa bin Hüseyin
Bey bin Mustafa Paşa’nın mahdûmudur.
Pederinin paşalığı esnâsında ze’âmetle taltîf edilip hayli muhârebâta iştirâk etdi. Bir
müddet Canik sancâğı alaybeyi olup 1109’da Amcazâde Hüseyin Paşa’nın [329] sadâreti
esnâsında Sentene Muhârebesinde ibrâz-ı liyâkât etdiğinden dolayı mîrlivâ oldu.
1115 senesi vak’asında yeniçeri Ağası Lâdikli Çalık Ahmed Paşa’ya intisâbından dolayı
Kefe Beylerbeyi olup gitdi. Ba’dehû ma’zûlen Lâdik’e gelip üç yıl kadar ikâmet etdi. 1118’de
Aksaray sancâğı mutasarrıfı olup idbârına hitâm verildi.
1122 senesinde Rus muhârebesinde Sadr-ı a’zam Osmâncıklı Baltacı Mehmed Paşa’nın
teveccühâtını kazanıp Kars beylerbeyi ve 1124’de Kayseriyye mutasarrıfı oldu. Ba’dehû
Diyarbekir vâlîsinin ma’iyyetine me’mûren oraya gidip 1127’de Diyarbekir’de vefât etdi.

Selîm Ağa-Hacı Ma’denzâde el-Hâc
Amasyalıdır. A’yândan el-Hâc Mehmed Ağa bin el-Hâc Ali Ağa bin el-Hâc Ma’den
Ağa’nın mahdûmudur. Zanalızâde es-Seyyid el-Hâc Ahmed Paşa’nın dâ’iresine intisâb edib
sadâretinde ağalarından oldu. Ba’dehû Hekîmzâde Ali Paşa’nın dâ’iresine girdi. [330]
Bir müddet müşârün-ileyhin teveccühâtını kazanıp kethüdâsı ve 1168 senesi
cumâdelâhiresinde sadr-ı a’zam oldukta dergâh-ı âlî kapıcıbaşılığı ile kapıcıları kethüdâsı oldu.
Ancak efendisi şa’bânın yedisinde azl ü nefy edildikte Hicâz’a gitdi.
Avdette Amasya’ya gelip 1171’de baş a’yân oldu. 1172’de İstanbul’a gidip baş bâkî kulu,
sonra kasapbaşı olduğu hâlde 1175’de vefât etdi. Eğrikapı Mezârlığı’nda medfûndur.
Müte’ayyin ricâlden idi.

Selîm Ağa-Palancızâde el-Hâc
Amasyalıdır. A’yândan el-Hâc Mustafa Ağa bin el-Hâc Ali Ağa’nın mahdûmudur.
Sarâchâne Câmi-i şerîfi ittisâlinde pederinin yaptırdığı medresesi vakfının mütevellîsi olarak
hâciyân u a’yân meclislerine defâ’atle a’zâ oldu.
Rus muhârebesinde mâlen ve bedenen fevka’l-âde hizmetler îfâ ederek yararlıklar
gösterdiğinden 1184’de dergâh-ı âlî kapıcıbaşılığı ile taltîf edildi. Ba’dehû İstanbul’a gidip
ba’zı menâsıba nâ’il oldu. 1192’de [331] surre-i hümâyûn emîni olarak sânîyen Hicâz’a gitdi.
Avdette 1194’de vefât etdi. Aksarây’da Murâd Paşa Kabristânı’nda medfûndur. Gâyet zengîn,
kerîm, âkil, zî-nüfûz bir hânedân idi.

Selîm İbrâhim Bey-Hüseyin Paşazâde
Vüzerâdan Amasyalı Türedizâde Hüseyin Paşa’nın mahdûmudur. Pederinin irtihâlinde
gelip Amasya’nın Şâmîce Mahallesi’nde yaptırdığı konağında ikâmet etdi. Bir müddet sonra
meclis a’zâsı olup 1202’de Rus muhârebesine gitdi. 1205’de mîrlivâlıkla sancâklara gidip
1211’de Eskişehir sancâğından ma’zûlen Amasya’da vefât etdi. Birâderi Mehmed Sâdık
Bey’dir.

Selîm Ağa-Hâcıoğlu, Altıncı
Amasyalıdır. 1195 senesi cumâdelulâsında Çayköy Mâlikânesi mutasarrıfı iken vefât
eden el-Hâc İbrâhim Ağa bin Ali Ağa bin Mehmed Ağa’nın mahdûmudur. Yeniçeri ve
pederinin irtihâlinde mezkûr mâlikâne mutasarrıfı ve ba’dehû Amasya serdârı oldu. [332]

282
288