Page 292 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

Süleyman Bey-Emîr Şücâeddîn
Amasya kalesi dizdârı Emîr Seyfeddîn Sunkur Bey’in mahdûmudur. Babukşâh’ın zamân-
ı vilâyetinde Amasya cândârı, ya’nî muhâfızı olup Şerefeddîn Ya’kûbşâh 739’da Tebrîz’e
gitdiği esnâda kendisine muvâfakat eden Amasya ümerâsıyla birlikte Sultân Altunbaş’ı
Amasya’da taht-ı Selçuk’a iclâs etdi.
Bu esnâda Amasya cândârı ve kalesi dizdârı olup nûfuz u i’tibâr kazandı. Lâkin çok
devâm etmedi. 741’de Tâceddîn Doğanşâh’ın Amasya’ya hücûm u istîlâsı zamânında vefât etdi.
Meşâhîr-i ümerâdan “Sunkuroğlu” demekle meşhûr idi.

Süleyman Bey-Emîr Mu’îneddîn, el-Hâc
Amasyalıdır. Amasya emîr-i kebîri Şerefeddîn Ya’kûb Şâh bin Nâsıreddîn Mehmed Bey
bin Mübârizeddîn Mûsâ Bey bin emîr-i kebîr Seyfeddîn Torumtay mahdûmudur. Halk [340]
arasında “Torumtayoğlu” demekle meşhûrdur.
Pederinin hayâtında ümerâdan olup 739’da pederi Tebrîz’e gitdikte yerine Amasya vâlî
kâ’im-makâmı oldu. Bir buçuk yıl kadar Amasya vilâyetini pederi nâmına hüsn-i idâre ve
muhâfaza etmekte iken 741 senesi evâ’ilinde Niksar emîri Doğan Şâh’ın hücûm u kuvveti
karşısında çekildi.
Ba’dehû Kürtoğlu Hacı Kutluşâh tarafdârı olarak nûfuz u mevki’ini muhâfaza edib
müşârün-ileyhin vezîr u zahîri ve ser-askeri oldu. 762’de Konya muhârebesinde vefât etdiği
zann olunur.
Meşâhîr-i ümerâdan asîl, hânedân, nâfizü’l-kelim bir emîr-i kebîr idi. Ceddi Torumtay
Türbesi’nde medfûndur. Kireçle yapılmış olan kabrinde “Süleyman Çelebi bin Ya’kûb Şâh”
olduğu yazılıdır. Fakat târîh-i irtihâli bulunamadı. Mahdûmu Sirâceddîn Mehmed Çelebi’dir.

Süleyman Bey-Emir-i Kebîr Şücâeddîn
Amasyalıdır. “Halfetoğlu” demekle meşhûr Emîr Alâeddîn Ali Bey bin Celâleddîn
Mehmed Bey bin Şücâeddîn Tekür [341] Sinan Bey bin emîr-i kebîr Mübârizeddîn Halîfe Alp
bin Tüli Bey bin Türkân Şâh bin Güdül Bey’in mahdûmudur.
Pederinin vefâtında emâreti ve nüfûz ü i’tibârı kendisine mîrâs olarak kaldı. Çobanzâde
Timurtaş Bey’e münkâd olup sonra Torumtayoğlu Ya’kûb Şâh’a itâ’at etdi. Hâbiloğlu Sultân
Zeyneddîn Tüli Hân devrinde emîr-i kebîr oldu.
Bunun vefâtından sonra Gül Beyoğullarını kendisine celb ü istimâle ederek Hacı Kutlu
Şâh Karamanoğlu Süleyman Bey’e mağlûb olduğu 757 senesinde kıyâm edib Amasya
vilâyetini zabt ü istîlâ ve kendisini emîr-i kebîr i’lân etdi.
Bir buçuk yıl kadar Amasya emâretinde kalabildi. 759’da Hacı Kutluşâhzâde Emîr
Şehâbeddîn Ahmed Şâh ma’iyyetine aldığı kuvvetle Tokat’ı aldıktan sonra Amasya üzerine
yürüdüğü esnâda Torumtay ve Sunkuroğulları da harekete geldiğinden emâretten çekilip inzivâ
ve bu esnâda irtihâl etdi. [342]
Âlim, kâmil, müdebbir, hânedân, asîl bir emîr-i zî-şân idi. Mahdûmu emîr-i kebîr
Alâeddîn Ali Bey de meşhûrdur. Ceddi Halîfe İlbey hayrât-ı şerîfesini i’mâr ve evkâfını tevsî’
etdi. Kabri bulunamadı.

Süleyman Bey-Emîr Bahâeddîn Sunkurî
Amasyalıdır. “Sunkuroğlu” demekle meşhûr olan Emîr Kemâleddîn İsmâ’îl Bey bin Emîr
Seyfeddîn Sunkur Bey’in mahdûmudur. İbtidâ Torumtay oğlu Ya’kûb Şâh’a mütâba’at ederek
ümerâdan olup sonra Hacı Kutlu Şâh’a münkâd ü zahîr oldu.
Bundan dolayı fevka’l-âde nûfuz u i’tibâr kazanıp Hacı Kutlu Şâhoğulları Ahmed Şâh ile
Hacı Şâdgeldi Pâdişâh’a mu’în u müsteşâr olduğu hâlde 769’da vefât etdi. Bu da meşâhîr-i
ümerâdan âlim, ma’ârife hâdim bir zât idi. Mahdûmu Îsâ Bey’dir. Bunun hafîdi sadr-ı esbak

285
291