Page 604 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

şehîd oldu. Şüc’ân-ı ümerâdan idi. Amasya dâhilinde Gököyük mâlikânesinden aldığı 31754
akçe ze’âmeti iki mahdûmu Mûsa, İbrâhim Beyler’e verildi.

Hasan Efendi-Müftü
Gümüşlüdür. Amasya sancâğı dâhilinde Gümüş kasabasından Hüseyin’in mahdûmudur.
Amasya’ya gelip kâdızâde Mehmed ve fâzıl-ı meşhûr Gürcü İmâm Hasan Efendilerin halka-i
tedrîslerinde ikmâl-i tahsîl ederek Hasan Efendi’den mücâz ve ders-i âm oldu.
Bir müddet Amasya’da tedrîs-i ulûm edib icâzet verdiği 1053 senesi şevvâlinde
Sultâniyye-i Merzifon müderrisi ba’dehû Merzifon müftüsü oldu. 1058’de tedrîs ü fetvâdan
ma’zûlen Amasya’ya gelip 1061’de Halfet Gâzi müderrisi 1067’de Gümüş nâibi ve 1069’da
orada Halîl Paşa müderrisi ve müte’âkiben Gümüş müftüsü oldu.
Altı yıl kadar Gümüş’te tedrîs u iftâ ile iştigâl edib 1075’de dâr-ı bekâya irtihâl etdi. Âlim,
fıkıh ve usûlde mâhir, umûr-ı kazâ ve fetvâya vâkıf müteşerri’ bir zât idi. Mahdûmu Mehmed
Fâ’iz Efendi de ulemâ ve kudâttan olup [418] “Gümüşlüzâde” demekle meşhûrdur.

Hasan Ağa-Mansûrzâde el-Hâc
Amasya’nın Hacı İlyâs Mahallesi eşrâfından el-Hâc Ahmed Ağa’nın mahdûmudur.
Amasya’da Bezzâzistân kethüdâsı meclis-i a’yân a’zâsı olup 1072’de Ok meydânındaki gâyet
ma’mûr u kebîr bâğçesini Enderûn câmii vâ’iz-i meşhûru Tâceddînzâde Hüseyin Efendi’ye ve
ba’de vefâtihî câmi-i mezbûr kürsî şeyhlerine vakf ederek 1076 senesi evâhirinde vefât etdi.
Hânedân, sâhib-i hayr, dîndâr idi. Bilâ-veled olduğundan birâderi el-Hâc Alî Ağa vakfına
mütevellî oldu. Bunun mahdûmu el-Hâc Abdulkâdir Ağa ve evlâdı mütevellî olmuşlardı.

Hasan Bey-Kâdızâde
Amasyalıdır. Meşâhîr-i züamâdan Amasya alaybeyi Alî Bey bin Mehmed Bey’in
mahdûmudur. Pederinin ze’âmetine mutasarrıf olarak muhârebâta iştirâk etdi. 1058 târîhinden
i’tibâren def’alarla Amasya alaybeyi olup 1078’de Girid muhârebesine me’mûren gitdi.
1079’da Kandiye muhâsarasında şehîden vefât etdi. Mahdûmu el-Hâc Hüseyin Paşa’dır. Kerîm,
hânedân, Köprübaşı Mahallesi eşrâfından idi. [419]

Hasan Ağa-Koca Ağazâde el-Hâc
Amasya’nın Kocacık Mahallesi eşrâfından ve Kocacık evlâdından Koca Hüseyin Ağa’nın
oğludur. Sipâhî olarak hayli muhârebâta iştirâk edib Bağdâd harbinde şecâ’atle nâm-dâr oldu.
Ba’dehû Ahmed Paşa’ya intisâb edib müşarün ileyhin kethüdâsı ve 1054 muharreminde
Amasya mütesellimi oldu.
1055 saferinde Girid’e me’mûr olup 1058’de Tokat voyvodası ve Amasya beytü’l-mâl
emîni, 1059 muharreminde sânîyen Amasya mütesellimi ve recebinde ma’zûl oldu. 1061’de
Zile voyvodası ve 1069’da sânîyen Tokat voyvodası ve Amasya beytü’l-mâl emîni olup
1072’de ma’zûl oldu.
Çünkü bu esnâda sadr-ı a’zam olan Köprülüzâde Fâzıl Ahmed Paşa’yı pederi Amasya
mutasarrıfı iken bir husûstan dolayı gücendirmişti. Bunun için azl ü tekâ’üd edildi. 1075’de
Kocacık Mahallesi’ndeki hânesini ve Soğukpınar’daki bâğçe ve bâğını evlâdına vakf edib
menkûbâne imrâr-ı hayât ederek 1081’de vefât etdi. Mukdim, müdebbir idi.

Hasan Efendi-Kâtibzâde [420]
Amasyalıdır. Hattât-ı meşhûr İsmâ’îl Efendi’nin mahdûmudur. Pederinden hutût-ı
mütenevvi’ayı ve hâssaten ta’lîk hattını ahz ü temeşşuk edib ulemâdan da ulûm-ı şer’iyye ve
edebiyyeyi tahsîl ederek mahkeme-i şer’iyye kâtibi oldu. Ba’dehû ilm ü liyâkatine binâ’en
1069’da Amasya nâibi olup müddet-i hitâmında mahkeme kâtibi olduğu hâlde 1082 hudûdunda
vefât etdi. Âlim, ta’lîk-nüvîs, hattât, kâtib idi.

598
603