Page 609 - 6-8

Amasya Tarihi Cilt: 8
Amasya Tarihi 6-8. Cilt Hüseyin Hüsâmeddîn YASAR

Ba’dehû Deli Emîr Mehmed Paşa’nın kâtib-i dîvânı olup devr-i bilâd etdi. Paşa’nın
irtihâlinde Amasya’da mu’allim-i dârü’l-hâttâtîn olup 1105 senesi evâhirinde dâr-ı bekâya
rihlet etdi. Zî-ilm ü edeb, hattât-ı meşhûr bir kâtib idi. [432] Mahdûmu Beylerbeyi Fazlı
Paşa’dır.

Hasan Ağa-Sancızâde el-Hâc
Amasya mütesellimi olup “Sancı” demekle meşhûr olan Hakalalı Şatır Alî Ağa bin
Hamza Ağa’nın mahdûmudur. Ahî Sa’deddîn Mahallesi eşrâfından olup “Sancıoğlu” demekle
meşhûrdur. Sadr-ı esbak Kara İbrâhim Paşa’nın ağalarından olup sadâretinde dergâh-ı âlî
kapıcıbaşılarından oldu.
1097’de müşârün-ileyhin azl ü nefyinde Amasya’ya gelip türedilere karışmadığından
meclis-i a’yânın ilk teşkîlinde a’zâ ve ba’dehû baş a’yân olduğu hâlde 1107 hudûdunda vefât
etdi. Oğulları el-Hâc Alî, Ahmed Ağalar’dır.

Hasan Paşa-Hazînedâr
Lâdiklidir. Sadr-ı esbak Tayyâr Mehmed Paşa’nın birâderi Hüseyin Bey’in evlâdından
Osmân Ağa bin Hüseyin Bey bin Mustafa Paşa’nın mahdûmu olup “Yeğen” demekle
meşhûrdur. Lâdikli Seyyid Yûsuf Paşa’nın ağalarından iken hazînedârı oldu.
Müşarün ileyhin irtihâlinde Köprülüzâde Fâzıl Ahmed Paşa’ya intisâb edib sadr-ı
müşârün-ileyhin de irtihâlinde Lâdik voyvodası [433] olarak vatanına avdet etdi. Bir aralık
Amasya mütesellimi olup 1094’de Viyana harbine gitdi.
1099’da fermânlı olan Yeğenli türedilerinin tenkîline me’mûr olup sâdıkâne ibrâz-ı
hizmet eylediğinden 1100 senesi şa’bânında bâ-rütbe-i mîr-i mîrânî Karahisar-ı Şarkî
mutasarrıfı, 1102’de Kefe Beylerbeyi ve 1106’da eşkiyâdan Gavur Murâd aleyhine me’mûr
oldu.
Bu şekâvet çetesini tenkîl ü istîsâlde ibrâz-ı şecâ’at eylediğinden Rûmeli Beylerbeyiliği
pâyesiyle Azak vilâyeti muhâfızı oldu. 1107’de Yozgat-Bozok sancâğı mutasarrıfı olup 1108
senesi rebîülâhirinde orada vefât etdi. Şecî’, mukdim, sâdık idi. Mahdûmu Osmân Bey ile Selîm
Paşa’dır.

Hasan Paşa-Peçelizâde
Amasyalıdır. 1094’de Viyana önünde şehîden vefât eden Beşli ağası Mehmed Ağa bin
Osmân Ağa’nın mahdûmudur. Züamâdan olup 1096’da Amasya alaybeyi ve 1097’de ma’zûl
oldu.
1098’de ikinci def’a mîrâlây olup 1099’da emîrli ve ba’dehû türediler vak’alarında
fevka’l-âde yararlıklar göstermekle [434] 1100 senesi şa’bânında bâ-rütbe-i mîrânî
Caniksancâğı mutasarrıfı oldu. Orada fetevâcı gâ’ilesini de bastırıp hüsn-i idâresi görülmekle
1103’de Karaman pâyesiyle Musul Beylerbeyi oldu.
Bu esnâda Nişâncı Elmâs Mehmed Paşa’nın birâderi Mustafa Ağa’ya intisâb ederek
ondan beş bin kuruş istikrâz edib on iki bin kuruş deyni olduğuna dâ’ir sened verdiği
zannolunur. 1104’de Ankara Beylerbeyi ve 1107’de Azak vilâyeti muhâfızı oldu.
1108 senesi evâ’ilinde Azak Kal’asına kereste îsâline me’mûren Canik sancâğı
mutasarrıfı oldu. Ancak nişâncı birâderi Mustafa Ağa sened mucebince parasını alamadığından
İstanbul kâdısına mürâca’atla tahsîline i’lâm almışdı. Azak muhâfızı iken i’lâm teblîğ
edildiğinden beş bin kuruş te’diye edib yedi bin kuruşu vermekte mümâtale etdi. 255

255 Ayasofya mahzeninde ele geçen resmî zimmet defterinde böyle yazılıdır. Mümâtalesi fermân-ı pâdişâhîye
adem-i itâ’ati müş’ir olduğu bahânesiyle i’dâm edildi. Fakat Dâyin Hâcı Mustafâ Paşa’ya bu isnâdı
yaramadığından 1108’de muhârebede fenâ hâlde yaralanıp âh ü feryâd içinde cân verdi.

603
608