Page 610 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

Mustafa Ağa bundan fevka’l-âde muğber olup birâderinin sadâreti esnâsında ba’zı
şakîleri tahrîk etmekle Canik halkına zulm ü cefâ etdiği Sultân Mustafa-yı Sânîye arz u şikâyet
edildiğinden 1108 senesi şevvâlinde i’dâm edildi. [435]
Hizmet ü sadâkati görülmüş, cesûr, şecî’ bir merd idi. Mahdûmları Osmân, Ahmed, Alî,
Mustafa, Hasan Beylerdir. Emvâl ü emlâki müsâdere edildiğinden evlâdına yalnız Pervâne Bey
Mahallesinde kâ’in muhteşem konağı kaldı. Ahfâdından Mehmed Efendi bin Mustafa Bey
“Peçelizâde” demekle meşhûr olup 1251’de müderris idi.

Hasan Efendi-Şeyhü’l-Kurrâ Hâfız el-Hâc
Amasyalıdır. Amasya’da Nûh Bey Dârü’l-kurrâsı şeyhi iken 1081senesi zilka’desinin on
dokuzuncu günü tarîk-i hâcta vefât eden Hâfız Abdurrahmân Efendi’nin mahdûmudur.
Pederinden ilm-i vücûh-ı kırâ’ati ve ulemâdan ulûm-ı sâ’ireyi ahz edib pederinin irtihâlinde
Nûh Bey Dârü’l-kurrâsı şeyhi oldu.
Otuz yıldan ziyâde ta’lîm-i vücûh ve tedrîs-i ulûm ile iştigâl ederek Halfet Gâzi müderrisi
de oldu. 1112’de emîrü’l-hâcc olan Şam vâlîsi Amasyalı Ebû Kavuk Mehmed Paşa’ya imâm
olarak âzim-i Hicâz olup avdette kâfile-i hüccâca hücûm eden eşkiyâ-yı urbân elinde şehîden
vefât etdi. Âlim, kâmil, hâfız-ı Kur’ân bir şeyhü’l-kurrâ idi. [436]

Hasan Ağa -Türedizâde
Amasyalıdır. 1058’de maktûlen vefât eden Türedî Hüseyin Ağazâde el-Hâc Kâsım
Ağa’nın mahdûmudur. Sipâhî olup Amcazâde Hüseyin Paşa’ya intisâb ederek cebeci ocağına
girdi.
1109’da cebeciler kethüdâsı olup beş yıl kadar vazîfesini hüsn-i îfâ eylediğinden 1114
senesi şa’bânında cebecibaşı oldu. 1115 senesi ihtilâlinde ma’zûl ve ba’dehû merhûm oldu.
Mahdûmu Mehmed Ağa ve birâderi Hüseyin Ağa ma’rûfdur.

Hasan Efendi-Hüsâmzâde eş-Şeyh
Köprülüdür. Ulemâdan Hüsâmeddîn Efendi’nin mahdûmudur. Orada Kara Müderriszâde
Ahmed Efendi’den ikmâl-i tahsîl ederek ders-i âm ve Orta câmi vâ’izi ve ba’dehû Yağcı tekkesi
şeyhi oldu. Yıllarca da tedrîs, vâ’z ü tezkîr edib 1115 senesi evâhirinde vefât etdi. Zâhid, vâ’iz,
sâlih olan ulemâdan idi.

Hasan Ağa-Dedezâde el-Hâc
Köprülüdür. Oranın eşrâfından Dede Yûsuf Ağazâde [437] el-Hâc Mustafa Ağa’nın
mahdûmudur. Ammizâdesi Fâzıl Ahmed Paşa’nın zamân-ı sadâretinde ağalarından olup hayli
nüfûz u i’tibâr buldu.
Ba’dehû Merzifonlu Kara Mustafa Paşa sadâretinde ba’zı emânetlere mutasarrıf olarak
dergâh-ı âlî kapıcıbaşılarından oldu. Ancak 1095’de Kara İbrâhim Paşa’nın sadâretinde
Köprü’ye i’zâm edilip Köprülüzâde Fâzıl Mustafa Paşa’nın sadâretinde Köprü a’yânı olduğu
hâlde 1113 hudûdunda vefât etdi. Meşhûr hânedân idi.

Hasan Ağa-Yeğen es-Seyyid el-Hâc
Amasyalıdır. Sipâhî müteneffizânından Kara Mehmed Ağazâde Hüseyin Ağa’nın
oğludur. Mumcuzâde Seyyid Ahmed Paşa’nın hemşîrezâdesi olduğundan mûmâileyhin
dâ’iresinde harem kethüdâsı olarak nüfûz u haysiyyet kazandı.
Ancak Seyyid Paşa’nın katl ü i’dâmında bir müddet münzevîyâne imrâr-ı hayat edib 1105
târîhinden i’tibâren bir kaç def’a şehir kethüdâsı ve kerîmezâdesi olan es-Seyyid Hasan
Paşa’nın ikbâli sâyesinde nâ’il-i i’tibâr olduğu hâlde 1116’da [438] yetmiş yaşını geçkin iken
vefât etdi. Amasya hânedânından sofrası küşâde bir zât idi. Kerîmezâdesi Firârî es-Seyyid
Hasan Paşa’dır.

604
609