Page 616 - 6-8

Hüseyin Hüsâmeddîn YASAR
Amasya Tarihi 6-8. Cilt Hüseyin Hüsâmeddîn YASAR

Hasan Efendi-el-Hâc Hattât
Amasyalıdır. Alî bin Ahmed bin Mehmed mahdûmudur. Yukarıda tercemesi yazılan
hattât-ı meşhûr Hâfız Ahmed Efendi’nin ammizâdesi olup hutût-ı mütenevvi’ayı hattât-ı mûmâ-
ileyh Hâfız Ahmed Efendi’den ahz ü temeşşuk ve ulûmu Allâme Hızır Efendi’nin tilmîz ü
dâmâdı el-Hâc Osmân Efendi’den ahz u tahsîl etdi.
Sultân Bâyezîd câmi-i şerîfinde kâ’in hattât odasında şâkirdâna ta’lîm-i hutût ile iştigâl
edib ders-i âm ve müderris, 1124’de Meclis-i a’yân a’zâsı olduğu hâlde 1131’de vefât etdi.
Âlim, sâlih, hattât-ı meşhûr olup ta’lîk hattında ihtisâsı var idi. [455]
Âsâr-ı kalemiyyesi Amasya’da gâyet makbûl olduğundan hıfz edilen birkaç parça eseri
ziyâret edildi. İstanbul’da hattât-ı meşhûr Hâfız Osmân Efendi’den ahz-ı hutût u temeşşuk
etdiğini eserlerinde tasrîh etmişdir. Mahdûmu Hâfız Osmân Efendi de meşâhîr-i hattâtînden idi.

Hasan Efendi-Besni Müftüsü
Besnilidir. Mehmed oğludur. Orada tahsîl-i ulûm edib ders-i âm ve Besni-Behisni
müftüsü oldu. Mu’ahharan azl edildiğinden ve ba’zı vekâyi’den muğber olup Amasya’ya geldi.
1108’de Halfet Gâzi müderrisi olup yıllarca tedrîs-i ulûm ve fünûna hasr-ı iştigâl ederek
1134’de vefât etdi. Âlim, fâzıl, sâlih, müteşerri’ bir zât idi. Mahdûmu es-Seyyid Mehmed
Efendi de müderris olup 1150’de vefât etdi. Bunun mahdûmu es-Seyyid Abdullah Efendi’dir.

Hasan Efendi-eş-Şeyh Hâfız
Amasyalıdır. Hazret-i Pîr İlyâs vakfı mütevellîsi ve Gümüşlüzâde tekkesi şeyhi Mahmûd
Efendi’nin mahdûmu olduğu münâsebetle “Şeyhzâde” demekle meşhûr olup tahsîl-i ulûm ve
tekmîl-i sülûk [456]edib 1124’de pederinin irtihâlinde Hazret-i Pîr’in vakfı mütevellîsi ve
Gümüşlüzâde tekkesi şeyhi oldu.
On bir yıl kadar irşâd-ı halk ile iştigâl edib 1135 senesi şa’banının on birinde dâr-ı na’îme
irtihâl etdi. Âlim, halûk, hüsn-i hâl erbâbından bir zât idi. Mahdûmları Abdurrahîm, İsmâ’îl
Efendilere tevliyet verildi.
Üçler Mahallesi’nde Sa’dî Çelebi câmii imâmı ve kürsî şeyhi Hâfız el-Hâc Hasan Efendi
bin Alî de bu esnâlarda vefât etdi. Sulehâ-yı ümmetten bir âlim idi. Mahdûmları Osmân,
Abdullah Efendilerdir.

Hasan Efendi-Ahî Darb-hâneci Şeyhi
Amasya’da ulemâdan ikmâl-i tahsîl etdikten sonra Halvetiyye tarîkinde sülûk görüp Ahî
Darb-hâneci tekkesi şeyhi oldu. Bu tekkenin şeyhine meşrûta olan Geldiklan nâhiyesinde
Targullu Ebrek malikânesinin mutasarrıfı olup tekkeyi ihyâ ve i’mâr etdi.
1136 senesi cumâdelûlâsının on üçünde dâr-ı kudse irtihâl etdi. Meşâhîr-i sulehâdan bir
zât-ı sütûde-simât idi. Mahdûmu Feyzullâh Efendi meşîhat [457] ve mâlikâne-i mezkûreye
mutasarrıf oldu.
Receb Mahallesi imâmı Sâ’atçizâde el-Hâc Hâfız Hasan Efendi bin Mehmed Çelebi de
1136 senesi evâhirinde vefât etdi. Meclis-i a’yân a’zâsından hânedân, zî-nüfûz bir zât idi.
Mahdûmları el-Hâc Mehmed Mustafa Sâtı’ Efendilerdir. Yeğeni Çukadâr-ı şehriyârî Mustafa
Ağa bin İbrâhim Çelebi de “Sâ’atcizâde” demekle meşhûr idi.

Hasan Efendi-Hâcezâde el-Hâc
Amasyalıdır. 1071’de tarîk-i hâcta vefât eden kurrâdan Hâfız el-Hâc Abdurrahmân
Efendi’nin mahdûmudur. Yetîm kalmış olduğundan Hâcezâde el-Hâc Ahmed Efendi’nin
hânesinde büyüdü. Ba’de’t-tahsîl ders-i âm ve ba’dehû Halfet Gâzi müderrisi olup yıllarca
tedrîs ü ibâdetle iştigâl ederek 1138 senesi hudûdunda vefât etdi. Âlim, fakîh, vâ’iz bir zât idi.

610
615