Page 262 - 6-8

Hüseyin Hüsâmeddîn YASAR
Amasya Tarihi 9-12. Cilt Hüseyin Hüsâmeddîn YASAR

müderrisi Taşköprülü Mevlânâ Musliheddîn Efendi’den tahsîl-i ulûm ederek mücâz ve üstâdına
mu’îd olduğu esnâda 918’de peder ü üstâdıyla beraber İstanbul’a [239] kaldırıldı.
Ba’dehû üstâdından mülâzım ve ba’zı medârise müderris olup, Bursa, Edirne
medreselerine müderris olduktan sonra İstanbul’da Hacı Hasanzâde Medresesi müderrisi
olduğu hâlde 951’de vefât etdi. “Terceme-i Şakâyık”ta fâzıl, cevdet-i karîha ve sıhhat-i akîdeye
mâlik, âkil, bid’âtten müctenib, leyyinü’l-cânib bir zât idi.
Çünkü Şehzâde Sultân Ahmed’in Amasya vâlîliği zamânında ulemâ-yı a‘câmın
nüfûzuyla teşeyyu’ akâ’idi ba’zı zevâtın tağrîbine bâ’is olacak dereceye varmışdı. Bunların
Amasya’dan kaldırılması da teşeyyu’ zannından neş’et etmişdi.

Sa’dullâh Efendi-Ahîzâde
Amasyalıdır. Amasya vilâyeti muharriri Mevlânâ Sinan Çelebi bin Mahmûd Çelebi bin
Ahî Cüneyd Tokatî mahdûmu ve Nûrullâh ve Bâlî Abdullah Efendilerin birâderidir. Amasya
ulemâsından ahz-ı ulûm ederek bir müddet ders okutup Atabeg Gâzi müderrisi oldu.
940’da kasabâta ve ba’dehû kibâr-ı bilâda kadı olup [240] 935 sâline doğru vefât etdi.
Ulemâ-yı kudâtdan olup “Sa’dî Çelebi” de denirdi. Mahdûmu Hasan Çelebi’dir.

Sa’dullâh Efendi-Şeyh Muslihzâde
Amasya’nın İnepazar nâhiyesinden İsâmeddîn İbrâhim Efendi bin eş-Şeyh Musliheddîn
Efendi’nin mahdûmudur. Pederinden ve Harşenalı İbrâhim, Yağmurköylü İsmâ’îl ve Kâdızâde
Mehmed Efendilerden tahsîl-i ulûm edib İstanbul’a gitdi.
Orada vâlide Sultân kethüdâsı Behrâm Ağa’ya intisâb edib İstanbul müderrisliği
rü’ûsuyla taltîf edildi. 1045 senesi recebinin evâhirinde ber-vech-i te’bîd Amasya’da Halfet
Gâzi müderrisi olup 1067’de vefât etdi. Âlim, vâ’iz, kâmil idi. Behrâm Kethüda tâbi’i dendi.

Sa’dullâh Ağa-Hacı Kâsımzâde es-Seyyid el-Hâc
Amasyalıdır. Es-Seyyid Mustafa Ağa bin es-Seyyid el-Hâc Kâsım Ağa mahdûmu ve Deli
Emîr Mehmed Paşa’nın birâderidir. Birâderi Beylerbeyi oldukta hazînedârı ba’dehû hayli
müddet Adana mültezimi ve mütesellimi olup dergâh-ı âlî kapıcıbaşılarından [241] oldu.
1099’da ma’zûlen İstanbul’a gelip sonra vefât etdi. Erbâb-ı liyâkatdan idi. Mahdûmu es-Seyyid
Mehmed Bey Amasya a’yânındandır.

Sa’dullâh Bey-Selâm Beyzâde, el-Hâc
Amasya a’yânından Mehmed Bey bin Abdüsselâm Bey bin Fazlullâh Paşa’nın
mahdûmudur. Mehmed Paşa Mahallesi eşrâfından olup Köprülüzâde Fâzıl Ahmed Paşa’nın
sadâretinde mîr-livâ olarak Macaristân ve Girid muhârebâtına iştirâk etdi. Ba’dehû Cidde
sancâğı beyi olup 1097’de ma’zûlen İstanbul’a gelip 1102’de Çıkrıkçı Kemal Çelebi
Mahallesi’nde vefât etdi. Mahdûmu Mehmed Bey dergâh-ı âlî kapıcıbaşılarındandır.

Sa’dullâh Efendi-Hândân Ağazâde
Amasyalıdır. Erbâb-ı kalemden Hâfız Ali Efendi’nin mahdûmudur. Akrabâsından
Hatîbzâde Yahyâ Paşa’nın himmetiyle İstanbul’a gidip Bâb-ı âlîye girdi. Orada ta’lim u
terbiyye görüp tefeyyüz ederek hulefâdan oldu.
Ba’dehû müşârün-ileyh Yahyâ Paşa’ya kâtib-i dîvân olup Rûmeli vâlîliğinde hâcegânlık
rütbesiyle taltîf edildi. [242] 1168’de müşârün-ileyhin vefâtıyla İstanbul’a avdet edib 1169’da
mektûbî-i mâliye ser-halîfesi ba’dehû mukâta’a kâtibi oldu. 1176’da baş mukâta’acı 1180’de
piyâde mukâbelecisi ve 1182’de baş muhâsebeci olup şevvâlinde ma’zûl oldu. 1184 senesi
evâ’ilinde vefât etdi. Kâtib, hesâb işlerine vâkıf idi.

255
261