Page 263 - 6-8

Amasya Tarihi Cilt: 10
Amasya Tarihi 9-12. Cilt Hüseyin Hüsâmeddîn YASAR

Sa’dullâh Efendi-Çelebizâde, es-Seyyid, eş-Şeyh
Köprülüdür. Ulemâdan es-Seyyid Mustafa Efendi bin es-Seyyid Abdullah Efendi bin
es-Seyyid el-Hâc Çelebi Mustafa Efendi’nin mahdûmudur. Köprü ve Amasya’da tahsîl-i ulûm
edib Köprü’de ders-i âm oldu.
1178’de pederinin vefâtından mahlûl olan Kaplan zâviyesi şeyhi ve mezra’ası
mutasarrıfı olup 1200 senesi ramazânının yirmi ikisinde vefât etdi. Ulemâ ve sulehâdan vâ’iz
bir zât idi. Mahdûmu es-Seyyid Ali Efendi zâviye-i mezbûre şeyhi olduğu hâlde 1213’de fevt
oldu. Bu da ulemâdan idi. [243]

Sa’dullâh Efendi-Emîr İmâmzâde, es-Seyyid
Amasyalıdır. Sultân Bâyezîd imâmı es-Seyyid el-Hâc Halîl Efendi bin Emîr İmâm el-
Hâc Abdullatîf Efendi bin el-Hâc Halîl Efendi’nin mahdûmudur. 1153 senesi zilhiccesinin on
üçüncü günü Çeri-başı Mahallesinde doğdu.
Sultân Bâyezîd mektebinde hıfz-ı Kur’ân etdikten sonra kibâr-ı fuzalâdan
Seküköylüzâde el-Hâc Kâşif Mehmed, Ürgüblü el-Hâc Ahmed, Şeyhzâde es-Seyyid el-Hâc
Abdullah Vecîh Efendilerden ikmâl-i tahsîl ederek ders-i âm ve 1196’da Ebûbekir Paşa
Medresesi müderrisi, Sultân Bâyezîd imâmı ve ceddi kütüb-hânesinin hâfız-ı kütübü oldu.
On yedi yıldan ziyâde tedrîs-i ulûma nasb-ı nefs edib fezâ’il-i ilmiyyesiyle iştihâr etdi.
Talebesine icâzet verdiğinden bir yıl sonra 1213 senesi zilka’desinde dâr-ı na’îme irtihâl etdi.
Âlim, fâzıl, ulûm-ı şer’îyye ve akliyyede mâhir, mütâla’âta münhemik, gâyet musallî, zâhid bir
zât-ı sütûde-simât idi. Kütüb-hâne bağçesinde medfûndur. Mahdûmları es-Seyyid Abdullah
Tâhir, Mehmed Sa’îd, Mustafa [244] Sârim Efendilerdir. Âkifzâde es-Seyyid Abdurrahîm
Efendi bunu “Kitâbü’l Mecmû”unda pek senâ ediyor.

Sa’dullâh Efendi-Çelebizâde es-Seyyid
Köprülüdür. Ulemâdan Fâzıl Ahmed Paşa müderrisi es-Seyyid Feyzullâh Efendi’nin
mahdûmu olup tahsîl-i ulûm ederek ders-i âm ve pederinin irtihâlinde Fâzıl Ahmed Paşa
Medresesi müderrisi ve ba’dehû Köprü a’yânı oldu. Rus muhârebâtında imdâd-ı seferî
i’ânâtında hayli himmet edib sonra Tayyâr Mahmûd Paşa’nın şerrine uğradı. 1221’de vefât etdi.
A’yân u ulemâdan idi.

Sa’dullah Efendi-Emîr İmâmzâde, es-Seyyid, el-Hâc
Amasyalıdır. Ulemâdan es-Seyyid Mehmed Sa’îd Efendi bin es-Seyyid el-Hâc Ebûbekir
Efendi bin Emîr İmâm el-Hâc Abdullatîf Efendi’nin mahdûmudur. Allâme Şeyhzâde es-Seyyid
el-Hâc Abdullah Vecîh Efendi’nin halka-i tedrîsinde ikmâl-i tahsîl edib ders-i âm oldu.
Ba’dehû terk-i tedrîs edib memleket işleriyle iştigâl ederek meclis-i hâciyân u a’yân
a’zâsı olduğu halde [245] 1238’de vefât etdi. Ulemâdan ve meşâhîr-i a’yândan olup Çeribaşı
Mahallesi eşrâf u hânedânından idi.

Sa’dullâh Efendi-Hâcezâde
Amasyalıdır. Ahî Darb-hâneci tekkesi şeyhi müfessir-i meşhûr Merzifonî el-Hâc İsmâ’îl
Efendi’nin mahdûmudur. Canikli el-Hâc Mehmed Efendi’den ikmâl-i tahsîl edib bir müddet
ders-i âm oldu. Ba’dehû ikâmet etdiği Dârü’s-selâm Mahallesi Câmiinde vâ’iz olarak terk-i
tedrîs edib kûşe-i inzivâya çekildi. 1276’da vefât etdi. Ulemâ-yı sâlihînden müttakî, gâyet
müteşerri’ ve sâhib-i hüsn-i hâl idi. Oğulları Mehmed, Mustafa, Abdülhalîm Efendilerdir.

Sa’dullah Bey-Alaybeyizâde
Amasya züamasından Osmân Bey’in mahdûmu olup pederinin irtihâlinde 6800 akçe
ze’âmete mutasarrıf oldu. Sonra nizâmiyye zâbiti olup 1278’de binbaşı ve 1281’de kâ’im-

256
262